48. ዬሱስ ድንሸምፐይተ አእሽ ክፔተ ዳሰምቴ

ዋቀ አፒተ ኡሜዬ፥ ዌ ፕሰ አከተ ፐቃር፡፡ ኡመ ጩፖተን ክቶ፡፡ አታም ከ ሄዋን ኔፎ እኦል ጫለን፤ ከ ዋቀ ከሱ ጫለን፡፡ ፓቀ ታክ ቶተ እንክቶ፡፡ ዋቀ ኔፈይተ አከ ፒተ አሴ ፐሀነቶ ፈዴ፡፡

ሴተነ አከ ኬኔት ከረ ሄዋን ሰሰፐዶኤ ማከ ቁደን ኮዴ ከ ሃሰወዴ፡፡ ሴከመዬ እሼተ እሾ አታምከ ዋቀ ቀረ ጩፖተ ኮዴን፡፡ ጩፖተ አእሾተ ኮዴን ቀረን ኻቴኤ ነመ ፒተ ቀረ ቾ ፕሰከ ፓቅን ከ ቶን፡፡

ጩፖተ አአታም ከ ሄዋን ኮዴን ቀረን ኻቴኤ፥ ዋ ሴዴ ቀረ ቀፐ ከ አከተ ኔቀ ከሱከ ኮዴን፡፡ እሾተከ ፓርከለ ዋቀ ኮዴን፡፡ ሴዴ ቀረን ኻቴኤ፥ አውሴት ዴሰ ፓየቴ፥ ነመ ፕሰከ ቀልፔተ ጩፖታትን ደለዴ ከ ፓርከለ ዋቀ ኮዴ፡፡ ኦል አኬተሴ አርተ ነመ እሾ አዋቀ ከረ ክቶከ ጩፖተ ምነን ሀሴ፡፡ መ ኾር ዋቀ፥ ኦልአኬቶሴ አከ ሳንታድ ቀሮፐ ኦርቶኤ ድከዴ፡፡

ዋቀ ሰኜተ ሄዋን ኦፐዬ ተከ አከ መተ ማከ ቱሞ፥ ሴተነው አከ ከምንታድ ቆሞኤ ክፔተ ዳሼ፡፡ ሴዴ ኔፎ ሴተነ ድንሸምፐይቶሴ እሸ፤ መ ኾር ዋቀ ቶቶፐ እሸ ኻሸ ክዴተ፤ ሴከመዬ ድንሸምፐይቶሴከ ሁፕነ ሴተነ ሀከ ፐረፐራት ዮቀ፡፡ ኼልተደ ሌከየ ከመዬ፥ ዋቀ ድንሸምፐይቶሴ አከ ዬሱስ ኮዴ ኡፕነይሼ፡፡

ክሴተ አዋቀ ፒተ ፕሰ ፕሸ ፐቴታትን ፐሼዬ፥ ኦረ እሽ አመኔ ድንሰኤ መርከፐ ዴሃይሼ፡፡ ፖረ አሴ ፐሆኔ፥ ነመ ፕሰ ጩፖታድ ቀረን ኻቴኤ ፐቴተ እሸ ፐርፓችስን፤ መ ኾር ዋቀ፥ ነመ እሽ አመኖ ፕሰ ድንሰኤ ዬሱስ ዳሼ፡፡

ሀከ ፐራደ ድፐደ ሌከያትእ፥ ቄሴወ ቅታቴተ ጩፖተ ሰመይታት ፐርፓችስንቶ አክሰኤ፥ እሾተ መለ አኦልከመን ምትንን መል ከልሶተ ዋቀ ዴሀይሼን፡፡ መ ኾር ከልሶዎሴን ኤዬ ቸ፥ ጩፖታይሾ ሀትሰ እንኤተንኔ፡፡ ዬሱስ ቄስተ ኩተ፡፡ ከ ቄሴወ አፕለ ከፐዬ ኸው ዴሰ፥ አከ ጩፖተ ኦረ ፒተ ፕሰ አሌ ፐትሰ ኤተንሶኤ ከልሶተ ኸወይቴተ እስ ኮዴ ከ ዴሀይሼ፡፡ ዬሱስ ቆተ ቅታቴተ ጩፖተ አነመ መተ ምነ ኮዴ ፕሰ ቄደዴ መለ፥ ቄስተ ኩተ አዱካተ፡፡

ዋቀ አፕርሃምእ ሌሌ ከ ክዴ፥ ‹‹ኬ ምነን ሰመይተ ፒተ ፕሰከ ሰከመ።›› ዬሱስ ሰኜተ አፕርሃምፐ ደለዴ ፡፡ እሸ ምነን ሰመይተ ፒተ ፕሰከ ሰከሜ፤ ማነ መለ፥ ነመ ዬሱስ አመኔ ፕሰ ጩፖቶፐ እድኔይ፤ ከ አሴው ቅንደ ሀፑረትን ሰኜተ አፕርሃም ኮደ፡፡

ኤቴ ዋቀ አፕርሃም አከ እናድ ይስሀቅ ከልሶተ ኮዶ ከ ዴሃይሾ እሽ ሌሌዬ፥ ዋቀ ፐከ እናድ አይስሀቅ ኦፐኤ ላሀ ከልሶተ ዴሀይሼ፡፡ እኖ ፕሰንት ጩፖትኖ ምነን ቶተ አኖ ፐርፓችስን! መ ኾር ዋቀ አከ ፐክኖፐ ከልሶተ ኮዶ ከ ቶኦኤ፥ እሳሴ ላሀ ዋቀ ኮዴ ዬሱስ ዳሼ፡፡

ኤቴ ዋቀ ክፕስ ቀረኤ ኤርከናተ ፕራምፕረ ኤርኬዬ፥ አከ ላሀ ቀጨን ቀፕንን ቀለን ከ ዲከድ ኻረ እሾ መንቱረይተ ቁደ ፍደኔኤ ቶለ እስራኤልት ሌሌ፡፡ ኤቴ ዋቀ ዲኮሴ አኬዬ፥ ትኮሴን ከፐኔ ተርፔ ከ ኣኔ ኡመ ቃረደ ሄላሶት እንእከኔ፡፡ ኮዶሴ ኤዬ ቾ ኮደሜከ ፋስከ ክደሜ፡፡

ዬሱስ ላሀ ፋስክኖ፡፡ እሸ ቁልቁልተ ከ ጩፖተ መል ቸ፥ ከ ክሴተ ፓሌተ ፋስከት እሸሜ፡፡ ነመ አይኖ ኔፎ ኮዴቴ፥ ኦቶን ዬሱስ አመነዬ፥ ዲከ ዬሱስ ጩፖተ ነሞሴት ኸፈለም፤ ቅታቴተ ዋቀከ ነሞሴ ከፐን ተርፕን፡፡

ዋቀ ሰመይተሴ ኻድ ሬኸሜ አእስራኤል ኦልይ ኮደይቴተ ኮደዴ፡፡ መ ኾር አመ፥ ዋቀ ኮደይቴተ ሃረየ አነመ ፕሰ ቀረ ከይቶ ኮዴ፡፡ ኮደይቴሴ አሬ ክቶ ሃረየ ምነን፥ ከፈ ሰመይተ ፒተ ፕሰ ኦፐዬ አይኖ ኔፎ ኮድቶ ዬሱስ አመነኔ፥ ከፈ ሰመይተ ዋቀ ኮደ እኤተንሸ፡፡

ሙሴ ኹመምፐይተ ኩተ አቃሌተ ዋቀ ሰልሼ፡፡ ዬሱስ ኾር፥ ኹመምፐይተ ፕሰ ቀሮፔለ ቀፖ፡፡ እሸ ዋቀ፤ ሴመለ ዋ እሸ ኮዴ ከ ሃሰወዴ ፕሰ ኮደ ዋቀ ከ ቃሌተ ዋቀ፡፡ ሴመለ ዬሱስ ቃሌተ ዋቀ ክደም ከ ሀላም፡፡

ዋቀ ሰኜተ ኑቁሰ አታውትፐ ተከ አከ ኑቁሰ ኮዶ ከ ሰመይተ ዋቀ ቀረኤ ሀከ ፐረፐራት ኑቁሱሞኤ ክፔተ ዳሼ፡፡ ዬሱስ ቆተ ድንሸምፐይተ እነ ዋቀ ኮዴ መለ፥ ኸውዴሰ አሰኜሴ አታውትፐ አሀከ ፐረፐራት ኑቁሱመ ኤተንሾ እሸ፡፡

ታውት ኑቁሰ እስራኤል፤ ዬሱስ ኾር ኑቁሰ ኡመተ ፕሰ! እኦረ ከ ዴአ ከ ሙረ ዱካተ እሾ ነከይተኔ መንክስቴታድ ሀከ ፐረፐራት ሙክሸ፡፡