41. ጾሳዲ ዬሱሳ ዓይቃ ጋርታፖ ዲንዴ

ዎታዴራን ዬሱሳ ሶቲኖፖ ዎሃ ኣማንባሶ ኣይሁዳን ቲኒዛን ጲላጦሳኮ «ይ ናሳ ማቃ ማቂዛ ዬሱሲ ዓይዚ ቃማፖ ዎሃ ዓይቃ ጋርታፖ ዲንዲሬ ጌይኔ ኢ ታማራን ኣህን ዉቃካይፌን ዓይቃ ጋርታፖ ዲንዲዴ ጋካይፌን ኤራንዳቦ ፌቲ ኣስ ጎርን ናጋንዳቦ ኮሽሬ ጌይዴ።

ጲላጦስ «ፔቲ ፔቲ ዎታዴራን ኤካሪ ጎሪን ይንታብ ዳንዳኢንቲኖንዲፌን ናጋምፔን ዎቲብቴ» ጌይዴ። ይኮታቦ ጎርን ጋርታ ጌላዝ ካሪን ጋልዳ ሹችን ጋልዳ ማይቴማ ጋዳሪ ኣህን ኦናካ ዉቃካይፌን ኤራንዳቦ ኢና ዎታዴራንስ ኣቂስዴ።

ዬሱሲ ሶቲንቲኖፖ ዎሃ ዎ ቃምንዳ ሳንባታ ኣይሁዳን ይና ኢዝ ቃምባራ ጎሪን ጋርታ ሉካንቦ ዳንዳኢባሴ ይኮታቦ ሳንባታ ቃምንፖ ዎሃ ጌሺ ጌላፋ ዎይልን ማጫን ኢ ኣይሺን ጋልዳ ጉጃ ሺታ ፋቻንዳቦ ዬሱሳኪ ጎሪን ጋርታ ሉካንዳቦ ጊጊነቲዴ።

ኢንቲ ኣባካር ቆፓካይዶን ጴች ሳዚ ኤንኢዴ ዜልንፌን ፎኢዛ ኪታንቾ ኣፋፎ ቤንቲዴ ጎሪን ጋርታ ጌላዝ ካርን ካጚኖ ሹችን ፊርሳሪ ኢዚ ጋልዳ ዶኢዴ ጎሪን ናጊዛን ዎታዴራን ኢጫሪ ዓይቂኖ ኣሳን ፌን ማቃሪ ሳዛ ጋልዳ ኬዲዴ።

ማጫን ጎርንኮን ዬልምባራ ኪታንቻዲ ኢንፍታኮ «ኢጫፒቴ ዬሱሲ ዓይዲ ባዬ ኪን ዲንድሬ ጋሪ ሶልኖዲፌን ዓይቃ ጋርታፖ ዲንድኔ ጎርን ኮሺንቻር ቤቂቢቴ» ጋር ሶልዴ። ኣህንዳ ኢና ባዬ።

ኢናፖ ኪታንቻዲ ማጫንኮ «ሉካሪ ዬሱሳ ዓይቃ ጋርታፖ ዲንድኔ ይንታፖ ቲንታር ጋልላ ሉኪሬ ጋር ኢ ታማራንቦ ሶልብቴ» ጋር ሶልዴ።

ማጫን ኢቺባርኬ ማ ዎይልን ኡፋይስ ባር ኩሚዴ ይና ኮሽ ሶልንዳ ኢ ታማራንቦ ሶላንዳቦ ዎባር ሉኪዴ።

ማጫን ይና ኮሽ ሶልን ኢ ታማራንቦ ሶላንዳቦ ሉኪሙታ ዎዶን ዬሱሲ ኢንታባር ቤንቲዴ ኢንታሬ ኢብ ማኪቲዴ ዬሱሲ ኢንታኮ «ኢጫፊቴ ጋሊላ ሉኪኖን ኢ ታማራንቦ ሶልብቴ ኢና ታና ቤቂሬ» ጌይዴ።