28. Gaannechi Gurimaashoo

Ikke areddoon ikke gaannech gurimaashoo Yesuus waan gidde'i, “Dojjechocho! Bulli yemeenee kashoon ta danemmoyich amee de'e shuunoon shuunebote?”i'i echehe. Yesuusiyoo, “De'e shuuneechon amoyich taan echaa beetine? De'o tuneto ikkeeti Yeeri baachiye. Bulli yemeenee kashoon danoon ne qaawi gaata, Yeerichi calloo gettibeeton ceechibe!” iye.

“Bi gettitoochee aaboshiniye? iye. Yesuusi wochi'i, Wuxiyaahine! Shuno maayaahine! Gaajjaahine! Kootoon miixeyaahine! Ne nihoonaa ne indeenon oogiibe! Neenoommi ne manoon neenna tachiree shune!” ii beetoniye iye.

“Gurimaashoo wochi'i, ta bushittinoochee tiijjaa'a eboshi bullin ceechito taane. Ebiye baroo ta shappiiti mooyo amoone?” iye. Yesuusiyo biin ciinnii shunniye.

“Yesuusiyoo de'oon tuno ne shuni gaata, hamiree neech beeto bullin kemiree iriteetina'oyich imbe! Neech shimaajji kexooch kiceeree beeyemmone. Aroyee gubb waaree taan dabbibe!” iye.

“Tunetaa are gurimaashoo wodde gijjoo biich beeto bi tunetoyich, ebin waaye'i tiyii ayiniibee wotte hammiye.” Yesuusi waane bi aafoon wochii'i hammiye.

Arooba Yesuusi, “bi dabbeena'oyich ishichiye:- Iberoon ittoshich gettoye; gaannechoyich shimaajji taatittineech gimo oogeti iritoone. Gaalleyich nappee aahoona besho maggoone; tunebaani wotta gaannechi uroyich Yeerichi taatittineech gimo ebiyee beshoon maggoone” iye.

Bi dabbeena'o ishin waaye'i oogichii woriganaabee, “Ishi gaata, konine wodoon hakkemmo?” iyeete.

Yesuusi boonoshin ciinni'i, “Asho hini mooyon tuniyoo hakkaache; tunebaani Yeeri bulli mooyon tuniyoyich hakkechone” iye.

Arooba Pheexiroosi wochi'i, “Illa bullin qajjaa'a neen dabbito noone. Ishi gaata, Yeer waanee no danemmo amooniye?” iye.

Yesuusiyoo biich ishichii wochiye:- “Taachai'i bi kexon, oohee bi anaami maneena'on, oohee bi maache maneena'on, oohee bi indeen, oohee bi nihoon, oohee bi bushiishoon, oohee bi gochii beeti showoon qajjito bullich Yeeri eboshi bulliyee beshaa beshoon immemmone; wotta bulli yemeenee kashoon biich immemmone. Tunebaani and ‘Shiichitina'o’ getteetina'ochi daggoochee meetina'o arooba gubbechina'o tuneemmina'one; and ‘gubbechina'o’ getteetina'ochi daggoochee meetina'o arooba shiichitina'o’ tuneemmina'one” iye.