41. Yeeri Yesuusin Qitoochee Tiijjiye

Gine naayina'o Yesuusin boonoshi yoodditoye gubb, bi toommooch mulloon too'iyaani Ayihude ukkureena'o Phelaaxoosich, “Hini kootechi Yesuusi, keejje qemoye gubb qitoochee tiyemmo taane iitone. Illa bi dabbeena'o bi cahoon boonoshi gaayaachemmonaa, qitii duukketina'o daggoochee kichitone boonoshi getaachemmon xiishoyich, oppoon ikke asho quyeebe” iyeete.

Phelaaxoosi “Kellechina'on daami neechibote! Hamiree ittoshi hakkimmi wottoon quyiibote!” iye. Ebich oppee kello keppheeti xaqqee toommooch malletoon geddii manjii hicci'i cahoon koniyona bi gaayaachemmoyich arooch gine naayina'on neechiyeete.

Yesuusi yooddeetoye gubb, bi hilleexi deco shambetoo tunehe. Ayihudena'o shambetoona arooch hamo boonoshich daaggeyaanoone. Ebich shambetooye gubb meeti maacheena'o kafee qaadooch cahee toommooch wuciya boonoshi qanniiti shittoon yechi'i Yesuusi duukketi maashooch hamma tiyiheete.

Diqqoona oogeti showee qewo tunehe. Bi aafo xeeyoochoomon pphaqqibeeti Doono Yeerichi maraakoo shimaayoochee bekkehe. Oppee kelloon keppheti maashee xaqqoon gedirikkii'i aree toommooch kotehe. Maashee oppoon quyeebeeti gine naayina'o maraakoon beeggi'i oogichii shatona showooch dihii'i qititi ashoon shaahiyeete.

Maacheena'o maashooch boonoshi shagihoba hini are maraakoo ishichiye:- “Haanoshite! Shattaahote! Yesuusi hiniich aalloone. Qitii duukketina'o daggoochee kechemmo taaneei'i bi gettitoommon kechitone! Bi cahoo qeyiti xaa'oon waaree beegote!”i'i gettiye. Bi cahoo arooche aalloone!

Aroochee maraakoo maacheena'oyich, “hiniichee hamiree, Yesuusi qitii duukketina'o daggoochee kechitone; Galiilla ittoshiyee shiichiree hammemmone getiree bi dabbeena'oyich getote!” iye.

Maacheena'oo oogeti emiroona ceeniyeete. Mishiraachoon Yesuusi dabbeena'oyich getta woceheete.

Getta hammii boonoshi beetaa, Yesuusi boonoshich bekkehe, boonoshiyoo gidde'i biich goyinneheete. Aroochee Yesuusi “Shattaahote! Hamiree, Galiila beshebote getiree ta maneena'oyich getote! Aroochaa taan beeggemmina'one” iye.