26. Yesuusi bi Maddoon kottiye

Yesuusi Sheexaanoochi pphiroon bi wochitoye gubb, bee bee bi echeti Galilee woraabooch Yaafe Ayaanee giidoona wottehe. Yesuusi showooche showooch guuddii dojjii beehe. Asheena'o bulli biichon de'oon yibbaatee beeheete.

Yesuusi bushittinoona bee bee bi echeti Naazireet katamooch wottehe. Ikke Shambetee aabooba goyinnee xaa'ooch hammiye. Bi shemmemmoyich keemechi Isiyaasichi qode macaafoon biich immiyeete.

Yesuusi, “Neexaa hajjeetina'oyich mishiraachoon ta gettemmoyich, keccetina'oyich gawukkeyoon, cuchetina'oyich biicheyoon ta awaajjemmoyich, Nuggushoo Doono Yeerichi Ayaano ta toommoochiye. Hini shucheti Doono Yeerichi natonaa no Nuggushoochi gagee gaacci aaboone,”i'i shemmehe.

Aroochee Yesuusi kotehe. Asheena'o bulli biin katinni'i ciinniyeete. Bekkech arooba bi shemmeti Yeeri qaaro Masiihichon bekkii beetone. Yesuusiyoo, “Hanaach hini Yaafe Macaafee qaaro ittoshi waayeebeetaa ceennitone” iye. Asheena'o bulli bi noonoochee kechii beeti yibbaatee shaawon worigane'i, hini uro Yoseefichi bushoo toone? iyeete.

Aroochee Yesuusi, “Iberoon ittoshich gettoye; amoommo tunetaa keemechochi yibbaatoon bi hajjee showee asheena'o waayeyaacheete; Tunebaani iberoon ittoshich gettoye; Eliyasichi yemeenooba keejje natonaa shiritte agenoonon Yeeri shimaayoon hicaa, amiyo dihoo qajjitoyich, showoo bulliich shaacoo giyihoba, Isra'eelee showooch meeti xuume maacheena'o beetina'one. Tunebaani Eliyasin bi deggemmoyich Yeeri biin wocheto ikke xuumee waanani, Isra'eelee xuume maacheena'ochi daggoochee koni waanona toonoone” iye.

Yesuusi ishichii'i yibbaatoon yechiye, “Wotta keemechi Elsa'ichi yemeenooba Isra'eelee showooch meeti qeddee shaddee biiyechina'o beetina'one; tunebaani Sooriyee showeexi Na'imaaniyee damba boonoshiichee ikkoona Elsa'i waan waa'i wodito aalloone” iye. Yesuusin ellee beetina'o Yihudee asheena'o boonoshi tunetoyich, ebi bi yibbaatoon waayee'i ippeheete.

Naazireeti asheena'o Yesuusin awure wuxiyemmoyich goyinnee xaa'oochee geechii'i guudi toommooch daammiyeete. Tunebaani Yesuusi ashi daggoona beshee'i Naazireeti katamooch hammiye.

Arooche Yesuusi Galiilee woraabo bullich guuddiye, meeti asheena'oo bi waan waaheete. Ciino, sha'o, waayo, oohe yibbaato hakkaani asheena'on geddi'i meeti biiyechina'on oohe achoo duretina'on bi waan deebiyeete.

Yinno yechiti meeti asheena'onoo Yesuusi waan deebiyeete. Yesuusi getoona Yinneena'o asheena'on gawukii hammiyeete. Meeti kaalloono, “Ne Yeerichi Bushoo neene!”i'i cookii beeheete. Asheena'o worigane'i Yeerich goyinneheete.

Arooche Yesuusi dabbechina'o getteeti aaraa gutte asheena'on kaaciye. Boonoshiyoo Yesuusina tookki guuddiibee bi waane doyiyete.