5. ታስፋ ናኢ

ታጳ ላይፖ ዎሃ ኣብራማኬ ሳርክ ካናና ዬሊዴ።ዪኖ ዬላዚምባራ ናኢ ኢንታብ ባዬ። ዪኮታቦ ኣብራም ማቻ ሳራ ዪዝ ጋዴ«ጾሲ ናኢ ኑብ ዶኣካይፌን ካይኖ ኮታብኬ ታናሬ ጪኖኮታቦ ታ ኣሽካሪን ኣጋራ ዓኒሼ ኢዞ ኤካቤ ታቦ ናኢ ዬላጋቤ»ጋዴ።

ማቂኔካሬ ኣብራሚ ኣጋራ ኤኪዴ።ኣጋራሬ ኣቲና ዬላዴ።ኣብራማሬ «ኢስማኤላ ጋይ ሱም ጋዲዴ፤ማቂናካሬ ሳራ ኣጋሪባር ጋሂታዴ፤ኢስማኤሊ ታጶ ዓይዚ ላይ ማቂን ጾሳዲ ኣብራማኮ ይዝ ጋይዴ።

ጾሳዲ ኣብራማኮ«ታኒ ኤልሻዳያ ጾሳ ታና ኔባራ ጫቃ ቃላ ጌላንዳ»ጌይዴ።ኣብራማሬ ፌ ዴሚንባራ ሳዛጋልዳ ጉፕ ጋይዴ።ጾሳዳሬ ኣብራማኮ«ኔኒ ዎይሊን ዎርዣቦ ባባ ማቃሬ።ካናና ሳዚንዶ ኔባኬ ኔ ዜርቦ እርስታ ማሃር ኢማንዳ፤ታናሬ ሜናብ ኢንታ ጾስ ማቃንዳ፤ኔናሬ ኔ ኣሎ ኣሳ ጋርታ ቤንቲኖ ኣቲና ዎይ ጋራዛቤ»ጌይዴ።

ጾሳሬ ኣብራማኮ«ኔ ማጪን ሳራ ኣቲና ዬላሬ ኢያሬ ታስፋ ናኣ ማቂሬ ኢ ሱምንዶ ይሳቃ ጋያ ጼጋሬ ቴ ጫቃ ቃሊንዳሬ ኢ ጋልዳ ጋድንዳ።ኢያሬ ዎይሊን ዎርዣ ማቂሬ።ኢስማኤላሬ ጴች ዎርዣ ማሃንዳ፤ማቂናካሬ ታኒ ጫቃ ቃላ ጌላዚንዳ ይሳቃባራ»ጌይዴ።ጾሳዳሬ ኣብራማ ሱምን «ኣብራሃማ»ጋይ ላሚዴ፤ኢዝ ብርሺቺንዳሬ«ዎይሊንንቦ ባባ»ጌንቴ።ጾሳዲ ሶሪ ሱምንዳሬ «ሳራ»ጋይ ላሚዴ።ኢዝ ብርሺቺንዳሬ«ዎይልንቦ ኢንዶ»ጌንቴ፤ጌይዴ።

ዪና ኢዝ ጋላሲን አብራሃሚ ፌ ኣል ዎ ኣቲናን ዎይ ቃሪሲዴ።ፔቲ ላይፖ ዎሃ ኣብራማቦ ፔቲ ጼታ ላይ ማቂን ማሳሪቦ ሳካሊታጶ ሳካሊ ላይ ማቂን ኣብራማቦ ኣቲና ዬላዴ።ጾሳሬ ኢንታክ ጌይኖንዲፌን ናኣ ሱም«ዪሳቃ»ጋዪ ጋዲዴ።

ዪሳቆ ዲጪኖፖ ዓኒ ጾሳዲ ኣብራማ ኣማኒን ፋጪ ቤቃንዳብ ኮያሪ ኢኮ፤«ኔ ናኣ ፔታና ኢያ ታብ ሹካራ ዣርሻ ዎታቤ»ጌይዴ፤ማቃሪ ኣብራሚ ጾሳቦ ኪቲንታሪ ፌ ናኣ ሹካንዳቦ ጊግንቲዴ።

ኣብራሃማኬ ዪሳቃክ ዎልኣ ዣርሻ ሹካዝ ቤሲን ሉኪርዶሪ ዪሳቂ ፌ ባባኮ «ኣባቦ ዣርሻኮ ሚ ዓዲሼ ዶራ ዎይዲ ዎ ? ጋር ኦይጪዴ ኣብራማሬ ኢኮ«ታ ናኣዶ ዣርሻ ዶራ ጾሲ ጊግሲሬ»ጋሪ ማሂዴ።

ዣርሻ ሺሻዝ ቤሲንኮ ዬላሪ ኣብራሚ ፌ ዪሳቃ ቃቻሪ ዣርሻብ ሹካዝ ቤሲን ጋልዳ ሱርሲዴ።ኣብራማሬ ፌ ናኣ ሹካንዳብ ማሺን ኤኪን ፤ጾሲ ኢኮ «ኣሻቤ ናኣ ጋልዳ ኢታ ባዝ ዬልፔ ኔ ታብ ኢጫዚንኬ ኔ ናኣ ፔታና ታብ ሱቂታካይኬ ታና ካያካዮን ታ ዓት ኤራዴ ጌይዴ።

ጌዳ ኢንታ ላፊን ጋልዳ ኣብራሚ ሻይዳ ጋርታ ቃቺንታር ዎ ዶሪ ቤቂዴ።ጾሲ ዪሳቃ ቤሲን ዣርሻብ ማቂዝ ዶሪ ጊግሲኔ።ኣብራማሬ ኡፋይስባራ ዶራዳ ዣርሻብ ሹኪዴ።

ጾሳዳሬ ኣብራማኮ«ኔ ናኣ ፔታናዳር ኣታካይዶር ኔብ ዎ ባዝ ዎይ ታብ ኢማንዳብ ኮይኖኮታቦ ቴ ኔና ኣንጃንዳቦ ቃላ ጌላሬ።ኔ ዜር ኣፎ ቤርሳፖ ሺ ዎይሊሬ ታብ ኔ ኪቲንቲኖ ኮታቦ ሳዝ ኤሻ ጋልዳ ዎ ዎርዣ ዎይ ኔ ጎይባራ ኣንጂንቲሬ።»