9. परमेशर मूसा कुजाते।

यूसुफेरे मरनेरां बाद तैसरे सब रिशतेदार मिस्र मुल्खे मां बेस्सी जे। ते तैना ते तैन केरि औलाद कई सालन तगर मिस्रे मां राए। ते तैनेईं बड़े बच्चे भोए। ते तैन्न जो इस्राएली ज़ोवं जेवं।

कई सालां केरे बाद, इस्राएली केरि तैधात बड़ी बेधी जेवरी थी। ते हुनी मिस्री लोक ऐसानमांद न थिए, कि मिस्रेरे लेईं यूसुफे बड़ू किछ कियोरू थियूं। तैना इस्राएली लोकन करां डेरी जे। किजोकि तैना गीनती मां तैन्न करां बड़े जादे भोवरे थिये। ते तैलहेरेलेइ तैस वक्ते राज़ केरने बाले फ़िरौने इस्राएली लोक मिस्री केरे दास बनाए।

मिस्री लोकेईं इस्राएली बड़ी इमारतां ते इड़ी तगर की कई नागरां बन्नेरे लेई मजबूर किये। ते एस सकत महनतां तैन केरि ज़िन्दगी बड़ी दुखी बनाई, पन परमेशरे तैन बरकत दित्ती ते तैन्न होरी भी जादे बच्चे पैदा भोए।

फिरौने हेरू कि इस्राएली लोकन बड़ी औलाध भोई रावरीए। एल्हेरेलेई तैनी अपने लोकन इस्राएली केरां मट्ठां नील दरियाए मां जो शैरतं मरनेरो हुक्म दितो।

एक्की खास कौन्शां एक्की मट्ठे ज़र्म दित्तू। तैसां ते तैसरे मुन्शे ज़ेत्रू तैन करां भोई बटु तै बच्चो छ़पेइतं रख्खो।

ज़ैखन तैस बच्चेरे हाज-बाव तैस जादे छ़पेई न बटे, त तैनेईं तैसेरी जान बंच़ानेरे लेई तैरने बाली अक टोकरी नील दरीयेरे बने पुड़ एक्की झ़ैल्ले मां रख्खी। तैसेरी बडी बेइन इन हेरनेरे लेई तैस टोकरारे पासे तकती राई कि एस टोकरी सीं कुन भोलू।

फिरौनेरी कुइयां तै टोकरी लाई ते तैस मां जो तक्कु। ते ज़ैख्न तैसां अक बच्चो लव त तैसां तै अपनो बच्चो भोनेरे लेईं नियो। ते तैसां अक इस्राएली कौन्श दुध पियानेरे लेई रख्खी, तैस ई पतो न थियो कि तै तैस बच्चेरी असली अम्मा आए। ज़ैखन तैन मट्ठू एत्रू बड्डू भोवं कि तैस अपने अम्मरे दुधेरी ज़रूरत न थी, त तैसां तैन मट्ठू फिरौनेरे कुइये कां जो वापस भेज़ू , ते तैस मट्ठेरू नवं मूसा थियूं।

एक्सां ज़ैखन मूसा बड्डो भोवरो थियो त तैनी हेरू कि अक मिस्री एक्की इस्राएली मैनू मार लगोरोए देने। ते मूसा अपने सैथी इस्राएली बंच़ानेरी कोशिश की।

ज़ैखन मूसा सोचू कि तैस कोई नईं लेवरो लहने, त तैनी तै मिस्री मारो ते तैसेरी लाश छ़पाई। पन मूसा ज़ैन कियोरू थियूं तैन एक्की मैने लेवरू थियूं।

फिरौने पतो लगो कि मूसे कुन कीयोरूए। त तैनी मूसा मरनेरी कोशिश की, पन मूसा मिस्रेरे जंगले जो नश्शो ते फिरौनेरे सिपेही तैस तोपी न बटे।

मिस्रेरां दूर जंगले मां मूसा अक पुहाल बनोरो थियो। ते तैनी तैड़ी एक्की कौन्शी सीं ड्ला बनाव ते तैस दूइ मट्ठां भोआं।

मूसा अपने शेरहेरां गब्बां च़ारतो थियो। ते एक्की दिहाड़े तैनी अक्क झ़ैलोवं आग लगोरी लाई ज़ैन कि आग लगने सेइं भी न थियूं फुलोतू। ते तैस हेरनेरे लेई तै नेड़े जेव। ज़ैखन तैड़ी बड़े नेड़े थियो त परमेशरे तैस सेइं गल की। तैनी ज़ोवं, “हे मूसा, अपने पव्वां केरि जुट्टी खोल्ल। किजोकी तू एक्की पवित्र जगाई पुड़ खड़ोस।”

फिरी परमेशरे ज़ोवं, “मीं अपने लोकां केरो दुख लेवरोए। ते अवं तीं फिरौने कां तीं भेज़ेलो ताकि तू इस्राएली मिस्रेरे गुलामी मरां छुटेइतां अनस। ते अवं तैन कनान मुल्ख देलो, तै मुल्ख ज़ैसेरो वादो मीं अब्राहम इसहाक ते याकूबे सीं कीयोरोए।”

मूसे पुछ़ू, “अगर लोक इन ज़ान्नु चाले कि अवं केनी भेज़ोरोईं त अवं कुन ज़ोईं?” परमेशरे ज़ोवं, “ज़ै अवं आईं तै आईं। तैन सीं ज़ो, ‘अवं तैनी अवं भेज़ोरोईं।’ तैनी इन भी ज़ोवं, ‘अवं तुश्शे पूर्वजां केरे परमेशर येनी अब्रहाम, इसहाक, ते याकूबेरो परमेशर योहोवा आईं।’ मेरू एन्ने नवं हमेशरूए।”

मूसा डरतो थियो ते फिरौने कां गानू न थियो चातो किजोकी तैनी सोचु कि तै रोड़े च़ारे गल्लां न केरि बटेलो, एल्हेरेलेई परमेशरे मूसेरे ढ्ला, हारून तैसेरी मदत केरनेरे लेईं भेज़ो।