19. ናባን

ጾሳዲ ኢስሬላን ታሪራ ጋርታ ዎይ ናባን ኢንታብ ሚሺዴ ጾሳ ቲናፖ ዬይኖ ኪቲን ሲሲኪዴ ኢናፖ ጾሲ ኪቲኖ ኪቲን ዎርዣቦ ሶልዴ።

ኣካብ ጌይዛ ኢስሬላ ጋድ ጋልዳ ካዉቲኖ ኬልባራ ዎ ናባዲ ኤላሳ ኣካቢ ባላ ጌይ ጼጊንታዛ ዎርዳ ጾሳብ ጎሽታፔን ዎርዣ ዳንኖ ኢታ ኣሲ ዎ ኤላሲ ኣካባኮ«ቴ ሶልዝ ዲሬስ ኢስሬላ ጋዳ ኢሪዎይ ኩዮ ዲኢባሴ» ጌይዴ። ይና ኣካባ ዎይሊን ጎይሊስዴ።

ጾሲ ዎንዳብ ኮይዛ ኣካባ ጋልዳፖ ባይንታምፔን ባራሃ ጋርታ ዎ ዎንኮ ሉካምፔን ኤልሳብ ሶልዴ ኢቦ ዎይ ጋላስ ጌሽኬ ኦማ ካፋን ኡፋኬ ኣይስ ኤሄይሬ። ኣካባኬ ኢ ዎታዴራን ኤልሳ ኮይዴ ዎቲናካሬ ዲጛንዳብ ዳንዳኣካዬ ኣዋዲ ዎይልን ዴጺዛ ኮታቦ ዉርሲ ዋ ሜልዴ።

ይኮታቦ ኤልሲ ሜላ ኡክ ዎ ጋዲ ጋርታ ሉኪዴ ይና ጋዲን ጋርታ ጋፍ ጊሻቦ ፔቲ ቡዲንዲኬ ኢዝ ናኣዲኪ ኢንቲ ሙይዝ ባዝ ዉራንዳብ ዬልን ዎቲናካሬ ኤልሳ ኮሺንቺ ናጊዴ ጾሳዲ ልንዳ ኦቲ ጋርታፖ ዛይቲንዳሬ ኦቲን ጋርታፖ ዲርጛካይፌን ዎታሪ ኢንታ ሙሲዴ ጋፍ ኬልምባራ ዎይ ሙይዛ ባዝ ኢንታብ ዎ። ኤላሶ ኢና ዎይልንኬል ጋምኢዴ።

ዓይዚ ላይኬ ባጋፖ ዎሃ ኢር ኬርሳንዳብ ዳንዳኣዚን ኢስሬላ ጋዳ ማቃሪ ኣካባብ ሶላምፔን ጾሳዲ ኤልሳብ ሶልዴ ኣካቢ ኤልሳ ቤቃሪ ኢኮ« ኣን ኔ ሜታ ኤይዛዲ ኔ ዬይኔባያ?» ጌይዴ ኤልሶ ኢክ« ሜታ ኤሄይዛዲ ኔና ኪን ጾሳ ያህዋ ኔ ኣሽኔ ባኣላብቦ ኔ ጎሺቲኔ ኢስሬላ ጋዳ ዎርዣድ ዎይ ቄርሜሎሳ ኢንዳ ጋልዳ ሺሻቤ።»

ኦይዲ ጼታኪ ኢሽን ታጳ ባኣላ ናባን ጉጃሪ ኢስሬላ ዎርዣ ዎይ ቄርሜሎሳ ኢንዲን ጋልዳ ዬይዴ ኤላሲ ዎርዣቦ «ኣፊን ጎይ ይንቲ ይንታ ቆፊን ላሚራ። ጾሲ ኢ ጾስኮ ኢብ ኦብቴ ጌይዴ።

ኢናፖ ኤልሶ ባኣላ ናባንኮ«ፔቲ ቡቲላጌን ሹካሪ ዣርሻ ሺሺብቴ ዎቲናካሬ ታማ ኤይፒቴ ታናር ይና ኢዝፌን ዎታንዳ ታማባር ማሂዛዲ ጾሳ ኢ ኪን ጾሴ» ጌይዴ። ይኮታቦ ባኣል ቄሳን ዣርሽ ጊግሲዴ ዎቲናካሬ ታማ ኤይካዬ።

ኢናፖ ዎሃ ባኣላ ናባን «ባኣሎ ሲሲካቤ» ጋር ባኣላ ጌሺዴ ጌሻፖ ኦማ ዬላር ጌሺን ዉይሲን ይፖር ኣር ፌ ጋላዳር ማሽባር ቃጺዴ ዎቲናካሬ ኣባካር ማልሳ ባዬ።

ዉርሲ ጋልዳ ኤልሲ ጾሳቦ ዣርሻ ሺሺዴ ኢንፖ ኣይሻዳ ሚ ይፓሬ ኮስ ቤሲን ቡጊድምባር ዎ ቤሳን ኣታካይዶን ዉርሲ ዋጻር ኦብጭ ኦብጭ ዎታንዳቦ ታ ናምኢ ኮል ዎይ ዋ ኤካሪ ዣርሺን ዉላምፔን ዎርዣቦ ሶልዴ።

ኢናፖ ኤልሲ «ያሂዌ ኣብራማቦ ይሳቃብኬ ዓይቆባብ ጾሳዶ ኔኒ ኤስሬልብ ጽሲ ማቂኖዲኬ ታናሬ ኔብ ኦዝ ኢሳ ማቂኖን ዓ ዎርዣ ኤራምፔን ታብ ማልሳ ማሃቤ» ጋሪ ጌሺዴ።

ኤልባራ ታማ ኣፋፖ ኬዳሪ ኦይሺንዶ ሚንዳ ሹቺንዶ ኢት ባዛንሬ ይኒፓሬ ካሽቤሲን ቡጊድባር ዎን ዋር ኣታካይዶን ሚቻዴ። ዎርዣዲ ይኖ ቤቃሪ ሳዛ ጋልዳ ኬዳሪ «ያሂዌ ጾሴ ያሂዊ ጾሴ »ጌይዴ።

ኢናፖ ኤልሲ«ባኣላ ናባን ጋርታፖ ፔታናር ቡታካይፌኒ»ጌይዴ። ይኮታቦ ዎርዣዲ ባኣላ ናባን ኤ ዎዴ።

ኢናፖ ዎሃ ኤላሲ ካታ ኣካባቦ «ኢሪ ዬይኔ ኤልር ካታማ ማቃቤ» ጌይዴ። ኤልባር ኣፋ ሳዚን ካርታዴ ሚን ኢሪ ኬዲ ኤዴ ያሂዌ ኣዋን ኤሲዴ ኢ ኪን ጾስ ማቂኖን ኤርዴ።

ኤላሳ ላይምፖ ዎሃ ጾሲ ናቢ ማቃምፔኒ ኤልሳ ጌይዛ ናሳ ማራጺዴ ጾሳዲ ኤልሳ ጎይባራ ዎይልን ጋራምሲዝ ባዝ ዎትኔ። ጋራምሲዝ ጋርታፖ ፔታንኒዳ ዎይልን ኢት ማቂኖ ቁራ ዓርጋባር ኤንቲኖ ጻላታቦ ኦል ኦልዛንቦ ኣላቃ ማቂኖ ኒማና ጋልዳ ማቂኔ። ኤልሳ ጎይ ስሲኪኖ ኮታቦ ኢያ ፋምፔኒ ሉካሪ ኤልሳ ኦይጪዴ ኤልሶ ዮርዳኖሳ ዋን ጋርታ ታብዛ ቶህ ጌላ ኬስካ ዎታምፔን ኒማናብ ሶልዴ።

ቲን ኒማኒ ጎይላሪ ኢብ ማቃ ማይጺን ኤልሳ ኢብ ሶልኖን ባዚን ኦካይ ኣቲዴ። ዎሃፖ ዎቲናካሬ ፌ ቆፊን ላማሪ ዮርዳኖሳ ዋን ጋርታ ታብዛ ቶህ ጌል ኬስኪዴ ዉርስ ድልዳ ዋን ጋርታፖ ኬሲኖፖ ዓኒ ኢ ቁራዲ ዉርሳ ፋጺዴ ጾሲ ኢያ ፋዴ።

ጾሲ ሜላ ዎይልን ናባን ሚሺዴ ዎይን ማቃ ጾሳብ ጎሽታዝን ኣሻምፔን ሜላንቦ ኪንንዲኬ ማርቲን ቤይሳምፔን ዎርዣቦ ሶልዴ። ናባን ኢት ኦዚን ኣሻካይ ኣቲጌይን ጾሳቦ ኪቲንታካይ ኣቲጌይን ጾሲ ኢንታ ኢሲኔ ጌይ ኢንታ ጋልዳ ፋራዳዝን ኢንታ ዓጋዝን ዎርዣቦ ዬኢር ሶልዴ።

ዎይልን ኬል ዎርዣዲ ጾሳቦ ኪቲንታካዬ ዎይልን ኬል ናባንቦ ዎ ቆፊንዳ ኢቴ ፔቲ ፔቲ ቶህ ኢንታ ዎሬ ፔቲ ኬል ናባ ኤርማሶ ሜል ማቂኖ ዋ ዶች ጋርታ ቲጚንታር ዓይቃምፔን ኢና ኣሺኔ ዶቺንቦ ዉርሲን ጋልዳ ዎዾ ቲቂላ ጋርታ ጌልዴ ዎቲናካሬ ዝቃንታ ካታዲ ኢብ ሚጪንታሪ ኢ ዓይቃናፖ ቲን ዶችን ጋርታፖ ኬሲካምፔን ፌ ኣሽካራን ኪቲዴ።

ናባን ዎርዣ ኢንታ ኢጺናካሬ ጾሳ ኮታቦ ጋር ሶላ ኤዴ። ማርቲ ጌላካይ ኣቲጌይን ጾሲ ኢንታ ይሳዚን ዎርዣቦ ሚንሳር ሶልዴ። ማ ጾሳ ማሲ ዬዚን ታስፋ ኢሚኖን ዎርዣዳ ቆፊስዴ።