38. Yesuusi Beshitaa Ichehe

Ayihudeena'ona nati natona beshee baaroon baarii beeheete. Ebi baaroo meeti balle natoye aaf Yeeri boonoshi qaabbech niheena'on Gibitsee guunittinoochee aabichii'i bi kichito gaata shalligichii beetone. Yesuusi kaamoona mishiraachoon getonaa dojjoononoyich bi giyimmi aafooch, ebi beshe baaroon boonoshina tookki baariya bi qaawoonaa aroye gubb wuxeyeemmo bi tunoonon bi dabbeena'oyich gettiye.

Yesuusi dabbeena'oochee ikkko Yihudi getteeto beetone. Yihudi mishiraachechina'ochi gijjee ukkuroone. Tunebaani gijjoo shunni bi beetoyich meeti aaboon gijjoon kojjoochee gaajjii beehe. Yesuusinaa bi dabbeena'ona Yerusalem boonoshi shaggitoye gubb, Yihudi Ayihude wulleena'o waan hammii'i Yesuusin gijjoona beshii imma wogo geddiye. Ayihude wulleena'o aroo Yeerichi Masiihi bi tunoon boonoshi nookkoonaa biin wuxiya boonoshi koceyoonon Yesuusi ariihe.

Ayihude wulleena'o qeeshee ukkuroona kocee'i, Yesuusin boonoshich beshii bi immemmoyich shaashe birewoon Yihudich qociyeete. Keemechina'o keemmitoommon ebi tunehe. Yihudi boonoshina mashaammii'i gijjoon yechii hammiye. Ebina Yesuusin boonoshi yechemmi gommon bi kaachiyemmi yawoon qaawoo yechiye.

Yesuusi Yerusaleema bi dabbeena'ona tookkii beshee baaroon baariye. Beshee baare maahoba Yesuusi koshon tijjii tiichiye. Ishichiino iye, “Ha'ote, mamote! Hini ta meenone. ebinoo taan shalligeechon tuniibote!” iye. Ebina Yesuusi bi meeno boonoshi qoodoon deejjeyeemmo bi tunoon gettiye.

Ebichi hillooch Yesuusi woyinee uyoon yechiti xoofoon tiijjii'i ishichiye:- “Ha'ote! Ebin shuuttebote! Hini woyinee uyo ittoshi axaaxoyich ufemmi ta damoone; ebiyoo Yeeri neechemmi andre wogee malletoone” iye.

Aroochee Yesuusi bi dabbeena'oyich, “Iberoon ittoshich gettoye; ittoshi daggoochee ikkoo taan beshiiree immemmone” iye. Dabbeena'o keqqiyeete, eboommi mooyon kone halliyemmoi'i echeheete. Yesuusi “And dukkaree ta qapphiiyemmo taan beshi immeemmo aroone” iye. Aroochee dukke'i Asqorootechi Yihudich qapphiihe.

Yihudi koshon bi qapphetoye gubb bekkech Sheexaano bi mullooch giyihe. Yihudi Ayihude ukkureena'o Yesuusin boonoshi yechemmon gaachoyich hammiye. Ebihoba deco xumetone.

Yesuusinaa bi dabbeena'ona tookkii'i xumi maayoon boonoshi maatoye gubb Zayitee Michi guudoch hammiyeete. Aroochee Yesuusi, “hanaach xum ittoshi bulli taan qajjemmo ittoshine”. “Qiddoon xoobbemmo taane; bageena'oo shacemmina'one” getaa kooreetone iye.

Arooba Pheexiroosi tiyi'i, “Bareena'o bulli neen boonoshi qayi gaatoona, ta neen cir qayaache” iye. Arooba Yesuusi Pheexiroosin ishichiye, “Sheexaanoo ittoshin daamma qaawiibeetone, tunebaani ta toommooch ne mullee too'iyoon ne qayaachemmoyich Yeerin qolleto taane. Ebi tunetaanoona hanaach xum baakkoo kuuhaan beetaa, keejje wottoon taan nookkemmo neene” iye.

Ebiyooba Pheexiroosi, “Ta Doonocho! ta qittimmo gaatoona neen qayaache” iye. Bare dabbeena'o bulliyoo ishichiyeete.

Aroyee gubb Yesuusi bi dabbeena'ona tookkii Getesemaana hammiye. Gondoochi nihoo dawushooch ittoshi giyaachemmoyich, kuppheree corootibote!i'i bi dabbeena'oyich gettiye. Arooche Yesuusi bi ikketoon corootiya hammiye.

Yesuusi keejje kaalloon corootiye, “Taabo! Ta nihoocho! Hini xuuxee xoofoon ta waanee wokkiibe! Tunetaa ne daaggoo tunebaani, ta daaggoo tunaaye” iye. Biyoo oogichii xuuxehe; damee cotoommon caajjo bi achoochee showooch cotehe. Yeeri biin kupphiyaa maraakoon deejjiye.

Corootii bi iti wotto bullin Yesuusi bi dabbeena'o waan wottee waa beehe, tunebaani boonoshi tokketetina'one. Keejjinnoo bi wottehoba, “Tibote! Hambone. Taan beshiiree immemmo and shaggitone” iye.

Yihudi Ayihudee qeesheena'ochi ukkureena'ona, gine naayina'onaa dofee asheena'ona tookkii waahe. Goraadoonaa yeelloonon yechitina'one. Yihudi Yesuus waan gidde'i, “Dojjechocho! Diggoo neech tunebeei'i yechii shummiye”. Ebiyoo konin boonoshi yechemmo gaata Ayihude ukkureena'oyich malletoone. Aroochee Yesuusi, “Yihudo! Shumona taan beshiya'a immene?” iye.

Gine naayina'o Yesuusin boonoshi yechimmona, Pheexiroosi bi cuyeti goraadoon kaacci'i qeeshee guudoochi guunon waamon karii kindiihe. Yesuusi Pheexiroosin “Ne goraadoon bi gonenooch wochibe! Ebiyoommo gaata, dofe maraakeena'on bekkech taach bi deejjiyemmoyich ta nihoon echo hakkiyooye” iye. Arooche Yesuusi uroochi waamon wodiihe. Yesuusi yechetoye gubb bi dabbeena'o bulli biin duppii aalleheete.