14. ምዲራባዳ ጋልዳ ጌዲክ ዓንክ ጌይ ዋይዴ

ጾሲ ኢንቲባር ጌልኖ ጫቃ ቃሊንባር ዎልፌን ማቂእ ሂጋንቦ ኪቲንታምፔኒ ኢስሬላንቦ ሶሊኖፖ ዓኒ ሲና ኢንዲን ጋልዳፖ ሉኪዴ። ጾሳዲ ዎርዣዳ ሲና ኢንዲን ጋልዳፖ ካናና ጌያ ጼጊንታ ዎ ታስፋ ኢንታብ ኢማንዳ ጌይኖ ጋዲን ዬልንዳቦ ቲኒ ኤዴ። ሻራ ኣምዲንዳሬ ኢንታ ቲኒን ኣሪ ካናና ሉኪዴ ኢንታሬ ኢዎሂን ሉኪዴ።

ጾሳዲ ኢንታብ ታስፋ ኢምኖ ጋዲን ኢንታ ዜርንቦ ኢማዝን ኣብራሃማቦ ይሳቃብኬ ዓይቆባብ ኢማንዳብ ታስፋ ቃላ ጌሊኔ ዎቲናካሬ ዓት ይና ጋዲን ጋልዳ ዎይልን ዎርዣ ዶኢሬ። ኢንታሬ ካናናን ጌይንቲ ጼጊንቲሬ። ካናናን ጾሳቦ ጎሺቲባሴ ማ ኢብ ኪቲንቲባሴ ዎርዳ ጾሳን ጎሺቲዴ ዎይልን ባዛንር ዎቲዴ።

ጾሳዲ ኢስሬላንኮ «ታስፋ ኢምኖ ሳዚንጋልዳ ዎ ኣሳን ካናናን ዎይ ይስብቴ። ኢንታባር ሳርቲ ባዝ ኦፒቴ ኢንታ ጋርታፖ ኤካፒቴ ኢንቲኮ ማቃ ጾሳን ውርሲ ይሲብቴ። ታብ ኪቲንቲባስኮ ታብ ጎሺታዝ ቤሲን ማቃጾሳቦ ጎሺቲሬ።» ጌይዴ።

ኢስሬላን ካናና ጋዲን ቡጊዲ ዬልኖ ኬልባራ ሙሶ ፔታን ፔታናን ኢስሬላን ኮቺ ፔቲ ፔቲ ኣሲ ታጶ ናምኢ ኣሳን ማራጺዴ። ሉካሪ ጋዲን ኣብዝ ማይጻርኮ ሉካር ሜዛምፔን ኢንታብ ኪታ ኢሚዴ። ይን ኣሳን ሚንቤ ዎይ ሊቂ ማቂኖን ኤራንዳብ ካናናን ሜዛንብ ኮሽሬ።

ታጶ ናምኢ ኣሳን ካናና ጋዳ ኦይዲ ታጳቃም ዬሪ ማቂ ዬይዴ። «ጋዲንዳ ዎይልን ኢጊሴ ኢና ካንር ጫላ ዎይን ጋር ዎርዣ ሶሊዴ ታ ሜዛ ኣሳን «ካታሚን ጋርታ ዎንፖ ሚን ኣሳን ጴቺ ኑ ኢንቲባር ኦልንቲጌይናሬ ኪንባር ኑና ጋሚሬ ። ኑና ዎሬ » ጌይዴ።

ኤልር ኢዚባር ናምኢ ሜዛ ኣሳን ካሌብኬ ኢያሳኬ ።«ካናና ኣሳን ጳርን ማ ሚን ማቂኖን ኪን ዎቲናካሬ ኪንባር ኑ ኢንትጋ ጋሚሬ ጾሳዲ ኑ ጊሻብ ኦልንቲሬ» ጌይዴ።

ዎርዣዲ ዎቲናካሬ ካሌባኮንዲኬ ኢያሳኮን ሶልን ኤካካዬ ሙሳኬ ኣሮናክ ኢንታ ጎይልን « ዓይዳ ኢታ ቤሳጋልዳ ኑና ኣባብ ኤኪ ዬይቴ? ኑ ኦልባር ዓይቃምፔንኬ ኑ ማጫን ማ ኑና ናኣን ማቂንካሬ። ኑ ጊብጻ ጋዳ ዶኢንኮ ኑብ ኮሺዶን»ጌይዴ ። ዎርዣዲ ጊብጻ ማሃር ኢንታ ኤዝ ሜላ ማራጻንዳብ ኮይዴ።

ጾሲ ዎይሊን ጎይላሪ ዎልኣዬላዝ ዱንካንኮ ዬይዴ ኢንትጋኮ ዪንቲታብ ኪቲንታብዳ ጌይኖ ኮታቦ ዎርዣ ዎይ ባራሃ ጋርታ ጌዳክ ዓኒክ ጌይ ዋይሬ። ኢያሳኬ ካሌባፖ ኣቲን ላምታም ላይኬ ኢዛፖር ኣኖን ዎይ ይን ኢዚባር ዓይቂርዶኬ ውርሲ ኢንታብ ታስፋ ኢምኖ ጋዲን ጋርታ ጌልባሴ።

ዎርዣ ዪኖ ሲስኪኖ ኬል ናጋራ ኦኖ ኮታቦ ሺርሚዴ።ፌ ኦል ቶራን ኤካሪ ካናና ኣሳን ኦላንዳቦ ሉኪዴ።ሙሶ ጾሲ ኢንታባር ባዮኮታቦ ኢንቲ ሉካካይፌኒ ኢንታብ ሶሊዴ።ዎቲናካሬ ኢንቲ ኢኮን ሲስካካዬ።

ጾሲ ኢንታባር ዎልኣ ኦል ቤሲን ጋርታ ሉካካዬ።ዪኮታቦ ጋሚንቲዴ።ዎይሊንን ዎንቲዴ።ኢናፖ ኢሲሬላን ካናናፖ ማቃሪ ባራሃ ጋርታ ኦይዲታጳ ላይ ዋይዴ።

ኢስሬላ ዎርዣዲ ባሃራ ጋርታ ኦይዳ ታጳ ላይ ጾሲ ኢንታ ፊሻ ሙሲዴ ኣፋ ማና ይዝጌይን ጼጊንታዝን ሶሊን ኢንታብ ኢሚዴ። ማ ኣይሽ ሞምፔኒ ኢኒቲ ዎ ቤሲን ጋልዳ ዲርጪታ ጌይዛን ማሺዴ። ይና ኢዝባራ ዎይ ጾሲ ኢንታ ኣርልንዲኬ ኢንታ ኮባን ዉራካይፌን ዎቲዴ።

ጾስ ጋራምስዝ ባዝ ምቂኖ ጎይባራ ዋ ሹች ላሊ ጋር ኬሳር ኢንታብ ኢሚዴ። ይዎይ ማቂናሬ ኢስሬላ ዎርዣዲ ጾሳ ጋልዲኬ ሙሳ ጋልዳ ሽርምዴ ጉንዲሚዴ ማቂናካሬ ጾሳዲ ኣብራማቦ ይሳቃብኬ ዓይቆባብ ኢማንዳብ ጌይኖ ታስፊን ዓታር ኣማንታሬ።

ዎርዣ ኣባካር ዋ ባዮ ኬልባራ ጾሳዲ ሙስኮ « ሹቺምቦ ሶላቤ ኢዝ ጋርታፖ ዋ ኬስካሬ» ጌይዴ። ዎቲናካሬ ሙሶ ሹእምቦ ሶላዝን ኣሻሪ ጉፋ ባር ናም ቶሂ ቡኪኖ ኮታቦ ዎርዣ ዎይ ቲን ጾሳዳ ዬልዴ። ዎይ ኣሳ ኡሺካምፔኒ ሹችን ጋርታፖ ዋ ኬስኪዴ። ዎቲናካሬ ጾሲ ሙሳ ጎይላሪ «ታሲፋ ኢምኖ ጋዲን ጋርታ ጌላባሴ» ጌይዴ።

ኢስሬላን ኦይዲ ታጳ ላይ ባሃራ ጋርታ ዋይኖፖ ዓኒ ጾሳዳ ማቃር ኢምኖ ታስፋ ሳዚን (ጋዲን) ጋርታ ቲኒዴ ዓታሬ ሙሶ ጪጚዴ ይኮታቦ ዎርዣ ቲኒሙታ ማዳምፔን ጾሳዲ ኢያሳ ማራጽዴ ማ ጾሳዲ ፔቲ ቃም ሙሲፌኖ ሜላ ናቢ ሚሽኣዝን ሙሳቦ ታሲፋ ኢምኔ።

ኢናፖ ጾሳዲ ታሲፋ ኢምኖ ጋድን ቤቃንዳብ ዳንዳኣምፔን ኢንዲ ሲን ጋልዳ ኬስካምፔን ሙስቦ ሶልዴ። ሙሶ ታስፋ ኢምኖ ጋዲን ቤቂዴ። ዎቲናካሬ ጾሳዲ ኢ ኢና ጌልምፔን ኢብ ፋቃዳካዬ። ኢናፖ ሙሶ ዓይቂዴ። ኢስሬላን ዓይዚ ታጳ ቃም ሙርሚዴ። ኢንታ ኦራ ቲንኣዲ ኢያሳ ማቂዴ። ኢያሶ ጾሳባር ኣማንቲር ማ ኪቲንቲዝ ኣስ ማቂኖ ኮታቦ ኮሽ ቲንዝ ኣሴ።