40. Yesuusi Yooddeehe

Gine naayina'o Yesuusin boonoshi coonetoyee gubb, yoodoyich daammiyeete. Bi yooddeyeemmi masqaloon shaakkiiheete.

Gine naayina'o “Qellee koofee xaa'oo” getteebeeti xaa'ooch Yesuusin daammii'i masqalee toommooch bi kishoonaa baatoonon xuuree xogoona xogii'i yooddiyeete. Tunebaani Yesuusi “Ta nihoocho! Boonoshin maaribe! Ebi boonoshi shuunee beeton ariyaaneena'one” iye. Phelaaxoosi wotta bi qellee took “Hini Ayihudeena'ochi taatoone” getaa kooreere bi xogeeyeemmon gettiye.

Gine naayina'o Yesuusi tahee toommooch ixo duppiyeete. Ebin tuniyoona, “Ta taheena'on boonoshinaa boonoshina qoodeeheete; genjje ta tahoochoo ixoon duppiyeete” ii beeti keemee qaaroon ceechiyeete.

Arooba Yesuusi gutte boggechina'o dagg yooddeeehe. Ikkoo biin naagiye, tunabaani bare ikkoo tiyi'i, “Yeerin amoyich shattaachine? Noona no shuunooniye no deqqaabeeto; hini uro bi shuuneti gonde mooyo amoona aalloone” iye. Aree hillooch Yesuusin “Doono Yesuuso! Ne taatittineech ne giyihoba, taan batteyaahine!” iye.

Wotta qeesheena'ochi ukkureena'onaa bare asheena'ona Yesuusin cooneeheete. “Isra'eelee taatoo Kiristoosi bi gaata, eke and masqaloochee kindibe. Bi kindaa beegiree iberiibone” iyeete.

Ebiyooba aredda shiritte saato tunee bi beechaa showoo ciroona xumehe. Shiritta saatoochee tiijji'i yiixiye saato beddimmi wottoon xumee bi iyitommona yagiye.

Arooye gubb Yesuusi, “Mooyo bulli ceennitone! ta nihoocho! Ta kasheen ne kishooch beshiya'a immeto taane”i'i cookiye. Ebin bi gettaaha, bi kasho abbetehe. Bi qitihoba showee qewahan; Yaafee Kexooch tippeeti maccillaatoo dambee tiijji'i desh beddaahaa gutte badd kapphee'i keexee kechiye.

Yesuusi bi qitoona asheena'o Yeeri waan boonoshi woyemmi gommon qechiye. Yesuusin quyeebeeti ginee iraashoo tuneti mooyon beeggi'i, “Iberoon hini uroyich gondoo aalloone. Aro Yeerichi Bushoone” iye.

Arooba Yesuusi Masiihi bi tunoon mullooch too'iiti gutte Ayihudee Wulleena'o Yoseefinaa Niqoodimoosina, Yesuusichi cahoon nooch imbei'i Phelaaxoosin qolleheete. Bi cahoon kaafenoona kaappii'i xaqqee guudoochee gooshaa shuuneeti oppooch daammii duukkiyeete. Arooche ooge xaqqoon gediriki'i are oppee kelloon hicciyeete.