23. ዬሱሳ ዬልቲ

ማራማ ዮሴፋ ጌይዛ ጺላ ናሳባራ ሳ ኤዺኖ ኔ ኢዝ ሳ ኣስና ዮሶፊ ማራማ ዎዳጺኖን ሲስካሪ ናኣ ኣቂላ ኢ ናኢ ባዮን ኤርዴ። ማራሞ ዬልንዳብ ኮያካዬ። ይኮታቦ ዝም ዶኣሪ ኢዞ ኣሻንዳብ ቆፒዴ ይኖ ኢ ዎታናፖ ቲን ኪታንቻ ዬሪ ኣይባባር ኢብ ሶልዴ።

ኪታንቻዲ «ዮሴፋ ማራሞ ኔ ማጫ ማሃር ኤካንዳቦ ኢጫፔ ኢዝ ጋርታ ዎዾ ኣቂሊ ናኣዲ ጌሻ ኣያናፖ ይዚ ኢዛ ኣቲና ዬልሬ ኢ ሱምንዶ ዬሱሳ ጌያ ጋዳቤ ( ኢዝ ቢርሺቺንዳ ያህዌ ፋሬ ጌንቴ) ኣባ ጌይን ዎርዣዳ ኢንታ ናጋራ ጋርታፖ ፋሬ»

ይኮታቦ ዮሴፍ ማራማ ኤካር ፌ ኣል ኤጚዴ ዎቲናካሬ ናኣ ዬልዝ ዲራስ ኢዞ ዬላካዬ።

ማራማዬልዝ ኬል ዬልን ሮማ ካታ ጋዳ ዎይ ኣሲ ፋይዲንታምፔኒ ሚኖ ማይንታን ዶኢኖ ካታሚን ጋርታ ሉካምፔን ሶልዴ። ዮሴፋኬ ማራሚክ ፌ ዎዾ ቤሲን ናዝሬታፖ ቤቴልሄማ ጎቲ ጎይ ዬዺዴ ኣባ ጌይን ቤቴሊሄማ ዬልንቲኖ ሚኖ ማያዲ ዳዉታ።

ኢንቲ ቤቴላሄማ ዬላሪ ሼምፒዛ ቤሲ ባዬ ኢንቲ ዲጛንዳብ ዳንዳኣዝን ሜሃን ኣቂዝ ቤሲን ሙታ ሜላ ዎይዲካሬ ባዬ። ናኣ ኣቂላ ዬልንቲኖ ኬልምባራ ኢያ ሱሪስዝ ኣርሳ ባዮ ኮታቦ ኢንዲንዳ ሜሃንር ፊቲ ሙሲዛ ጎጛ ጋርታ ሱርሳዴ ኢ ሱምን ዬሱሳ ጌይዴ።

ኢዝቃምን ጋላስን ቃም ኢና ላፍባር ዎዾ ቡጫ ጋልዳ ፌ ሜሃ ናጊዝ ጋይጫና ሙቆዶር ዎዼ ኢንቲ ቆፓካይዶን ፎኢሲዝ ኪታንቻ ኢንታክ ቤንቲዴ። ኢንታር ኢጪዴ ኪታንቻዳሬ ኢንታኮ«ኢጫፒቴ ኣባጌይን ይንታቦ ቴ ሶልዝ ኮሻ ሶሎ ዎ። ማሳ ጎዳ ቤቴልሄማ ዬልንቲኔ» ጌይዴ።

«ሉካሪ ናኣ ኣቂላ ኮብይቴ ጫርቃባራ ቁርቃሪ ሜሃን ፊ ሙሲዝ ጎጛ ጋርታ ሱርቂኖ ይንቲ ዲጚሬ።» ጌይዴ።ኢንቲ ቆፓካይዶን ኣፋ ሳዚ ኪታንቻባር ኩማዴ ጾሳ ጋላቲሙታ «ቦንቺ ጾሳብ ኣፋ ማቆ ሳርቲ ሳዛ ጋልዳ ኣሳቦ ኮሽ ቆፊ ማቆ» ጌይዴ።

ጋይጫ ናኣን ዬሱስ ዎ ቤስ ኤልር ዬላሪ ኪን ኪታንቻ ኢንታብ ሶሊኖንዲፌን ሜሃን ፊቲ ሙይዝ ጎጛ ጋርታ ሱርቂንዶን ዲጚዴ። ዎይልን ኢንታ ኡፋይሳዴ ማራማሬ ማ ዎይልን ኡፋይታዴ። ጋይጫናኣን ሲስኪኖ ኮታብኬ ቤቂኖ ኮታቦ ዎይ ጾሳዳ ጋላቲሙታ ፌ ዶራን ዎ ቤሲን ቡጪን ጋልዳ ማቂዴ።

ጊላ ቃማፖ ዎሃ ሩቅምስራቃ ጌይዝ ጋዳን ጋርታፖ ኤጫን ኣፋር ቲናፖ ቤንታካዮብፔቲ ቤርስ ቤቂዴ። ኣራ ኣይሁዳ ካቲ ዬልንቲኖን ማቂኖን ቤይሳዝን ቆፒዴ። ይኮታቦ ይካታ ቤቃንዳቦ ዎይልን ጎቲ ጎይም ዬዴ። ቤቴልሄማ ዬሪ ዬሱሳኬ ኢያ ዬልኖን ዎ ኬን ዲጚዴ።

ኤጫን ዬሱሳ ፌ ኢንዲባር ዎልኣ ዎን ቤቃሪ ኢንታ ኬዳር ሞጊቲዴ። ዬሱሳቦ ኣልኣ ማቂኖ ኪሳን ኢምዴ ኢናፖ ፌ ጋዳ ማቂዴ