2. ናጋሮ ሳዛ ጋልዳ ጌልዴ

አዳማኬ ማጪንዲኬ ጾሲ ኢንታብ ቶኪኖ ዱጪን ጋርታ ዶኢዶሪ ዎይልን ኡፋይስባር ዎዼ። ማ ኢንቲ ዎልኣ ካላ ዎዼ ማቂናካሬ ኢንቲ ካላ ዎዾንዳ ኢንታ ዬልባሴ፤ ኣባ ጌይን ናጋሮ ሳዛ ጋልዳ ባዬ። ኢንታሬ ፌ ዱጫ ጋርታ ብርንቲ ሙታ ጾሳ ባር ሶልቲሬ።

ዎቲናካሬ ውጫባሮ ሾሻዲ ዱጪን ጋርታ ዎዼ። ኣሲንዳር ኦይጪዴ «ጾሲ ኪንባራ ዱጪን ጋርታ ዎዾ ሚ ኣፋን ዎይ ሞፒቴ ጌይና?» ጌይዴ።

ኣሲንዳሬ «ጾሲ ኢቲንዲኬ ኮሺንዲኪ ኤርሳዝ ኤራ ሚምፖ ኣቲን ሜላ ሚ ዎይ ኣፍ ጋልዳፖ ሞንዳብ ዳንዳኣዚን ሶልኔ። ዎቲናካሬ ኢዝ ኣፍን ሙይጌንዶ ዎይ ዎሼጌይናሬ ዪንቲ ዓይቂሬ ኑክ» ጌይኔ።

ሾሻዳሬ ኣሲንኮ «ዪ ኪን ጊዳካዬ ዪንቲ ዓይቂባሴ ዪንቲ ኢዝ ኣፊን ጋልዳፖ ሙዬጌይንዶ ዪንታ ኣፊን ቤቃ ኮሺንዲኬ ኢቲን ኤራሪ ጾስ ፌን ማቃዚን ጾሲ ኤራዛኮታቦ ዪንቲ ሞፒቴ ጌይኖንዳ»ጌይዴ።

ኣሲንዳሬ ሚን ኣፊንዳ ሞንዳብ ኮሺ፤ማ ቤቂን ኡፋይሳሪ ኤራ ዲጛንዳ ዳንዳኢስዛ ማቂኖን ቤቃራ ኣፊን ጋልዳፖ ኤካር ሞዴ ፌ ባር ዎዾ ፌ ኣሲናባር ኢማዴ ኢያር ሚን ኣፊን ሙይዴ።

ኤልባራ ኢንቲ ናምኣን ኣፊን ቤቃዴ ።ኢንቲ ካላ ማቂኖን ኤሪዴ።ፋሻ ኤካር ኣፊላፌን ሲካር ፌ ካሊን ካጚዴ።

ናሳዲኬ ኢ ማጪንዲኬ ጾሳ ቆ ዱጫ ጋርታ ብርንቲርዶር ሲስካሪ ዎይን ጾሳ ቲናፖ ባይዴ።ጾሳዲ ኣዳማ ጼጋሪ ኔ ዎይዲ ዎዻ?ጌይዴ።ኣዳማሬ «ኔኒ ዱጫ ጋርታ ብርንታምባራ ሲስካዴ,ታኒ ካላ ማቂኖን ኮታቦ ኢጫራ ባያዴ ጋሪ ማሂዴ።

ጾሳዳሬ ኢኮ «ኔ ካላ ማቂኖን ኦ ኔብ ሶሌ?ኢዝ ጋልዳፖ ሞፔ ጌያ ኪቲኖ ሚን ሙዪ?ጌይዴ።ኣዳማሬ ዓና ታባር ዶኣምፔን ኢሚኖ ማጪን ኢዛ ሚን ኣፊን ታብ ኢሚን ሞዴ ጌይዴ ።ማጪንዳሬ ኣሽ ዓና ኔ ዎቲኖንዳ ኣብዛ ጌይዴ።ኢዛሬ «ሾሺ ታና ባሊን ቴ ሞዴ»ጋዴ።

ጾሲ ሾሺንኮ ይዝጌይዴ «ኔኒ ባ̈ዲንቲኔ ኔ ሚልባር ዬቤ ሳዝ ሞቤ ኔናኬ ኣሲንዲኬ ዎልኣ ጎይል ማቂብቴ ኔ ናኣንኬ ኢዝ ናኣንባራ ዎልኣ ጎይል ማቂሬ ኣሲን ማጪን ኮቻን ኔ ቆሚን ቡካጋቤ ኔናሬ ኢንታ ቶሂን ቃቤ»።

ጾሲ ኣሲንኮ «ኔ ዬላዝምባራ ዋያ ኔብ ዎልሳንዳ ኔ ባዚ ዎይ ኔ ኣሲና ጻና ማቆ ኢ ኔፖ ሾክ ጌይኖ ማቆ ጋቤ»።

ጾሳሬ ኣዳማኮ «ኔ ማጪን ሶላ ሲስካራ ቴ ኔና ሞፔ ጋራ ኪቲኖ ሚን ኣፊን ሙይኖ ኮታቦ ሳዚንዳ ባ̈ዲንቲኔ።ኔ ዶኣዝ ላይን ዎይ ዋያባር ዶኣቤ ዋያር ሞቤ ኢናፖ ዓይቃሬ ኔ ሳዜ ኔ ሳዚንኮ ማቃሬ።ኣዳማሬ ፌ ማጪን ሼምፓባሮን ዎይንቦ ኢንዶ ዪኮታቦ ሔዋኖ ጌዪ ጼጊዴ ብርሺቺንዳሬ ሼምፓ ኢማሬ ጌንቴ፤ ጾሳሪ ሜሃ ጋማ ጋልዳፖ ኮቻር ማኢስዴ።

ጾሳሬ ኣሲ ኮሺንዲኬ ኢቲን ኤርዝ ጎይባራ ዓት ኑ ጋሪታፖ ፌታናዲፌን ማቂኔ ማ ዓቲ ሼምፓ ሚን ኣፊን ፌ ኩሺባራ ዱ ኤካር ሞካፌንኬ ሜናብ ዶኣካይፌን ኣዳማኬ ሄዋንክ ቆይሳዝ ዱጫ ቤስን ጋልዳፖ ኢንታ ኬሲኔ። ኢናፖ ሼምፓ ሚንኮ ኤጛዝ ጎይን ናጋንዳብኬ ኦናካሬ ይና ሼምፓ ሚን ዱ ሞካይፌን ዎልቃማ ኪታንቻ ዱጫ ቤሲን ጋልዳ ጋዲዴ።