6. परमेशर इसहाकेरे लेई इंतज़ाम केरते।

ज़ैखन अब्राहम बड़ो बुढो भोई जेव त तैसेरू मट्ठू ड्लानेरू भोई जेवं। ते एल्हेरेलेइ अब्राहमे अपनो अक सेवक इसहाकेरे लेई लाड़ी अन्ने तैस मुल्खे मां भेज़ो ज़ैड़ी तैसेरे रिश्तेदार रहते थिये।

ज़ैड़ी अब्राहमेरे रिश्तेदार रहते थिये तैस मुल्खे मां गानेरे बड़े लम्मे सफ़रेरां बाद परमेशरे अब्राहमेरो सेवकेरी रिबका नंव्वेरे एक्की कुइए सीं मुलाकात करावाई तै अब्र्हामेरे ढ्लाएरी पोट्लड़ी थी।

रिबका अपनू टब्बर छ़ेडतां अब्राहमेरे सेवके सीं साथी गांनेरे लेई मेनी जेइ। ते ज़ेरां तैना पुज़ां इसहाके रिबका ड्ला बनाव।

किछ च़िरेरां बाद, अब्राहम मेरि जेव। तैखान परमेशरे अब्राहमेरे मट्ठे इसहाके अब्राहामे सीं कियोरे करारेरे वजाई सीं बरकत दित्ती। तैस करारे मां परमेशरेरो अक वादो थियो कि अब्राहमेरी औलाद बेशुमार भोली। पन इसाकेरी कौन्श रिबका औलाद न भोई।

इसहाके रिबीकारे लेई प्राथना की ते परमेशरे तैसरे गर्भे मां दूई बच्चे दित्ते, ज़ैस वक्त बच्चे तैसेरे गर्भे मां थिये तैना एप्पू मां मेइं लड़ने लगे, एल्हेरेलेई ज़ैन किछ भोई रावरू थियूं तैन रिबका परमेशरे सीं ज़ोवं।

परमेशरे रिबका सीं ज़ोवं, “तू दुई मट्ठन ज़र्म देली ते तैन्न करां दुई अलग-अलग दुई ज़ातां बेनेली तैना एक्की होरी सीं लाड़ेले। पन बड़े मट्ठे सीं पैदा भोने बाली ज़ात निक्ड़े मट्ठे सीं भोने बैली ज़ातरो हुक्म मन्नो पेलो।”

ज़ैखन रिबीकरे बच्चां केरू ज़र्म भोवं, त बडू मट्ठू लाल ते बालन बालू थियूं ते तैनेइं तैसेरू नवं एसाव रख्खू ते फिरी निकड़ू मट्ठू एसावेरी थूड़ी ट्लेइतां ज़र्मू ते तैनेईं तैसेरू नवं याकूब रख्खू।