46. ጳዉሎሲ ኣማና ማቂዴ።

ሳኦል ኢስጣፋኖሳ ዎኖ ኣሳን ኣፊላ ናጊዝ ናኢቲዳ ዬሱሳ ኣማናካዬ ይኮታቦ ኣማንዛን ዳኪሬ ኣቲናንሬ ማጫን ኤር ቃሽ ኣል ሚሻንዳቦ ሩሳሌማ ኣሳን ኣል ካሪን ካርን ሉኪሬ። ቄሳ ኣቃዲ ኢና ዎ ኣማንኖን ኤሪ ሩሳሌማ ማሃር ኤሄምፔን ዴማስቃ ካታማ ሉካምፔን ሳኦላ ሚሺዴ።

ሳኦል ዴማስቃ ሉካንዳብ ዬ ጋልዳ ዎዶን ኣፋፎ ጌሽ ፎኢን ኢቡጊዲምባር ዎይ ፎኢሲዴ ኢያሬ ሳዳ ኬዲድ ፔቲ ኣስ «ሳኦል ሳኦል ኣባብ ኔ ታና ዳካራ?» ጌይን ሲሲኪዴ ሳኦል «ጎዳዶ ኔ ኦኖ?» ጋር ኦይጪዴ ዬሱሲ ኢኮ «ታኒ ዬሱሳ ኔን ታና ዳኪሙታ ዎ» ጋር ማሂዴ።

ሳኦሊ ዲድኖፖ ዎሃ ቤቃንዳብ ኢያ ጋማዴ ኢባር ዎ ኢላጋን ኢያ ቲናር ዴማስቃ ኤጚዴ ሳኦሊ ኣይዚ ቃሚ ኩም ኣባኪ ሞካይ ኡሽካካይ ጋምኢዴ።

ዳማስቃ ሃናና ጌይዛ ዬሱሳ ታምሪዶር ዎ ጾሳዲ ሃናናቦ «ሳኦሊ ዎ ኣልን ጋርታ ሉካቤ ማቃር ኢቤቃምፔን ኔኦሊ ኩሽን ኢጋልዳ ጋዳር ጌሻቤ» ጌይዴ። ሃናኖ ዎቲናካሪ «ጎዳዶ ይ ናሳዲ ኣማንዝ ኣሳን ዎዛርፌን ዳኪሙታ ዎኮ ቴ ሲሲኪኔ» ጌይዴ። ጾሳዲ «ሉካቤ ኣይሁዳንኬ ሜላን ዎርዛን ማቂኖንቦ ቴ ሱምን ሶላምፔን ቴ ኣያ ማራጺኔ ቴ ሱምን ኮታቦ ኢ ዎይሊን ሜታ ኤኪሬ» ጌይዴ።

ይኮታቦ ሃናኖ ሳኦላኪ ሉኪዴ ፌ ኩሺን ኢጋልዳ ጋድር ኔን ዓይዲ ዬዚምባራ ኔባር ቤንቲኖ ዬሱሲ ዓቲ ኔን ማቃር ቤቃምፔንኬ ጺላ ኣያናባር ኩማምፔን ኔክ ታና ሚሽኔ» ጌይዴ ሳኦሊ ኤልባራ ቤቃንዳብ ዳንዳኢዴ ሃናናር ኢያ ጻማቂዴ ኢናፖ ዎሃ ሳኦሊ ፊሻር ሙይዴ ዎሊቃር ዲጚ ምጚዴ።

ሳኦሊ ኤልባራ «ዬሱሲ ጾሳ ናኤ ጋር ዴማስቃ ዎ ኣዩዳንቦ ሶሊ ኤዴ ኣይሁዳን ኣማንዚ ኣሳን ይሳንዳቦ ኮይኖ ናሳ ዓት ማ ዬሱሳ ኣማንኖቦ ጋራሚንቲዴ ሳኦሊ ዬሱሲ ማሳ ማቂኖን ኤራር ኣይሁዳን ኣማንዴ።

ዎይልን ቃማፖ ዎሃ ኣይሁዳን ሳኦላ ዎንዳቦ ቆፒዴ። ኢያ ዎንዳቦ ካታሚን ቡጊዲምባር ናጊዛንኮ ኣሳን ሚሽዴ ዎቲናካሬ ሳኦሊ ኢንቲ ቆፒኖን ሲሲኪዴ ኢላጋን ኢቡታምፔን ኢያ ማዲዴ ፔቲ ቃሚ ዳቻ ጋርታ ሚሻር ካታሚ ኣጺርን ጋልባር ሶብሲዴ ሳኦሊ ዴማስቃፖ ቡቲኖፖ ዎሃ ዬሱሳ ጎይ ሶላዚን ኣሻካዬ።

ሳኦሊ ዬሱሳ ታማራን ባር ዬላንዳቦ ሩሳሌማ ሉኪዴ ኢንቲ ዎቲናካሬ ኢጪዴ ዪና ኢዝ ኬልምባራ ባርናባሳ ጌይዝዲ ኣማናዛዲ ሳኦላ ኪቲንቲኖ ኣሳንኮ ኤጛር ሳኦሊ ዴማስቃ ዎዛርታር ኣጫካይዶር ሳባኪኖኮ ሶሊዴ ኢናፖ ዎሃ ዬሱሳ ታማራን ሳኦላ ፌክ ኤኪዴ።

ሩሳሌማ ዎ ዳስን ጋልዳፖ ዎጺኖ ፔታን ፔታን ኣምኒኖ ኣሳን ኣንጾካ ጋዝ ቤስን ጎቲ ሉካር ዬሱሳ ባዝ ሳባኪዴ ኣንጾካ ዎ ዎይልን ኣሳን ኣይሁዳ ኣስ ጊዳካዬ ዎቲናካር ቲንታር ዎይሊን ማ ኣማና ማቂዴ ባርናባሳኬ ሳኦላክ ይን ብርቲ ኣማንኖን ጉጃር ዬሱሳ ጎይ ታማርሳንስዳብኬ ጌሻ ኬን ሚንንዳቦ ኢና ሉኪዴ ዬሱሳ ባር ኣማንዛን ቲንታር ኣንጾካ ኣምንኖ ጌይንቲዴ።

ፔቲ ጋላስ ኣንጾካ ዎ ኣማንኖን ጾሚሙታ ጌሽሙታ ዎዶን ጺላ ኣያናዲ «ኢንቲ ጼጊንቲኖ ኦሲን ኦምፔን ባርናባሳኬ ሳኦላክ ቆራር ኢምብቴ» ጌይዴ። ይኮታቦ ኣንጾካ ጌሻ ኬን ጋርቶ ጪጛሻን ባርናባሳብኬ ሳኦላብ ጾሳ ጌሽዴ ፌ ኩሽን ኢንታ ጋልዳ ጋዳር ኢንታብ ጌሽዴ ኢናፖ ሜላን ዎይልን ቤስ ዬሱሳ ጎይ ሶላዚን ኮሻ ሶሊን ሳባካምፔን ኪቲ ምሽዴ ባርናባሳኪ ሳኦላኪ ዱማ ዱማ ዎርዣ ካንታ ማቂኖ ኣሳን ታማርሲዴ ዎይልን ኣሳን ዬሱሳ ባር ኣማንዴ።