8. परमेशर युसफ ते तैसेरे परिवारे बंच़ाते।

बड़े सालां केरे बाद ज़ैखन याकूब बुढो भोइ जेवरो थियो, त तैनी अपनू मट्ठू युसफ अपने ढ्लां केरो पतो केरने भेज़ू। ज़ैना गबां केरि देखभाल केरी राहोरे थिए।

यूसफेरे ढ्ला तैस सेइं नफ़रत केरते थिए। किजोकी तैन केरो बाजी तैस सेइं तैन करां जादे प्यार केरतो थियो। ते एल्हेरेलेइ भी कि तै सुपनां हेरतो थियो कि तै तैन पुड़ राज़ केरनेबालो भोलो, ज़ैखन युसफ अपने ढ्लांन का अव त तैनेईं तै बंधो ते तैनेईं तै बपैरन जो बेच़ो ज़ैना मैनू घिन्नेरो ते बेचनेरो बपार केरते थिए।

घरे वापस एजनेरे पेइले युसफेरे ढ्लेईं युसफेरां लिड़ां छ़िन्दतां तैना छ़ेलरे खूने मां डोबां। ते फिरी तैनेईं तैना लिगड़ां अपने बाजी हिरां। ताकि तै इन सोचेलो कि युसफ जंगली जानबरे मैरी छ़डोरोए ते याकूब बड़ो उदास भोव।

गुलाम घिन्नेबाले लोकेईं युसफ मिस्र मुल्खे मां नीयो। नील दरियेरे बन्ने पुड़ बसोरो मिस्र मुल्ख अक बड्डो ते शक्तीशाली मुल्ख थियो। गुलामां केरो बुपार केरनेबालेईं यूसुफ एक्की अमीर सरकाई अधिकैरी जो बेच़ो। यूसुफे अपने मालिकेरी रोड़े च़ारे सेवा की, ते परमेशरे यूसुफे बरकत दित्ती।

युसफेरे मलिकेरे लैड़ां युसफे सीं साथी जिसमानी रिश्तो बनानेरी कोशिश की। पन युसफे इस तरीके सीं परमेशरेरे खीलाफ पाप न केरनेरो फेसलो कियो। त तै बड़ी सेरकोई ते युसाफे पुड़ झ़ठो इलज़ाम लव। ते यूसुफ कैदखाने मां छ़ड्डो, पन यूसुफ कैदखाने मां भी परमेशरेरे लेई वफ़ादार राव ते परमेशरे तैस बरकत दित्ती।

दुई सालां केरे बाद, युसफ हेजु भी कैदखाने मां थियो, भले तै बेकुसूर थियो। एक्की राती, फिरौन, ज़ेन्च़रे की मिस्री लोक अपने राज़न फुकारते थिए, राज़े दुई सुपनां हेरां ज़ैनेईं तै बड़ो बेचन कियो। ते तैसेरे सलाहाकारन मरां केन्चे भी तैसेरे सुपनेरो मतलब न जोइ बटो।

ते परमेशरे युसफे सुपनां केरो मतलब ज़ोनेरी काबलीत दितोरी थी। एल्हेरेलेई फ़िरैने युसफे कैदखाने मरां एप्पु कां कुजव ते युसाफे तैस तैसेरे सुपनां केरो मतलब ज़ोव ते तैनी ज़ोवं, “परमेशर सत साल बड़ी फसल भोनेरां बाद सत साल अकला भेज़ने बालोए।”

फ़िरैने युसफ एत्रो रोड़ो लगो कि तैनी युसफ मिस्रेरो शक्तिशाली दुइयोवं मैनू बनाव।

युसफे लोकन करां रोड़ी फसलन बाले सत सालन मं बड़ू अन जमा केरनेरे लेई ज़ोवं। ते ज़ैखन सत सालां केरो अकाल पेव। तैखन युसफे लोकन जो तैन अन बेचू ताकी तैन कां खानेरे लेई भोए।

तै अकाल सिर्फ मिस्र मुल्खे मां नईं, पन कानान मुल्खे मां भी बड़ो थियो ज़ैड़ी याकूब ते तैसेरू परिवार रहतू थियूं।

ते एल्हेरेलेई याकुबे अपनां मट्ठां अन घिन्ने मिस्र मुल्खे मां भेज़ां, ते ज़ैखन तैना युसफेरे सामने खड़ां भोआं त तैनेईं अपनो ढ्ला युसफ न पिशानो पन युसफे तैना पिशाने।

ई पतो केरनेरे लेईं की कुन तैना बेद्लोरेन की नईं एह चांच केरनेरे बाद, युसफे तैन सीं ज़ोवं, “अवं तुशो ढ्ला यूसुफ अईं! डरा न। ज़ैखन तुसेईं अवं गुलाम भोनेरे लेईं बेच़ोरो थियो त तुसेईं बुरू केरनू सोचू, पन परमेशरे तै बुराई भलैइयरे लेई इसतमाल की! एज्जा ते मिस्र मुल्खे मां राथ ताकि अवं तुश्शे ते तुश्शे परीवारां केरे लेई रोटारो इंतज़ाम केरि बेटी।”

ज़ैखन युसफेरे ढ्ला घरे वापस आए। ते अपने बजी याकूबे सीं ज़ोवं कि यूसुफ हेजु भी ज़ींतोए त तै बड़ो खुश भेवरो थियो।

हालाकि याकूब अक बुढो मैनू थियो, फिरी भी तै अपने पूरे परिवारे सीं साथी मिस्रे मां जो च़लो जेव, ते तैना तैड़ी बेस्सी जे। याकूबेरे मरनेरे पेइले, तैनी अपने सैरी मट्ठन बरकत दित्ती।

करारेरो तै वादो ज़ै परमेशरे अब्राहमे सीं कियोरो थियो तै इसाके पुड़रां याकूबे पुड़, ते याकूबेरां बाद तैसेरे 12 मट्ठन ते तैनकेरे परीवरान पुड़ अव। तैना 12 मट्ठन इस्राएलेरे 12 गोट्लन ज़ोतन।