29. ማርቲ ባዮ ኣይላ ታሪካ

ፔቲ ጋላስ ጴጥሮሲ ዬሱሳኮ «ኣስታማራዶ ቴ ኢሻ ታና ባላጌይን ኣፊን ቶህ ኢብ ኣቶ ጋኖ ? ዓጛር ታብዛ ቶህ ጋኒቤ ጋር ኦይጪዴ ዬሱሲ ኢኮ « ታብዛ ቶህ ጊዳካዬ ታብዛ ታጳ ታብዛ ጎይ ዶኬ» ጌይዴ ዬሱሲ ይኖ ጋዚንዳ ዎይ ጋላስ ኣቶ̇ ጋንዳብ ኮሺሬ ጌንት ኢናፖ ዬሱስ ይኖ ታሪኪን ሶልዴ።

ዬሱስ ኢንታኮ «ጾሳ ካቲቲዲ ፌ ኣይላን ናጊ ኣቂሳንዳብ ኮይኖኮታ ማይጻሬ ኢ ኣይላን ጋርታፖ ፔታናዲ ታጳ ሙኪላ ማቂዝ ሚስ ጴች ኣጫ ዎዲፌኔ።

ይ ኣይላዲ ኣጪን ጪጋንዳቦ ዳንዳኣካዮ ኮታቦ ካታዲ «ኣጪን ጪጋምፔን ይ ናሳዳ ኢ ኣሎ ኣሳን ዎጚብቴ» ጌይዴ።

«ኣይላዲ ካታ ቲን ፌ ቡቂምባር ቡቂንታር ኬዳር<ዋዴ ኔ ጊላ ጋርዢሼ ታጋልዳ ዎ ኣጪን ዎይ ቴ ጪጋንዳ ጌይዴ ካታዲ ፌ ኣይላቦ ሚጪንታሪ ኣጪን ዎይ ቁቺ ፋይር ሉካምፔን ኣሺዴ።»

ዎቲናካሬ ይ ኣይላዲ ካታ ቲናፖ ኬሲካሪ ኦይዲ ኣጋና ዳሞዛ ማቂዝ ኣጫ ዎ ፌ ላጋ ማቂኖን ኣይላን ጋርታፖ ፔታና ዲጚዴ ይ ኣይላዲ ፌ ላጋ ማቂኖ ኣይላ ኤዻሪ ቴ ኣጪን ታብ ጪጋቤ » ጌይዴ።

«ይ ኢ ላጋ ኣይላዲ ፌ ቡቂንባር ኢቲን ኬዳሪ ዋዴ ኔ ጊላ ጋርዢሼ ታጋልዳ ዎ ኣጪን ዎይ ቴጪጋንዳ ጌይዴ ዎቲናካሬ ይጊሻቦ ይ ኣይላ ኢ ላጋ ኣይላ ኢ ኣጪን ጪጊ ዉርሲዝ ዲራስ ቃሺ ኣል ጌልሲዴ።

«ሜላን ኣይላን ማቂኖ ባዚን ቤቃሪ ዎይልን ዋይዴ። ካታኮ ሉካሪ ማቂኖ ባዚን ዎይ ሶልዴ።»

«ካታዲ ፌ ኣይላ ጼጋር < ኣን ኔ ኢታ ኣይላዶ ኔ ታና ጌሺኖ ኮታቦ ኔ ኣጪን ቴ ኔና ማራዶኬ ኔናር ይና ኢፌን ዎታንዳቦ ኮሻርዶኬ »ጌይዴ ካታ ዎይሊን ጎይላሪ ኣጪን ዎይ ጪጊ ዉርሲዝ ዲራስ ይ ኢታ ኣይላ ቃሺ ኣል ጌልስዴ።

ኢናፖ ዬሱስ ኢንታኮ «ይንታ ጋርታ ዎይን ፌ ኢሻቦ ኣቶ ጋካይ ኣቴ ጌይን ይኒፌን ማ ኣፎ ቴ ባባዳ ኣቶ ጋባሴ።