27. ሳማራ ጋዳ ናሳ ኮሽ ታሪካ

ፔቲ ጋላሲ ፔቲ ናሳ ኣይሁዳን ሕጊን ኤሪዝ ኣስዶሪ ኢያ ፋጪ ቤቃንዳብ ዬሱሳክ ዬይዴ። «ኣስታማራዶ ሜናብ ሼምፖ ዲጛንዳቦ ቴ ኣብዝ ዎታኖ?» ጌይዴ። ዬሱስ ኢኮ «ጾሳ ሕጋ ጋልዳ ጻፊንቲኖዲ ኣብዛ? ጋር ማሂዴ።

ሕጊን ኤሪዝ ናሳዲ ጾሳ ሕጋዲ «ኔ ጎዳ ጾሳዳ ፎቲ ቡዳባራ ፎቲ ሼምፓባራ ፎቲ ዎልቃባራ ፎቲ ቆፊባራ ካቤ። ኔላጋዳ ኔ ኔና ካዝንዲፌን ካቤ» ጋር ማሂዴ። ዬሱስ «ኪን ይኖ ዎታቤ ኔ ሼምፓባር ዶኣሬ» ጌይዴ።

ዎቲናካሬ ሕጊን ኤሪዛዲ ጺላ ማቂኖን ኤራንዳቦ ኮይዴ። ይኮታቦ «ታ ላጋ ኦኖ?» ጋር ኦይጪዴ።

ዬሱስ ታሪካ ሶላምባራ ሂጋ ኤርዛቦ ማሂዴ «ሩሳሌማፖ ኢያርካ ሉካዝ ፔቲ ኣይሁዳ ኣሲ ዎዼ»

«ናሳዲ ሉኪ ሙታ ዎዺዶን ኣሳ ቡሪዛን ኢያ ኤዴ። ዎ ባዛን ዎይ ኢ ጋልዳፖ ኤካሪ ማ ኢያ ቡኪ ቡካሪ ዎንዳብ ዬልር ኣሺ ሉኪዴ።

ኢናፖ ዎሃ ኤልባራ ፔቲ ኣይሁዳ ጋዳ ቄሳዶር ይና ኢዝ ጎይምባር ሉኪሬ ይ ሃይማኖታ ቲኒዛዲ ቡርንቲኖ ባዛንኬ ቡርንቲኖ ናሳ ቤቃር ሜላ ጎይባር ኣዺዴ ማዳንታንዳቦ ኮሺዝ ናሳ ኣሻር ፌ ጎይን ሉኪዴ።

ኢናፖ ዎሃ ዎይልን ጋም ኣካይዶሪ ፔቲ ላዊዶር ዬይዴ ላዋን ጾሳ ኬ ጋርታ ቄሳን ማዲዛኣይህሁዳ ኮቼ ሌዋዲ ማ ሜላ ጎይባር ኣሪ ቡርንቲኖዳኬ ቡርንቲኖ ናሳ ቤቃር ኣሻር ኣዴ።

ይና ኢዝ ጎይባር ሶብኖ ሳማራ ኣስ ዎ ሳማራ ጋዶ ኣሳንሬ ኤኪኖ ኣይሁዳ ዜርን ዎ ሳምራ ጋዶ ኣስኬ ኣይሁዳ ጋዶ ኣሲ ዎልኣ ጎይይልሬ። ዎቲናካሬ ሳማሮ ናሳ ኣይሁዶ ቤቃሪ ዎይልን ሚጪንቲዴ ይኮታቦ ኢያ ናጊ ኢ ኪሲንዳር ሜጪ ዎቲዴ።

ኢናፖ ዎሃ ሳማሮ ናሳዲ ኢያ ዲንሪ ፌ ዬራ ጋልዳ ጋድሪ ዛቃ ሼምፒቺዝ ቤስ ኤጚዴ ኢና ማዲዴ።

«ኢዝ ዎንን ሳማሮ ናሳ ፌ ጎይን ሉካንዳብ ኮይዴ ዛቃን ኣቃዝ ኣል ባባቦ ጊላ ሚሽ ኢማሪ« ኢያ ናጋቤ ዓኒፖ ሜላ ሚሽ ኔኒ ኬሲሳምፔን ማቄ ጌይን ቴ ማቃርዶራ ኔብ ጪጋንዳ ጌይዴ።

ኢናፖ ዎሃ ዬሱስ ሂጋ ኤሪዛኮ «ኔ ኣብዝ ቆፓራ? ቡሪንቲ ቡኪንቲኖ ንሳቦ ኢ ላጋዲ ዓይዝ ኣሳን ጋርታፖ ዎዲያ? ጋር ኦይጪዴ ኢያሬ « ማርቲ ባር ቤቂኖዳ ጋር ማሂዴ ዬሱሲ ኢኮ « ኔናሬ ሉካራ ይና ኢዝፌን ዎታቤ» ጋሪ ሶልዴ።