30. ዬሱስ ኢሺን ሙኪላ ኣሳን ሙሲዴ።

ዬሱሲ ዱማ ዱማ ዎይልን ማንዳራን ሳባ ካምፔኒኬ ኣሳን ታማርሳምፔን ኪቲቲንቲኖ ሚሺዴ። ኢንታሬ ዬሱሲ ዎ ቤስ ማቂኖ ኬልባራ ፌ ዎቲኖ ባዚን ሶልዴ። ኢናፖ ዎሃ ዬሱሲ ዋን ፋጛሪ ዝም ጌይኖ ቤስ ኢባር ሉካምፔን ጊላ ሼምፓምፔን ጌሺዴ ይኮታቦ ጎጛ ጋርታ ጌላሪ ዋን ፊጚዴ።

ዎትናካሬ ጎጚምባር ኢንቲ ሉካምባራ ዬሱሳኬ ኢ ታማራን ቤቂኖ ዎይልን ኣሳን ዎ። ይን ኣሳን ኢታፖ ቲንታንዳቦ ባሃሪን ቡጊዲን ኤር ዎጺሬ። ይኮታቦ ዬሱሳኬ ኢ ታምራን ጌዳ ፊን ዬልኖፓ ዎይልንኣሳን ቲንታሪ ኢና ቤንቲሪ ኢንታ ናጊ ዎ።

ዎይልን ማጫንኬ ናኣን ፋይዲንታካይዶን ኢሺን ሙኩላፖ ሲንኣቲና። ዬሱስ ዎርዣቦ ዎይልን ሚጪንቲዴ። ዬሱሳክ ይ ዎርዣዳ ዬጚዝ ጋይጫ ናኢ ባዮ ዶሪፌንዬ። ይኮታቦ ኢንታ ታማሪሳሪ ኢንታ ጊዳ ዎን ማዝ ኣሳን ፋዴ።

ይና ኢዝ ጋላስን ቃም ኢ ታማራን ኢብ «ሳዚን ቃምኔ ላፍጋልዳ ካታማ ባዬ ኢንቲ ፌ ሙይዝ ባዝ ኮይ ዎጛምፔን ዎርዣ ሚሻቤ» ጌይዴ።

ዬሱሲ ዎቲናካሬ ፌ ታማራን «ኢንቲ ሙይዝ ባዝን ይንቲ ኢንታብ ኢምብቴ» ጌይዴ። ኢንታሬ «ይኖ ዎታንዳብ ኑ ዎዛታር ዳንዳኢራ? ኑክ ዎንዳ ኢሺን ኡፋኬ ናምኢ ሞላክ ሙታ ዎ።» ጋሪ ማሂዴ።

ኢሺን ታጳ ኢሺን ታጳ ማቃሪ ማታ ጋልዳ ዶኣምፔን ዎርዣቦ ሶላምፔን ዬሱሲ ፌ ታማራቦ ሶልዴ።

ኢናፖ ዬሱሲ ኢሺን ኡፊንዲኬ ናምኢ ሞሊን ኤሪ ፉዳ ኣፋ ቤቃሪ ፊሺን ጊሻቦ ጾሳ ጋላቲዴ።

ኢናፖ ዬሱሲ ኡፊንዲኬ ሞሊን ዱ ዱሪ ዎርዣቦ ሺሻምፔን ፌ ታማራንቦ ኢምዴ ኢ ታማራን ዎርዣ ቃጊ ኤዴ ዉርሲ ዉራካዬ ዎርዣ ዎይ ሙይ ሚሺኪዴ።

ኢናፖ ዎሃ ኢ ታማራን ኣሳን ሙይን ሺኖ ፊሽ ሺሺዴ ይዳሬ ታጶ ናምኢ ሌማታ ኩሼ ፊሻ ዎይ ዬይኖዲ ኢሺን ኡፊንዲኬ ናምኢ ሞሊንዶ።