42. ዬሱሲ ፉዳ ኣፋ ማቂዴ

ዬሱሲ ዓይቃ ጋርታፖ ዲንድኖ ቃምን ኢ ታማራን ጋርታፖ ናምኣም ኢና ላፊ ጋልዳ ካታምን ጋርታ ሉኪሙታ ዎ ሉካዝምባራ ዬሱሳ ጋልዳ ዬልኖ ባዝን ሶልንቲዴ ኢያሬ ማሳ ማቂኖን ታስፋ ጋዲኔ ዎቲናካሬ ዚቃንታ ኢ ዓይቂዴ ዓቲ ማጫን ማቃር ሼምፓ ባር ማቂኔ ጌይዴ ናምኣን ኢ ታማራን ኣማናንዳቦ ኮሻዝ ባዝን ኤራካዬ።

ዬሱሲ ኢንታኪ ኡካሪ ኢንቲባር ዎልኣ ዬ ኤዴ ዎቲናካሬ ኢንቲ ኢያ ኤራካዬ ኢንቲ ኣብዝ ጎይ ሶልንቲሙታ ዎኮ ኢንታ ኦይጪዴ ኢንታሬ ዝቃንታ ኣኖ ሳምንታ ጋርታ ዬሱሲ ፌኖ ጋልዳ ዎቲንቶኖ ጋራምስዝ ባዛን ዎይ ሶልዴ ሩሳሌማ ማቂኖ ባዛን ኤርባሶ ዛቃባር ሶልዛዲፌን ቆፒዴ።

ኢናፖ ዬሱሲ ማሳ ጎይ ጾሳ ቃላ ሶልኖን ኢንታብ ብላር ሶልዴ ማሳ ሜታ ኤካዝንዶ ዎንታዝንዶ ዎቲናካሬ ዓይዝ ቃምባር ዲንዳዝንዶ ናባን ሶልኖ ሶልኖ ባዛን ኢንታብ ኤልቂ ዎቲዴ ናምኢ ኣሳን ኣቃንዳብ ቆፒኖ ካታምን ዬላሪ ሳዝን ቃማንዳብ ዬሊንዶን።

ናምኢ ኣሳን ፌ ባር ኣቃምፔን ኢብ ሶልዴ ኢያር ኢንታ ሶልን ሲሲካሪ ኤኤ ጌይዴ ዎልኣ ኢራታ ሞንዳቦ ጊጊንቲኖ ኬልባራ ዬሱሲ ኡፊን ዲንሪ ጾሳ ጋላቲዴ ኢናፖ ዳሪስዴ ኢንቲ ኢናፖ ኢ ዬሱሳ ማቂኖን ኤሪዴ ዎቲናካሬ ኔ ይና ኢዝባራ ኢ ኢንታ ኣፊን ጋልዳፖ ጌምቲዴ።

ናምኢ ኣሳን «ዬሱሳ ጾሳ ቃላ ኑብ ብርቻዝምባራ ኑቡዲን ጋርታ ምቻዝንዳሪ ዓኒ ኮታቦ ዎሎልኣ ይዝ ጌይዴ ኤልባራ ሩሳሌማ ማቂዴ ዬሊኖ ኬልምባራ ኢ ታማራንኮ «ዬሱሲ ፋጺኔ ኑኒ ኢያ ቤቂዴ» ጋር ሶልዴ።

ኢ ታማራን ሶልንቲሙታ ዎ ኪልን ጋርታ ዬሱሲ ኢንቲ ጊዳ ቤንታሪ «ሳርቲ ይንታብ ማቆ» ጌይዴ። ኢ ታማራን ኣባኪ ኢንታኪ ኣያና ማይጺዴ ዎቲናካሬ ዬሱሲ ኢንታኮ «ኣባቢ ኢጪራ፤ ኣባቢ ሲራ ቴ ኩሻንኬ ቶሃን ቤቂብቴ ኣያኖ ቴፌን ጋሊ ኢብ ባዬ» ጌይዴ። ኣያና ማቃካዮን ኤራንዳቦ ሙይዝ ባዝ ፌብ ኢማምፔን ኢንታ ኦይጭዴ ኢንታሬ ሚችኖ ሞላ ፌታን ዱ ኢምን ሙይዴ።

ዬሱሲ ኢንታኮ «ጾሳ ቃላ ጋልዳ ቴ ጎይ ጻፊንቲኖ ባዛን ዎይ ፎቲንቲሬ ጋራ ሶልኔ» ጌይዴ። ይና ኢዝባራ ጾሳ ቃልን ኢንታብ ጌልምፔን ኢንታ ቡዲን ፊሪቂዴ «ማሳዲ ሜታ ኤካዝንዶ ዓይቃዚንዶ ዓይዚ ቃምባር ዓይቃ ጋርታፒ ዲንዳዝንዶ ጋዝን ጻፊንቲኖፖ ዎይልን ላይ ጋምኢኔ» ጌይዴ።

ማ ማጻፋ ጋልዳ ኢንታ ናጋሪን ኢንታብ ኣቶ ጌይንታምፔን ኣሲ ዎይ ማርቲ ጌላምፔን ኢ ታማራን ሶላዚዳ ጻፊንቲኔ ኢንቲ ሩሳሌማፒ ኤሪ ዓኖ ዎቲሬ ኢናፖ ዎይ ቤሲ ዎርዣ ኮች ዎይ ሉኪሬ ኢንታ ባዛን ይንቦ ማርካ።

ዓኒፖ ጌዳ ኦይዲ ታጳ ቃሚ ዬሱሲ ዎይልን ቶህ ፌ ታማራንቦ ቤንቲኔ ፔቲ ቶህ ኢሽን ጼታፖ ሺዝ ኣሳንቦ ፔቲ ቶህ ቤንቲኔ ሼምፓ ባር ማቂኖን ዎይልን ጎይ ባራ ፌ ታማራንቦ ኤርንቲኔ ጾሳ ካቲቲ ጎይ ኢንታ ታምርሲዴ።

ዬሱሲ ፌ ታማራንኮ «ሲልጣና ዎይ ኣፋሬ ሳዳሬ ታብ ኢምንቲኔ ይኮታቦ ሉካሪ ኣምናካዮ ኣሳን ዎይ ባባ፤ ናኣ፤ ጺላ ኣያና ሱም ባር ጻማቂ ሙታ ኪቲኖ ባዛን ዎይ ዎታምፔን ታማርስሙታ ቴ ታማሪ ማሂብቴ ታኒ ዎይ ጋላስ ይንታባር ዶኣዝን ቆፒብቴ።

ዬሱሲ ዓይቃ ጋርታፖ ዲዲኖፖ ኦይዲ ታጳ ቃማፖ ዎሃ ፌ ታማራንኮ «ጺላ ኣያና ይንቲ ጋልዳ ዬይኖ ኬልባራ ታባብዲ ዎልቃ ይንታብ ኢምዝ ዲራስ ሩሳሌማ ጋምኢብቴ» ጌይዴ። ኢናፖ ዎሃ ዬሱሲ ፉዳ ኣፋ ኬሲኪዴ ሻሮ ዬሪ ኢንታ ኣፊን ጋልዳፖ ጌምዴ ዬሱሲ ኮችንቲ ዎይ ኣቂሳንዳቦ ጾሳቦ ኡሻቺ ጎይ ዶኢዴ።