18. ፋጊንቲኖ ካቲ

ዎይልን ላይፖ ዎሃ ዳዉቲ ዓይቂዴ ናኣ ሶሎሞናሬ ኢስሬላን ጋልዳ ካቲ ማቃሪ ኣቂስ ኤዴ። ጾሳዲ ሶሎሞናብ ሶልሪዶሪ ኢ ኣብዝ ሺ ኮይርኮ ኣያ ኦይጪዴ። ሶሎሞኒ ኤጫቲ ጌሺን ሳዝ ኤሻ ጋልዳ ኢያ ዎይልን ኤጫ ኣስ ማሂዴ ሶሎሞኒ ዎይልን ባዛን ታማሪ ዎይልን ኤጫኬ ፋራዲዝ ኣስ ማቂዴ ማ ጾሲ ኢያ ዎይልን ዱር ማሂዴ።

ሶሎሞኒ ሩሳላማ ኢባ፟ባ ዳዉቲ ቆፒኖዲፌንኬ ኬ ኬጻንዳብ ኮሺዝ ባዛን ሺሺኖን ጾሳ ኬን ኬጽዴ። ዓቲ ዎርዣዲ ዎል ዬልዝ ዱንካና ጊሻቦ ጾሳ ኬሳ ጋርታ ጾሳቦ ጎሽቲዴ ዣርሻር ሺሺዴ ጾሲ ዬሪ ጾሳ ኬ ጋርታ ቤንቲዴ ኢና ዎርዣባራ ዶኢዴ።

ዎቲናካሬ ሶሎሞኒ ሜላን ጋዳን ጋርቶ ማጫን ዶሶዴ ጉጺናካሬ ፔቲሙኩላ ማቃምፔኖ ዎይልን ማጫን ኤካሪ ጾሳቦ ኪቲንታካዬ። ይን ማጫን ጋርታፖ ዎይልንን ዛና ኣሳ ጋዳፖ ዬይኔ። ኢንታሬ ማቃጾሳ ኤክዬሪ ጎሺቲ ኤዴ። ሶሎሞኒ ጪጚኖ ኬልባር ኢ ማ ኢንታኮ ማቃ ጾሳቦ ጎሺቲዴ።

ጾሳዲ ሶሎሞና ጎይልዴ። ሶሎሞኒ ጾሳባራ ኣማንታካዮ ኮታቦ ኢያ ዓጋፌኒ ሶሎሞኒ ዓይቂኖፖ ዎሃ ኢስሬላ ዎርዣዳ ናምኢ ካቲ ማቃር ፋጊታዚን ሶሊዴ።

ሶሎሞኒ ዓይቂኖፖ ዎሃ ኢ ናኣ ሮባሚ ኢቤሲን ካዉቲዴ። ሮባሚ ዳሻ ኣሴ። ኢስሬላ ዎርዣ ዎይ ኢያ ካቲ ማቂኖን ሚንንዳቦ ሺቃር ዬይዴ። ሶሎሞኒ ዎይልን ኢቲ ኦሳ ኦኖ ኮታቦ ዎይልን ጊራ ጪጊሺኖን ሮባማብ ፌ ጋርታ ዎን ሶልዴ።

ሮባሚ ፌዳሺቲምባራ ኢንታኮ«ታ ባ፟ባ ሶሎሞኒ ሚን ኦሳ ኑና ኦሲኔ ጋር ቆፒኔ ዎቲናካሬ ታኒ ኢፖ ሺ ሚን ኦሳ ኦሳንዳ ኢፖ ሺ ዎልቂባር ይንታ ዓጋንዳ» ጋር ማሂዴ።

ታጳ ኢስሬላ ዎርዣን ኮራን ሮባም ጋልዳ ዉጪቲዴ። ናምኢ ኮራን ሙታ ፌብ ዎ ኣማኒንታዝንዲፌን ዎጴ ይን ናምኣን ኮ፟ራን ይሁዳ ካቲ ማቂዴ።

ሮባማ ጋልዳ ዉጪትኖ ሜላን ታጳ ኢስሬላ ዎርዣ ኮራን ኢ ሮባማ ጌይዛ ናሳ ፌብ ካቲ ማሃር ካዉቲስዴ። ጋዲን ጋልዳ ሲጛል ጎይምቦ ፌብ ካቲ ማሃር ካዉቲሲዴ ኢስሬላ ካቴ ጌይ ጼጊዴ።

ኢሮባሞ ጾሳ ጋልዳ ዉጪታሪ ዎርዣዲ ናጋራ ኦምፔን ዎቲዴ ይሁዳ ካታ ጋዳ ዎ ጾሳ ኬ ጋርታ ጾሳቦ ጎሺቲዝ ቤሲንዶ ዎርዣ ጎሽታምፔን ናሞኢ ማቃ ጾስ ኮቺዴ።

ይሁዳኬ ኢስሬላ ካቲንታንቦ ጻላታ ማቂኖን ዎይሊን ኬል ዎል ዎልኣ ኦልንቲዴ።

ኦራ ኢስሬላ ካቲ ካቲንታን ዎይ ኢቴ ይን ካቲንታን ጋርታፖ ዎይሊንን ኢንታ ቤሲን ካዉታንዳብ ኮይዛን ሜላን ኢስሬላን ዎንቲዴ።

ካቲንታን ዎይኬ ዎይሊንን ኢስሬላ ካቲ ዎርዣ ማቃጾሳቦ ጎሽቲዴ ማቃጾሳቦ ጎሽታዝንዳ ዎይልን ኬል ጾሲ ዶስባሶ ጎይባራ ማጫኬ ኣቲናክ ዎል ሱርቂ ማ ፔቲ ፔቲ ቃም ናኢ ዣርሽ ኢሚ ዎቲሬ።

ይሁዳ ጋዳ ካታን ዳዉታ ዜር ይን ካቲንታን ጋርታፖ ዶካን ኮሽ ኣቂስኖን ጾሳዳር ጎሽቲ ኮሽ ኦሳን ዎቲናካሬ ዎይልንን ካቲንታን ኢትኬ ኮሽ ማቃካዮ ኦሳን። ማቃጾሳቦ ዣርሽ ሹኪኔ ማ ዎይሊንን ይሁዳ ዎርዣዲ ጾሳ ቲን ዉጪቲዴ ሜላን ማቃ ጾሳቦ ሉካር ጎሺቲዴ።