10. दश आफतां।

परमेशरे मूसा ते हारून खबारदार किये कि फिरौनेरो मन सखत भोइ गालो। ते ज़ैखन तैना फिरौने कां जे त तैनेईं ज़ोवं, “इस्राएलेरो परमेशर इन ज़ोते, ‘मेरे लोकन गाने दे!’” पन फिरौने तैन केरि न शुनी ते इस्राएली गानेरे लेई अज़ादत देनेरे बजाए तैनी तैन्न होरि भी सकथ महनत केरनेरे लेई मजबूर किये।

फिरौन तैन लोकन आज़ाद भोइतां गानेरे लेई लगातार इन्कार केरतो राव, एल्हेरेलेई परमेशरे मिस्रे पुड़ दश बेड़ी बेड्डी आफतां भेज़ी। एना आफतां केरे ज़िरये, परमेशरे फिरौने हिरवं कि तै फिरौन ते मिस्रेरे देबतन करां शक्तीशालीए।

परमेशरे नील दरिया खूने मां बदलो, पन फिरौने फिरी भी इस्राएली लोक आज़ाद भोइतां गाने न दित्ते।

परमेशरे पूरे मिस्र मुल्खे मां मैडू भेज़ां। फिरौने मैडू दूर केरनेरे लेईं मूसा कां गुज़ारिश की। पन सब मैडू केरे मरनेरे बाद, फिरौने अपनो मन सख्त कियो ते इस्राएली मिस्रे मरां गाने न दित्ते।

एल्हेरेलेइ परमेशरे जिवां केरि आफत भेज़ी। ते तैलां बाद तैनी मश्शां केरि आफत भेज़ी। ते फिरौने मूसा ते हारून कुजाए ते तैन्न सीं ज़ोवं, कि अगर तैना इस अफती रोकन त इस्राएली मिस्रे मरां आज़ाद भोई सखतन। ते ज़ैखन मूसा प्राथना की त परमेशरे मिस्रे मरां मश्शे दूर किए। पन फिरौने अपनो मन सखत कियो ते तैना लोक आज़ाद भोइतां गाने न दित्ते।

इसेरे अलावा परमेशरे मिस्री केरे सब पैलतू जानबर बिमैरी सीं मरने दित्ते। पन फिरौनेरो मन सखत भोइ जेवरो थियो ते तैनी इस्राएली लोक आज़ान भोने दित्ते।

तैखन परमेशरे मूसा सीं फिरौनेरे सामने हावी मां मंज़न शारनेरे लेई ज़ोवं। ज़ैखन तैनी एन कियूं त मिस्री लोकां केरे पूरी जानी पुड़ तकलीफ देने बाले फोड़े निस्से, पन इस्रयाली लोकन किछ न भोवं। ते परमेशरे फिरौनेरो मन सखत कियो, ते फिरौने इस्राएली लोक मिस्रे मरां आज़ाद भोइतां गांने न दित्ते

एसेरां बाद, परमेशरे आण भेज़ी ते मिस्रेरी फसलां नाश की ते ज़ै कोई बेइर निस्सो तै आणी सीं मेरि जेव। फिरौने मूसा ते हारून कुजाए ते तैन सीं ज़ोवं, “मीं पाप कियोरोए। तुस लोक गेइ सखतथ।” ते मूसा प्राथना की, ते अम्बरेरां आण बखनी बंद भोई।

पन फिरौने फिरी पाप कियो ते अपनो मन सख्त कियो। ते तैनी इस्राएली आज़ाद भोइतां गाने न दित्ते।

ते परमेशरे मिस्र मुल्खे पुड़ टिटां एजने दित्तां। तैन टिटेईं तै सारी फसल खई ज़ै आणी करां नाश भोने करां बंच़ोरी थी।

फिरी परमेशरे आंधरू कियूं ज़ैन ट्लेई दिहैड़न तगर रावं। एरू आंधरू थियूं कि मिस्री लोक अपने घरन मरां बेइर न निस्सी बटे। पन ज़ैड़ी इस्राएली लोक रहते थिए तैड़ी लौ थी।

इनां नव आफतां केरे बाद भी, फ़िरौने इस्राएली लोक आज़ाद भोइतां गाने करां इंकार कियूं। किजोकी फिरौने न थियूं शुनोरू एल्हेरेलेइ परमेशरे अक आखरी आफत भेज़नेरी योजना बनाई। एह फिरौनेरे मने बदलेली।