4. ጾሳዲ ኣብራሃማብ ጌልኖ ጫቃ ቃላ

ይሳ ዋን ኣን ዎይሊን ላይፖ ዎሃ ዎርዣን ሳዝ ኤሻ ጋልዳ ማቃር ዎይሊዴ።ዎይንፔቲ ኖና ሶሊሬ።ጾሲ ኢንታ ኪቲኖንዲፌን ሳዛ ጋልዳ ዎይላዚምፖ ሺ ዎልኣ ፔታን ማቃር ሺቃሪ ካታማ ኤሲዴ

እንታሬ ዎይሊን ኦቲርቂዛን ጾሲ ሶሊኖ ባዛን ናጊባሴ ይፓር ኣሪ ፉዳ ኣፋ ዬላንዳቦ ጳሪን ኬ ኬጺ ኤዴ።ጾሳዳሬ ዓን ኣሳን ኢት ኦዚንዲኬ ጌዳ ኦሙታ ዶኣዚን ቤቂዴ።ዓኒፖ ሺ ኢታ ናጋራ ኦንዳብ ዳንዳኢሬ።

ዪኮታቦ ጾሳዲ ኢንታ ኖኒን ዱማ ዱማ ኖናባር ቡሻሪ ዎርዣ ዎይ ሳዝ ኤሻ ዎይ ጋልዳ ላልዴ።ኢንቲ ኦንዳብ ኤኖ ካታሚን ሱምንዳ ባብሎና ጋይንታሬ።ኢዝ ሱምን ቢርሺቺንዳ ቡሺንቲኖዳ ዎይ ማላጋምኖዳ ጌንቴ።

ፔቲ ጼታ ላይፖ ዎሃ ጾሳዲ ኣብራማ ጋይዛ ናሳቦ ሶሊዴ።ጾሳዲ ኢኮ ኔ ጋዲንዲኬ ኔ ኣሎ ኣሳን ኣሻራ ቴ ኔና ቤይሲኖ ቤሲን ሉካቤ።ኢና ቴ ኔና ኣንጃንዳ,ቴ ኔና ዎይሊ ዎርዣ ማሃዳ,ኔና ኣንጂዛ ቴ ኣንጃንዳ ኔና ባዲዛን ቴ ባዳንዳ ኔ ጎይባራ ሳዛ ጋልዶ ኣሲ ዎይ ኣንጂንቲሬ።

ኣብራማሬ ጾሳቦ ኪቲንቲዴ ፌ ማጪን ሳሪኬ ፌ ኣሽካራን ዎይኬ ፌ ቆሊንን ዎይ ኤካሪ ጾሲ ኢያ ቤይሲኖ ቤሲን ካናና ጋዳ ሉኪዴ።

ኣብራሚ ካናና ዬሊን ጾሲ ኢኮ«ኔ ቡጊዲባር ዎን ዎይ ቤቃቤ ኔ ቤቂዛን ሳዚን ዎይ ኔብኬ ኔ ዜርንብ እማሬ» ጌይዴ። ኣብራማሬ ሳዝ ጋልዳ ዶኢዴ።

ፌት ቃሚ ሜልኬ ጼዴቅ ጌይንቲኖ ቻ ጾሳ ቄሳን ኣላቃ ዬሊዴ። ሜልኬ ጼዴቃሬ ኣብራማ ኣንጂዴ ማ«ኣፎ ሳንብኬ ሳዶ ሳዝንቦ ጎዳ ጾሳ ቻዲ ኣብራማ ኣንጆ» ኣብራማሬ ዎዾን ዎይን ጋልዳፎ ኣሲራታ መልኬ ጼዴቃብ ኢሚዴ።

ዎይሊን ላይ ኣናካሬ ኣብራማኬ ሳርኬ ዓታር ናኤቤይ ዶኢንዶኒ ጾሳዲ ኣብራማቦ ማቃር ታስፋ ኢሚዴ ናኢ ኢብ ኢማዚንዲኬ ኢ ዜር ኣፋ ቤርስፌን ዎይላዚን ሶሊዴ።ኣብራማሬ ጾሲ ኢብ ኢሚኖ ታስፊንባር ኣማኒዴ።ኣብራማሬ ጾሳ ኢብ ኢሚኖ ታስፊምባር ኣማኒኖኮታቦ ኢብ ጺላ ማቃር ፋይዲንታዴ።

ጾሳዳሬ ኣብራማባራ ጫቃ ቃላ ጌሊዴ ጫቃ ቃሎ ናምኢ ኣሳን ጊዳጋርታ ዎልኣ ዶሳር ዎቲዝ ባዜ ጾሳሬ ኣብራማኮ«ቴ ኔጋርታፖ ኔብ ናኢ ኢማንዳ»ጌይዴ«ኔ ዜርንቦ ኬናና ሳዚን ኢማንዳ ኣብራም ዎቲናካሬ ዪና ኢዝ ኬልምባራ ናኢ ባይዶን ጋምእኔ።