16. ናጻ ኬሲዛን

ኢያሶ ዓይቂኖፖ ዎሃ ኢስሬላን ጾሳቦ ኪቲንታካዬ ኣቲኖ ካናና ኣሳን ፌ ጋርታፖ ኬሳካይ ዎይ ኢንቲ ጾሳ ሂጊንቦ ኪቲንታካዬ። ኢስሬላን ኪን ጾሲ ማቂኖ ያህዌ/ ማ ዶኢዛዳ ኢያ ጎሺታናፖ ሺዻ ካናና ጋዳ ዎዾ ማቃ ጾሳን ጎሽቲ ኤዽዴ። ኢስሬላንቦ ካቲ ባዬ ይኮታቦ ዎይን ፔብ ማይጺኖ ባዝ ዎይ ዎቲሬ።

ኢስሬላን ጾሳቦ ኪቲንታብዳ ጋዚን ኣሻካዮኮታቦ ጾሲ ኢንታ ጻላታን ኢንታ ኦላምፔን ዎቲዴ ይን ኢንታ ጻላታን ኢስሬላን ባዛን ዎይ ውቂዴ። ኢንታብ ዎ ቆልንን ዎይ ኢንታ ይሲዴ ዎይልንን ዎዴ። ኢስሬላን ጾሳቦ ኪቲንታካዮ ኮታብኬ ፌ ጻላታንባር ዋይሙታ ዎይልን ላይ ኣኖፖ ዎሃ ማርቲ ጌልዴ ጾሳዲ ኢንታ ጻላታጋልዳፖ ቡቲሳምፔን ኦይጪዴ።

ኢናፖ ጾሳዲ ኢንታ ጻላታን ጋልዳፖ ቡቲስዚ ኣስ ኢንታብ ሚሺዴ ጋድን ጋልዳሬሳርቲ ኤሄይዴ። ዎቲናካሬ ኣሳን ጾሳዳ ማቃር ቦቲጚዴ። ማቃ ጾሳባር ጎሺቲ ኤዴ ይማቂኖ ኮታቦ ጾሳዲ ኢንታ ላፍር ቤንቲዝ ጻላታን ምዳሞ ኣሳን ኦል ዲንዴ ጋምዴ።

ሚዳማን ኢስሬላን ካን ዎይ ፌብ ታብዛ ላይብ ጊዳዝን ሙንት ኤኪዴ። ኢስሬል ዎይልን ኢጪዴ ዶች ቤሳን ጋርቲኬ ጋዋን ጋርታ ባያር ዎዶን ምዳማን ኢንታ ዲጛንዳብ ዳንዳኣካዬ ዉርስን ጋልዳ ፌና ፋምፔን ጾሳኮ ዉይስዴ።

ፔቲ ቃም ጌዶና ጌይዛዲ ኢስሬላ ኣስዶሪ ምዳማን ኢ ካን ኤካካይፌኒ ባያሪ ካ ቡኪሬ። ጾሳ ኪታንቻ ጌዶን ዬሪ «ኢንቲ ሚን ኦል ኣባዳ ጾሲ ኔባር ዎ ሉካራ ኢስሬላን ምዳማን ኩሽታፖ ቡቲሳቤ»ጌይዴ።

ጌዶና ባቦ ማቃ ጾሳብ ጌዝንኖ ካሻ ቤሲ ዎ ጾሳዲ ጌዶናኮ ይኖ ካሻ ቤስን ፋራሳምፔን ሶልዴ። ዎቲናካሬ ጌዶን ዎርዣብ ኢጪኖ ኮታቦ ሳዝን ቃምዝ ድሬስ ናጊዴ። ኢናፖ ካሽ ቤስን ፋራስዴ ኢዛ ሊቂዝ ዲሬስ ሜይስዴ። ኢዝ ላፍን ጋልዳ ጾሳቦ ኦራ ዣርሽ ቤስ ኮቺዴ ጾሳብ ዣርሽ ኢሚዴ።

ኢዝ ዎንን ጌሻ ዎርዣ ፔቲ ኣሲ ኢንታ ዣርሽ ቤስን ፋራስኖን ቤቃሪ ዎይልን ዛልቂዴ። ጌዶና ዎንዳቦ ጌዶና ኣል ሉኪዴ ዎቲናካሬ ጌዶን ባ፟ቦ «ኣባቦ ይንታ ጾሳ ማዳንዳብ ኮይራ? ኢ ጾስኮ ፌና ቡቲሲጋቤ» ጌይዴ። ይኖ ጌይኖ ኮታቦ ዎርዣዲ ጌዶና ዎካይ ኣሺዴ።

ምዳማን ኢስሬላን ቡሪሳንዳቦ ማቃር ዬይዴ። ፋይዲ ባራ ዎይልን ኣስ ማቂኖ ኮታቦ ኦናካ ኢንታ ፋይዳንዳብ ዳንንዳኣካዬ። ጌዶናሬ ሚዳማን ኦላንዳቦ ኢስሬላን ጼጊዴ። ጾሳዲ ኢባር ማቃር ኢስሬላን ማዲርፌንኮ ኤራንዳቦ ጌዳኒ ናምኢ ማላን ጾሳ ኢይጪዴ።

ቲኖ ማልንዶ ጪርቃ ሳዛ ጋልዳ ጋዳር ጌሽ ኮያ ጪርቂን ጋልዳ ሙታ ማቄጌይንዶ ሳዚን ጋልዳ ማቃካዶፌኒ ጋር ኦይጪዴ። ጾሲ ኢ ጌይኖዲፌን ዎቲዴ። ማ ኢዚፖ ዎሆ ቃሚን ጌዶኒ ጾሳዳ ሳዝንዳ ጌሽ ኩይምባር ዎቃራ ጪርቂንዳ ካሊ ማቆ ጌይ ኦይጪዴ ጾሲ ኢጌይኖዲፌን ዎቲዴ። ይን ናምኢ ማላን ጾሲ ኢባር ማቂሪ ኢስሬላን ሚድማን ጋልዳፖ ቡቲሳዝን ጌዶናብ ማርካ ቤይሲዴ።

ዓይዚ ታጳ ናምኢ ሙኪላ ኢስሬላ ዎታዴራን ጌዶናክ ዬይዴ። ዎቲናካሬ ጾስ ኢንታ ፋይዳዲ ዎይልን ጌይዴ ይኮታቦ ጌዶኒ ኦላንዳብ ኢጪኖን ላምታም ናምኢ ሙኪላ ዎታዴራን ኢንታ ኣል ማሃር ኢንታ ሚሽዴ። ጾሳዲ ጌዶናኮ ዓታር ዎታዴራን ፋይዳ ዎይልን ጌይዴ ማቂኖ ኮታቦ ጌዶኒ ዓይዚ ጼታ ዎታዴራን ኣሻሪ ሜላን ኢንታ ኣል ማሃር ሚሺዴ።

ይና ኢዝ ጋላስ ቃም ጾሳዲ ጌዶናኮ «ሚዳማ ዎታዴራንሶኮ ሶባቤ ኢንታ ጋዚን ስሲካራ ዉርሳ ኢጫፔ» ጌይዴ። ማቂናካሬ ጌዶኒ ሚዳማ ዎታዴራንኮ ኢዚጋላስን ቃም ሶብዴ ፔቲ ሚዳማ ዎታዴራ ኢላጋቦ ኣይባባራ « ጌዶና ዎታዴራን ሚዳማ ዎታዴራን ጋሚዴ ጌይ ቤይሲን» ፌ ቤቂኖን ሶልን ሲስኪዴ ጌዶን ይኖ ሲሲካሪ ጾሳቦ ጎሺቲዴ።

ኢናፖ ጌዶና ዎታዴራንኮ ማቃሪ ፔታን ፔታን ቆም ቆምን ኡሺን ናሳ ዣባ ኢሚዴ ሚዳማ ዎታዴራን ሱርቂ ዎዶን ኢንቲ ዎ ኦልን ቤሲን ቃጺ ማሂዴ ጌዶናኮ ዓይዚ ጼታ ዎታዴራን ኦቲ ጋርታ ዣባ ኤዴ። ሚዳማ ዎታዴራን ዎትናካሬ ዣቢን ፎኢንን ቤቃንዳብ ዳንዳኣካዬ።

ኢናፖ ጌዶማ ዎታዴራን ዎይ ፔቲ ቶህ ፌ ኦታን ዎዴ ይና ኢዝባር ኤልር ዣባን ፎኢን ኢንታ ቆፓካይዶን ፎኣዴ። ፌ ኡሹንች ናሲን ፉጊሙታ «ጾሳዲኬ ጌዶና ዎታዴራን» ጌይሙታ ዉይስዴ።

ጾሳዳሬ ሚዳማ ኣሳን ባልዴ ጌይዴ ኢንቲ ዎል ዎክኣ ዎጽዴ ጌይዴ ኤልባር ፌ ኣል ዎጽን ኢስሬላን ጼጋሪ ሚዳማ ኣሳን ዳካንዳቦ ዎል ዎልኣ ማንዲንቲዴ። ዎይልንን ዎጺዴ ኣቲኖን ኢስሬላ ጋዳፖ ዳኪዴ ይና ኢዚባራ ፔቲ ጼታኬ ላምታም ሙኪላ ሚዳማ ዎታዴራን ዓይቂዴ። ጾሳዲ ኢስሬላን ፋዴ።

ዎርዣዲ ጌዶኒ ኢንታብ ካቲ ማቃምፔን ኮይዴ ጌዶኒ ዎቲናካሬ ይኖ ኢንቲ ዎታምፔን ኮያካዬ ዎቲናካሬ ቆም ቆምን ሚዳማን ጋልዳፖ ኤኪኖ ዎርቃ ቃላባቲን ኤሄምፔን ኦይጪዴ ዎርዣዲ ጌዶናቦ ዎልን ዎርቃ ኢምዴ።

ጌዶናሬ ዎርቂን ቴልጊሳር ቄሳ ኣላቃዲ ማኣዝንዲፌን ዱማ ኣፍላ ማሃር ኢሲዴ። ዎቲናካሬ ዎርዣዲ ይና ኣፌልን ዱማ ማቃ ጾስ ፌን ማሃር ኢዛቦ ጎሽቲ ኤዴ ይኒፖ ዲንዲኖ ኮታቦ ጾሳዲ ኢንታ ጻላታን ኢንታ ጋማምፔን ዎቲዴ ኢንታ ዓጊዴ ዉርሲ ጋልዳ ዎርዣዲ ዓታር ጾሲ ኢንታ ፋምፔን ኦይጪዴ ጾሳዲ ኢንታቦ ሜላ ፋዛ ሚሺዴ።

ይፌኖ ባዛዲ ዎይልን ጎይ ማቃር ማቃር ኢስሬላን ናጋራ ኦዴ ጾሲ ኢንታ ዓጊዴ ማቃር ማርቲ ጌልሪ ጾሳዳሬ ኢንታ ፋምፔን ፋዛ ኢንታብ ሚሺሬ ዎይልን ላይ ጾሳዲ ኢስሬላን ፋንዳቦ ዎይልን ናጻ ኬሲዛን ኢንታብ ሚሺኔ።

ዉርሲ ጋልዳ ዎርዣዲ ሜላን ኣማንባሶን ኢንታብ ዎጺን ካቲ ኢንታብ ካዉቲሳምፔን ጾሳ ኦይጪዴ ኦልባር ኢንታ ቲኒዛ ጳርንኬ ሚን ማቂኖ ካቲ ኢንታብ ዶኣምፔን ኮይዴ ጾሲ ዎቲናካሬ ይና ኢንታ ኦይቺን ካካዬ ማቂናካሬ ኢንቲ ኮይኖዲፌኒ ካታ ኢንታብ ኣዴ