3. ይስ ዋ
ዎይልን ኬላፖ ዎሃ ዎይልን ዎሪዦ ሳዝ ኤሻ ጋልዳ ዎ። ኢንታሬ ዎይልን ኢትኬ ዎልቃማ ማቅዴ ኢቲቲሬ ዎይልን ዎይልሙታ ዬይኖ ኮታቦ ጾሳዲ ሳዝ ኤሺን ዎይ ይስዝ ዋባር ይሳንዳ ጋዪ ጊጺ ዲንዲዴ።
ኖሂ ጾሳ ቲን ቦንች ዲዴ።ኖሂ ፌ ዶኣዝ ላይን ጋርታ ዎ ኣሳን ዎይንፖ ሺ ጺላኬ ኢት ኦዝባዝ ጋልዳፖ ጎቲኖ ኣሴ።ጾሳዳሬ ይሳ ዋን ሚሻንዳብ ቆፒኖን ኖሃብ ሶሊዴ።ኖሂ ጴች ጎ ኦምፔን ጾሳዲ ኢብ ሶሊዴ
ጾሳዳሬ ኖሂ ጎ ኦምፔን ሶሊዴ።ጎንዳሬ ናምኢ ጼታኬ ላማካይ ታጳ ዋ ጳርን ጌዳኬ ዓኒክ ኦይዲ ታጶ ሌሂዋ ዳልጊ ማ ላምታም ታብዛ ዋ ፉዳ ሾኪ ጌይኖ ማቃጋቤ ጌይዴ።ኖሂ ኦዝ ጎንዳ ሚባር ኦኖ ማቃራ ኢዛ ዓይዝ ፖቃ ዎይልን ክፊላ ኣፎ ኬማስቶታ ካራ ዎ ኬ።ጎንዳሬ ኖሂኬ ኢ ኣሎ ኣሳን ሳዛ ጋልዳ ዎ ዎይ ባዝ ሜሃ ጋይዛ ዎይ ይሳዋንዳ ናጋምፔን ሶሊዴ።
ኖሃሬ ጾሳቦ ኪቲንታሪ ጾሲ ሶሊኖንዲፌን ኖሂኬ ኢ ናኣን ዓይዛን ጎን ኦዴ።ጎንዳ ዎይሊን ጴች ማቂኖኮታቦ ኦ ዉርሳንዳቦ ዎይሊን ላይ ዉርሲኔ።ኖሂ ይሳ ዋን ዬዚን ዎርዣቦ ሶሊሙታዶሪ ኢንቲ ጾሳኮ ማቃምፔን ሶሊንዶኒ ኣሳን ሲሳካዬ።
ጾሲ ኖሂኬ ኢ ኣሎ ኣሳን ኢንታብ ጊዲዝ ፊሺ ፌባኪ ሜሃንቦ ሺሻምፔን ኪቲዴ ዎይ ባዚ ጊጊኖፖ ዓኒ ጎን ጋርታ ጌላምፔኒ ኖሂቦ ኢ ማጪምቦ ኢ ናኢ ኣቲና ዓይዛንቦ ማ ኢንታ ማጫንቦ ኬሊን ዬሊኖን ሶሊዴ።ላማካይ ኣሳንጎን ጋርታ ጌሊዴ።
ጾሲ ይሳ ዋን ጋልዳፖ ናጋምፔን ዎይ ባዝ ጋርታፖ ማጫኬ ኣቲናክ ሜሃ ማ ካፋንር ጉጃር ኖሃክ ሚሺዴ።ዣርሻቦ ማቃምፔኖ ታብዛ ማጫኬ ታብዛ ኣቲና ዎ ኮች ሜሃ ኖሃክ ሚሺዴ,ዎይን ጎን ጋርታ ጌሊኖፖ ዓኒ ጾሲ ፌብ ጎን ካሪን ይብጺዴ።
ኢናፖ ዓኒ ኢሪን ኬዲ ኤዴ።ኢሪን ኬዳ ኬዳ ሻካይ ሙታ ኦይዲ ታጳ ጋላስኬ ቃምኬ ኬዳዴ ሳዳፓሬ ቱታ ኬስኪዴ ሳዝ ኤሻ ጋልዳ ዎ ባዚ ዎይ ዋ ካዴ,ጴች ኢንዳንር ኣታካይዶን ዋ ካዴ።
ን ጋርታ ዎ ኣሳንኬ ሜሃንፖ ኣቲን ሳዛ ጋልዳ ዎ ባዚ ዎይ ዓይቂዴ።ጎንዳሬ ዋ ጋልዳ ኣፋ ፋጎላራ ኢዝ ጋርታ ዎ ሼምፓባሮ ባዚ ዎይ ዓይቃ ጋርታፖ ፋዴ/ቡቲሳዴ
ኢሪን ኬዳዚን ሻኖፖ ዓኒ ጎንዳ ኢሺን ኣጋን ማቃምፔን ዋ ጋልዳ ኣፋ ጋምኣዴ።ይና ኢዝ ኬልምባራ ዋንዳ ዲሪ ጉጻሙታ ዬዴ። ፔቲ ቃም ጎንዳ ኢንዲን ሲንን ጋልዳ ዶኣዴ። ማቂናካሬ ሳዝ ኤሺንዳ ዓታር ዋባር ካንቲኔ።ዓይዚ ኣጋናፖ ዎሃ ኢንዲን ሲንሲን ቤንቲ ኤዴ
ኦይዲ ታጳ ቃማፖ ዓኒ ኖሂ ዋን ሳዛ ጋልዳፖ ሚጪኔኮ ቤቃምፔን ቁራ ጋዝ ካፊን ሚሺዴ። ቁሪንዳ ዓያሬ ጌዳሬ ፋራር ቢርንቲ ቤቃምባራ ሜሊኖ ሳዝ ኮያር ዲንዳብ ዳንዳኣካዬ።
ዎሃፖ ኖሂ ዶላ ጋዝ ካፊን ሚሺዴ።ማቂናካሬ ኢዛ ሉካራ ዶኢዝ ሳዝ ዲንዳብ ዳንዳኣካዮ ኮታቦ ኖሂክ ማቃር ዬዴ።ማ ታብዛ ቃም ዶኢኖፖ ዓኒ ኖሂ ማቃር ዶሊን ሚሺዴ።ኢዛሬ ዎይራ ጋዝ ሚን ዋይን ፌ ኖኒን ጋርታ ኤካር ማቃዴ ዋንዳሬ ዲሪሙታ ዎኮታቦ ማታር ፉዲ ኤዴ
ኖሂ ሜላ ፔቲ ሳሚንታ ጋምኣሪ ዶሊን ዓይዝ ጎይ ሚሺዴ፤ይና ኢዝኬልምባራ ኢዛ ሼምፒዝ ቤስ ዲኖኮታቦ ማቃ ዬካይ ኣታዴ፤ዋንዳሬ ሜላሙታ ዎ
ናምኢ ኣጋናፖ ዎሃ ጾሳዲ ኖሂኮ ኔኒ ኔ ኣሎ ኣሳንኬ ሜሃን ዎይ ጎን ጋርታፖ ኬስኪብቴ ጌይዴ።ኢ ዳባን ጎን ጋርታፖ ኬስኪዴ።ዎዪልን ናኣንኬ ኢ ናኣናኣን ዬሊዴ ሳዚን ኤሺን ኩሚዴ።
ኖሃሬ ጎን ጋርታፖ ኬስኪኖፖ ዓኒ ካሻቤስ ኮቻሪ ዱማ ዱማ ሜሃን ጋርታፖ ዣርሽብ ማቃንዳብ ዳንዳኢዛንጾሳቦ ዣርሻ ሺሺዴ።ጾሳዳሬ ኢ ሺሺኖ ዣሪሺምባራ ኡፋይታር ኖሂኬ ኢ ኣሎ ኣሳንኣንጂዴ።
ጾሳዳሬ«ኣሳን ኦዝ ኢታ ባዛንቦ ዎሃ ማቃር ባዳካዮዲፌን ታኒ ቃላ ጌላሬ።ኣባካር ማቂን ኣሳን ፌ ናኣቲፖ ኤር ዎርዳ ማቂናካሬ ሳዝ ኤሺን ማቃር ይሳ ዋባር ይሳባሴ»ጌይዴ።
ጾሳዲ ፌ ጫቂን ማላ ማቃምፔን ቲኖ ዙሊን ኦዴ።ዎይ ጋላስ ዙሎ ኣፋ ቤንቲሬ።ጾሳዲ ይና ዙሊን ጎይባራ ዎርዣቦ ጌሊኖ ጫቂን ቃሊን ኤልቅ ዎቲሬ/ቦቲባሴ።
ጌሻ ማጻፋ ጋልዳ ኮችንት ማጻፋ 6-8
Free to use, adapt, and share under an open license (CC BY-SA 4.0).