39. ዬሱሲ ፊርዳብ ሺቂዴ

ዓት ኬላዲ ጊዲብላሃ ቄሳ ኣላቃ ኦይጫምፔኒ ዎታዳራን ዬሱሳ ቄሳ ኣላቃን ኦል ኤጚዴ። ጴጥሮሲ ጎቲባር ኢ ዎሂን ዬሬ ዬሱሲ ኣል ኬ ጌልሳሪ ጴጥሮሲ ዛናዶሪ ታማ ካሽኪሬ።

ኬ ጋርታ ኣይሁዳን ቲኒዛን ዬሱሳ ፊርዳብ ሺሺዴ ኢጎይባር ማቂባር ዎይሊን ዎርዳ ማርካን ኤሄይዴ ማቂናካሬ ኢንታ ቃላዲ ዎልዎልኣ ሳማማኣካዬ ይኮታቦ ኣይሁዳን ትኒዝ ዬሱሳ ዎይ ባዝባር ዎርዳ ማቂኖን ኤራንዳብ ዳንዳኣካዬ።

ዉርስ ጋልዳ ቄሳ ኣላቃን ዬሱሳ ኮሺንቺ ቤቃሪ ኑብ ሶላቤ ኔኒ ማሳዲያ? ዎይን ዳንዳኢኖ ጾሳ ናኣ? ጌይዴ።

ዬሱሲ «ኣዓ» ኢፓሬ ጾሳባር ዎልኣ ዶኣራ ታ ኣፋፖ ዬዚምባር ኔ ቤቃሬ» ጌይዴ። ኤቅሳ ኣላቃን ጎይልባራ ኣፊልን ዳርሳሪ ሜላ ሃይማኖታ ቲኒዛን «ሜላ ጉጃ ማርካ ኮይሲባሴ ቴ ጾሳ ናኤ ጋዝን ይንቲ ሲሲኪኔ ይንቲ ኣብዝ ጌይ ፋራዲራ? ጋር ዉይሲዴ።

ኣይሁዳን ቲንዛን ዎይ «ዓይቃ ኢብ ኮሺሬ» ጋር ቄሳ ኣላቃንቦ ማሂዴ ኢናፖ ዬሱሲ ኦፊን ቃቻሪ ኢ ጋልዳ ጩታሪ ቡካሪ ኢ ጋልዳ ቃላዲዴ።

ጴጥሮሲ ኬምፖ ዛና ናጋ ጋልዳ ዎዶን ኣሎ ጋራ ማቂኖ ናኢን ቤቃራ «ኔናሬ ማ ዬሱሳባራ ዎባያ » ጋዴ ጴጥሮሲ ኢዛ ሶልኖን ማልቲቲዴ ኢናፖ ዎሃ ሜላ ኢና ኣል ኦዝ ናኢንዳ ዎኖን ኢዞ ሶላዴ ጴጥሮሳሬ ማቃር ማልቲቲዴ። ዉርሲ ጋልዳ ዎርዣዲ «ይንቲ ናምኣን ጋሊላ ጋዳፖ ማቂኖ ኮታቦ ኔኒ ዬሱሳባሮ ኣስ ማቂኖን ኑ ኤሪሬ።

ኢናፖ ጴጥሮሲ «ዓናሳ ቴ ኤራዚንዲፌንኮ ጾሳ ጎይላ ታብ ማቆ ጋር ጫቂዴ ኤልባራ ኩቶ ኦልዴ ዬሱሳሬ ቢርንታሪ ጴጥሮሳ ቤቂዴ።

ጴጥሮሲ ሉካሪ ሲክ ሲክ ዬኪዴ ይና ይንፌን ዶኣምባራ ዬሱሳ ኣሪ ኢምኖ ይሁዳ ኣይሁዳን ቲኒዛን ዓይቃምፔን ዬሱሳ ጋልዳ ፋርዳምፔን ቤቂዴ። ይሁዳሞርኢባር ኩማሪ ሉኪዴ ፌና ዎዴ።

ኢዝ ዎንን ጌላፋ ኣይሁዳን ቲኒዛን ዬሱሳ ሮማ ጋዲን ኣቂስኖ ጲላጦሳክ ኤሄይዴ። ጲላጦሲ ዬሱሳ ኔ ኢሲኔ ጋርፋራዳንዳቦ ዓይቃንርዳብ ኮሺሬ ጌይሬ ጋሪ ታስፋ ጋዲዴ። ጲላጦሲ ዬሱሳኮ «ኣን ኔ ኣይሁዳ ካታ?» ጋር ኦይጪዴ።

ዬሱሲ ኢኮ «ኔ ጋዶኬ ዎቲናካሬ ታ ካቲቲንድዳ ሳዛጋልዳ ካቲቲ ባዬ። ማ ይዲፌን ማቂኒኮ ታ ኣሽካራን ቴ ጊሻብ ኦልንቲርዶን ጾሳ ጊሻቦ ኪንን ሶላንዳቦ ሳዛ ጋልዳ ቴ ዬይኔ ኪንን ካዛዲ ዎይ ታኮን ሲሲኪሬ» ጲላጦሲ «ኪንን ኣብዛ?» ጌይዴ።

ጲላጦሲ ዬሱሳባር ሶልንቲኖፖ ዎሃ ዎርዣኮ ኬሲካሪ «ዓ ናሳ ጋልዳ ታኒ ኣባካር ኢታ ባዝ ዲጛካዬ» ጌይዴ። ኣይሁዳን ቲኒዛንኬ ዎርዣዲ ሶታቤ ጋሪ ዉይሲዴ ጲላጦሲ ኢንታኮ «ኣባካር ኢሳካዬ ጋሪ ይንታብ ማህዴ። ኢንቲ ጉጃር ቲኖምፓ ሺ ዉይሲዴ። ኢናፖ ጲላጥሲ ዓይዚ ቶህ «ኢ ጋልዳ ኢታ ባዚ ባዬ ጌይዴ።

ጲላጦሲ ዎርዣዲ ዋይዝዳ ጋር ኢጪዴ ይኮታቦ ዬሱሳ ሶታምፔን ዎታዳራን ኪቲዴ። ሮማ ጋዶ ዎታዳራን ዬሱሳ ጋራፋሪ ዞቃ ኣፊላ ማኢሲዴ ይፓሬ ኣጚባር ኮቺኖ ባርኔጻ ኢ ቆማ ጋልዳጋዲዴ ኢናፖ ዓዲሼ ኣይሁዳ ካታዲ ጋሪ ኢባር ቃልዲዴ።