39. Nallachina'ochi Aafooch Yesuusi Neexehe

And deco xumi gutte qeellimone. Aroochee Yesuusin bi echemmoyich gine naayina'o qeeshee guudo waan daammiyeete. Pheexiroosi wokkiibee gubbaa boonoshin dabbiye. Yesuusin kechi maac boonoshi giijjihoba, Pheexiroosi maach tuneechii qaaqqoon kachii beehe.

Kechi daggaa Ayihude nallechina'o Yesuusin nallee gaberee aaf giddiiheete. Meeti koote miixeena'on bi toommooch neechiyeete. Tunebaani, boonoshi miixeti miixee qaaro ikkotteyaanoone. Ebich Ayihudee nallechina'o Yesuusi waanee yodoo dano hakko qajjiyeete.

Ciiroochaa qeeshee guudo Yesuusin bi afooch ciinii'i, “Ne Masiihi Kiristoos neene?” iye.

Yesuusi wochi'i, “Ne getteto neene; giidechi Yeerichi qanne badd ta kotetaa, wotta shimaajji qubee toommoochoo koteree ta waataa beeggemmo ittoshine” iye. Arooba qeeshee guudo bi tahoon keexxi'i, “Yeerin naaggitone; ebiyee damba amee miixoo qaawiihe? Yeerichi bushoo taane bi geton waayeto ittoshine. Illa ama getireeshiye ittoshi nallemmo?”i'i cookiye.

Ayihudee ukkureena'o bulli, “Wuxeebe”i'i qeeshee guudoch wochiyeete. Arooba Yesuusi aafe toommooch cuddiyeete; biinoo tukeheete; bi aafoon kaappichii tappeebee, “Konine neen tappeto? Eke nooch gete!”i'i cooneheete.

Pheexiroosi kechee maach quyee bi beetaa ikke shaajjete biin ciinnaa'a “Ne wotta hini uroochi dabbeena'o daggoochee ikkoo toon neene?” iyan. Pheexiroosi ebi bi getoon nookkehe. Aroyee gubb bare shaajjeteeyo ebin wochaa gettahan, Pheexiroosi ando wochii nookkehe. Ciiroochaa asheena'o ittoshi guttiyona Galiilee asho ittoshi tunetoyich ne Yesuusina tookkaa ne tunoon ariihone” iyeete.

Tunebaani Pheexiroosi “Ne gettaabeeton ta ariyaa beeto gaata Yeeri ufo ta tommooch kindibe”i'i bi kashoon uppii wogehe. Bekkech baakkoo kuukkiye. Doono Yesuusiyoo gubb wotte'i Pheexiroosin ciinniye.

Aree gaata Pheexiroosi maaxooch kechii'i tiittee eeppiye. Arooba Yesuusin beshii immiti Yihudi, Ayihude wulleena'o bi wuxeyeemmon Yesuus toommooch boonoshi nalloon beeggiye. Ebich ayinoona manjjee'i kechii hammii bi kishoona taaqqee qitiye.

Dechara maaddoona qeesheena'ochi ukkureena'o, Yesuusin cuchii'i daammii Yihudee iraashoo Phelaaxoosi waan deebiyeete. Phelaaxoosi Yesuusin, hukkecho tunii nalliree qitoona sheeriyemmonei'i gibenee beeheete. Phelaaxoosiyoo Yesuusin “Ne Ayihudeena'ochi taatoo neene?”i'i echehe.

Yesuusi ishichii'i wochiye, “Newona gettaabeetine, tunebaani ta taatittine hini showeexi tooneene. Hini showeexi bi tunetogaata, ta dabbeena'o koyeshina'one. Ta, ibereechon miixeya showee toommooch waato taane. Iberoochee tuneto bulli ta qaaroon waayemmone” iye. Phelaaxoosiyoo “Iberoo geto amoone?” iye.

Phelaaxoosi biina bi yibbaatetoye gubb, maach kechi'i, “Ta bi toommoochee gondoon daneyaano taane” iye. Ayihude ukkureena'onaa asheena'ona “Yoode!” i'i cookeeheete. Phelaaxoosi “Ta bi toommoochee gondoon danetaano taane”i'i boonoshich wochiye. Tunebaani beshoon caagee cangecheheete. Aroochee Phelaaxoosi, keejjinoon “amee gondoonona bi toommooch daneyaan taane” iye.

Phelaaxoosi asheena'o hukkoo tiijjemmina'onei'i shattiye, ebich Yesuusin boonoshi Yooddemmon bi gine naayina'oyich gettiye. Roomee gine naayina'o Yesuusin xoobbii boonoshi iyitoye gubb ceelle tahoon tajjiyeete; wotta angichi gubbichoon bi qellooch ukiiheete. Aroochee bi waan gidde'i, “Ayihudeena'ochi taatoocho!” iibee moo'ee diggiyoon diggiiheete.