7. परमेशर याकूबे बरकत देते।

ज़ैखन इसहाकेरे मट्ठां जुवान भोआं त तैसेरू निकड़ू मट्ठू याकूब घरे रांनू पसंद केरने लगु। पन एसावे जानबरां केरो शिकार केरनो पसंद अव। रिबका याकूबे सेइं जादे प्यार केरती थी, पन इसहाक इसावे सेइं जादे प्यार केततो थियो।

एक्की दिहाड़े एसाव शिकार केरतां वापस अव त तैस बड़ी ढ्लुख लगोरी थी। ते एसावे याकूबे सीं ज़ोवं, “ज़ैन तीं बनेवरू तैस मरां थोड़ू ज़ेरू मीं भी खाने जो दे।” याकूबे जुवाब दित्तो, “पेइलो मीं सीं ई वादो केर कि तू बडू मट्ठू भोनेरे वजाई सीं हर चीज़ ज़ै तीं मैलनीए तैन सब किछ तू मीं देलो।” ते एसावे याकूबे सीं सब किछ देनेरो वादो कीयो। तैखन याकूबे तैस खाने जो दित्तू।

इसहाक एसावे बरकत देनी चातो थियो। पन स करां पेइलू कि तै न केरे, रिबका ते याकूबे मिलतां एसाव भोनेरो ढोंग केरतां तैस सीं धोखो कियो। इसहाक बुढो थियो ते तैस लेइहोतू न थियूं। एल्हेरेलेइ याकूबे एसावेरां लिगड़ां लां ते छ़ेल्लरी खाड़ी अपने पैखड़न ते गले सीं पलैट्टी।

याकूब इसहाके कां अव ते तैस सीं ज़ोवं, “अवं एसाव आईं अवं एल्हेरेलेइ एवरोईं कि तू मीं बरकत दे।” ते ज़ैखन इसहाके छ़ेल्ली केरे झ़डन सीं हाथ लव ते लिकड़ां केरि मुश्क शीन्घी, त तैनी सोचू कि एसावे ते तैनी तैस बरकत दित्ती।

एसाव याकूबे पुड़ ज़लो, किजोकि याकूबे तैसेरू बड्डू भोनेरू हक नीयोरू थियूं। ते साथी तैसेरी बरकतां भी च़ोरी ते एसावे अपने बाजी इसहाकेरे मरनेरे बाद याकूबे मारनेरी योजना बनाई।

पन रिबकां एसावेरी योजना शुनी। एल्हेरेलेइ तैसां ते इसहाके याकूबे अपने रिश्तेदारन कां रानेरे लेई बड़े दूर भेज़ो।

याकूब बड़े सालन तगर रिबकारे रिश्तेदारन सीं साथी राव। ते तैस वक्तेरे दौरान तैनी ड्ला बनाव ते तैसेरां 12 मट्ठां ते अक कुई भोई। ते परमेशरे तै बड़ो धनी बनाव।

20 सालन तगर कनान मुल्खे मां अपने घरे करां दूर रांनेरे बाद, याकूब अपने टब्बरे अपने नौकरन, ते अपने सारे जानबर घिन्तां वापस आव।

याकूब इस वजाई सीं बड़ो डरोरो थियो, किजोकि तैनी सोचू कि एसाव हेजु भी तैस मारने चातो थियो। एल्हेरेलेइ तैनी तौफे मां बड़े जानबर एसावे कां भेज़े। ज़ैना नौकर जानबर घिन्तां एवरे थिये तैनेईं तैस सीं ज़ोवं, तेरो दास याकूब इनां जानबर तीं देते त तै जल्दी एज्जी रहोरोए।”

पन एसाव हुनी याकूबे नुकसान पज़ानो न चातो थियो, एसेरे बजाए, तै तैस एक्की बार दुबरां फिरि हेरतां बड़ो खुश थियो। ते तैलां पत्ती याकूब कनाने मां सुखे सीं रांने लगो। फिरी इसहाक मेरि जेव ते याकूब ते एसावे तै दब्बो। ते करारेरो वादो ज़ै परमशरे अब्राहमे सीं कीयोरो थियो तै इसहाके करां याकूबे पुड़ एज्जी जेव।