22. ዋኒሳ ዬሊቲ?

ቲንታር ጾሲ ፌ ኪታንባርኬ ፌ ናባን ጌይባራ ዎርዣቦ ሶሊኔ ዎቲናካሬ ኢንታቦ ሶልንታካዬ ኦይዲ ጼታ ላይ ኣዺዴ ኢንቲ ቆፓካይዶን ፔቲ ኪታንቻ ዶሪ ዛካራሳ ጌይ ጼጊንቲዝ ፔቲ ጪጛሺ ቄሳቦ ጾሳ ቲናፖ ኪታ ኤካር ዬይዴ። ዛካራስኬ ማጪንዲኬ ማ ኤልሳቤጥቦ ጾሳቦ ኢጪዝ ኣሳን ዎዼ ዎቲናካሬ ኢዛ ናእ ዬላንዳብ ዳንዳኣካዬ።

ኪታንቻዲ ዛካራስኮ«ኔ ማቻ ኣቲና ናኢ ዬላሬ ኢ ሱምን ዋኒሳ ጌያ ጼጋሬ(ጋዳሬ) ኢ ጌሻ ኢያ ናባር ኩሚሬ ዎርዣዳ ማሳቦ ጊጊሬ ዛካራሲ « ታ ማቺኬ ታናክ ናኢ ዬላንዳቦ ኑ ዎይልን ጪጚኔ ይዲ ማቃዝን ቴ ዎዛታር ኤራራ?» ጋር ማሂዴ።

ኪታንቻዲ ዛካራሳኮ ዓና ኮሻ ሶልንይንታብ ሶላምፔኒ ጾሲ ታና ሚሽኔ ኔ ታና ኣምናካዮ ኮታቦ ናኣ ዬልንትዚ ዲራስ ሶላንዲ ዳንዳኢባሴ ይዝ ጌይን ኤልባራ ዛካራሲ ሶላንዳብ ዳንዳኣካዬ። ኢናፖ ዎሃ ኪታንቻዲ ዛካራሳ ኣሻር ሉኪዴ ዛካራሳሬ ፌ ኣል ሉኪዴ ኢ ማጪንዳሬ ዎዳጻዴ።

ኤልሳቤጣ ሌሂ ኣጋን ዎዳዶን ይ ኪታንቻዲ ኢንቲ ቆፓካይዶን ኢዝ ሱምንዳ ማራሞ ጋዚንዳ ኤልሳቤጥቦ ዳብንቦ ቤንቲዴ። ኢዛሬ ብርቲ ዉዲርዶን ኢስታንዳቦ ዮሴፋ ግርይዛባራ ሳ ኤዻር ዎዼ። ኪታንቻዲ «ኔ ዎዳጿሬ ኣትና ናኣ ዬላሬ ኢ ሱምንዶ ዬሱሳ ጌያ ጼጋሬ። ኢያሬ ዎይን ዳንዳኢኖ ጾሳ ናኢ ጌይንቲሬ ሜዽናብ ላ ማቂሬ» ጌይዴ።

ማራማ «ታኒ ዉዲር ማቂኖ ኮታቦ ይ ዎዛርታር ማቂራ?» ጋር ማሃዴ። ኪታንቻዲ ኢዛኮ «ጌሻ ኣያና ኔክ ዬይሬ ዎይን ዳንዳኢኖ ኔ ባር ማቂሬ ይኮታቦ ናኣዲ ጌሻ ጾሳ ናኢ ማቂሬ» ጌይዴ ማራማ ኣማናዴ ኪታንቻዲ ጌይኖን ኢዛ ኤካዴ።

ኪታንቻ ማራሚቦ ሶልኖፖ ዎሃ ኤልባራ ሉካራ ኤልሳቤጦ ኦይጫዴ ኤልሳቤጣ ማራሚኮ ሳራቲን ሲስኪኖንፌን ኤልሳቤጢ ናኣዲ ኢዝ ሚላ ጋርታ ዶሪ ዾጊዴ። ማጫን ጾሳ ኢንታብ ዎቲኖ ባዛቦ ዎልኣ ማቃሪ ኡፋይቲዴ። ማራማ ኤልሳቤጦ ዓይዚ ኣጋን ኢዝባር ዶኢኖፖ ዎሃ ማራም ፌ ኣል ማቃር ሉካዴ።

ኤልሳቤጣ ኣቲና ናኣ ዬልኖፖ ዎሃ ዛካራስኬ ኤልሳቤጣኬ ኪታንቻ ኢንታ ኪቲኖንዲፌን ናኣ ኣቂላ ሱምን ዋንሳ ጌይ ጋዳዴ ይና ኢዝ ኬልምባራ ጾሳዲ ዛካራሲ ማቃር ሶላምፔኒ ዎቲዴ። ዛካራሲ «ዎርዣቦ ቆፒኔ ጾሳቦ ጋላታ ኔናሬ ታ ናኣዶ ኢንታሬ ናጋራቦ ማርትዎዛርፌን ኤካንዳብ ዳንዳኢርኮ ዎርዣቦ ሶልዛ ዎይን ዳንዳኢዛ ጾሳ ናቢ ጌይንቲሬ»