27. De'e Shamaaree Ashi kiino

Ikke aabo Ikke Yihude callee dojjecho Yesuusin muriciiya qaawii'i bi waan waa, “Dojjechocho, bulli yemeenee kashoon ta danemmoyich, amoon hallibote”i'i echehe. Yesuusiyoo, “Callee Macaafooch kooreeto amoone?”i'i echehe.

Callee dojjechoo “Doono Yeeri ne Nuggushoon ne ceeni mulloona, ne ceeni kashoona, ne ceeni giidoona, ne ceeni shalligoona shune! Neenoommi ne manoon neenna tachiree shune!” ii beetone iye. Yesuusiyoo, “Iberoon gettetine; ebin ne tunii gaata, bulli yemeenee kashoon danemmo neene” iye.

Tunebaani hini callee dojjecho cadiqo bi tunoon xiishooyich, “Ta manochi konine?”i'i echehe.

Yesuusi kiinoon getona uroyich wochiye. “Ikke Yihude uro Yerusalemee Yaariki katamooch hammii bi beetaa, diqqoona boggechina'o biinna daneheete.

“Biin boggi'i bi tahoon shoottiyeete; yexxiinoo iyeete; bi kasheyoo kecha bedaa qajji'i hammiyeete.”

“Diqqoona ikke qeeshoo are gommona hammiibee, uro dihi'i beeti xaa'ooch shaggii beeggiichii gommon baqachi badd kuxxi'i beshehe.”

Woddoo yiciyaanoon, “Wotta ikke Lewee asho (Leeweena'o Yaafe kexoochaa qeesheena'on gaacheebeeti Yihude yoodena'one) are uro dihi'i beeti xaa'ooch shaggii beeggiichii biyoo gommon baqachi badd kuxxi'i beshehe.”

“Ebichi hillooch are gommona besheti ashoo ikke Shamaaree ashoone. (Shamaareena'o bare aagetee asheena'on shaaggiti Yihude yareena'one). Shamaareena'onaa Yihudeena'ona shixechina'one. Tunebaani ebi Shamaaree asho Yihudo tuneti uroon bi beegihoba oogeton ariqqeehe. Ebich zayitoonaa woyinee kiikkeroonon uroochi mayooch ukki'i kaappiye;”

“Aroochee Shamaaree asho bi hajjee kuroon yebbii'i gijjoo qocaa qeyee beeti ikke iibbee kexooch daammiye; aroochaanoo shiimeebee qeyiye.”

“Deco haraa gijjoon kichii iibbee kechi doonoyich immi'i, hini uroon gaawuchiree shiimebe! Hini ta immeti gijjoo bedo qayi gaata, ne kichito bullin ta wottehoba qoccemmo taane iichii hammiye.”

Ebiye gubb Yesuusi callee dojjechon, “Illa hini keemina'oochee boggechina'o kishooch dihiti uroyich manoon tuneto neech aabi shaahii beete?” i'i echehe. “Ariqqee'i gaachetone” iye. Yesuusiyoo, “Ne wotta hamiree ebiyoommon tuniibe!” iye.