5. वादेरू मट्ठू

अब्राम ते तैसेरी लाड़ी सारै कनान मुल्खे मां पुज़नेरे 20 सालां केरे बाद हेजु तगर भी तैन कोई औलाध न थी। परमेशरे अब्रामे सीं ज़ोवं ते दुबारा वादो कियो कि तीं अक मट्ठू भोलू ते तैसेरू खादान अम्बरेरे तारां केरू ज़ेरू भोलू। अब्रामे परमेशरेरे वादे पुड़ विश्वास कियो।

त अब्रामेरे लैड़ां तैस सीं ज़ोवं, “हेर परमेशरे मीं औलाद नईं दित्तोरीए, एल्हेरेलेइ अवं तीं कां बिनती केरचां कि तू मेरी नौकरैनी हाजिरा कां गा। त तैस सीं ड्ला बना ताकि तैसेरे ज़िरिये मेरे लेइ औलाद भोए।

ते अब्रामे हाजिरा सीं ड्ला बनाव। फिरी हाजिरा अक मट्ठू ज़ावं, ते अब्रामे तैसेरू नवं इशमाएल रखु। अब्राम चातो थियो कि परमेशर इश्माएले बरकत दे। पन परमेशरे ज़ोवं, “अवं तैस बरकत देइलो, पन इश्माएल वादेरू मट्ठू नईं। एल्हेरेलेइ अवं अपनो करार तैस सीं न केरेलो।”

“तेरी लाड़ी सारै तीं सीं अक मट्ठू भोलू। तैन वादेरू मट्ठू भोलू। तू तैसेरू नवं इसहाक रेख्खां। मेरो करार तैस सीं भोलो, ते तै अक बड्डी कौम भोली।” परमेशरे ज़ोवं कि हुनी तेरू नवं अब्राम न भोइतां अब्राहम भोलू, ज़ैसेरो मतलब आए, “मूल बाजी” परमेशरे सारैरू भी नवं बेदलतां सारा रख्खू, ज़ैसेरो मतलब आए, “मूल अम्मा”

आखरी मां, ज़ैखन अब्रामेरी उमर 100 साल ते सारारी उमर 90 साल भोई, त सारा अब्राहमेरे मट्ठे ज़र्म दित्तू। तैनेईं तैसेरू नवं इसहाक रख्खू, ज़ेन्च़रे कि परमेशरे ज़ोवरू थियूं।

ज़ैखन इसहाक जुवान भोव, त परमेशरे इन जोइतां अब्राहामेरी अज़मेइश की, “अब्रहाम अपने एकलौते मट्ठे इसहाकेरी होमबलि च़ाड़। अब्राहामे परमेशरेरो हुक्म मन्नो, ते अपने मट्ठेरी बली देनेरे लेइ तियर भोव।

ज़ैखन अब्राहम ते इसहाक बलि च़ाड़नेरे जीगाई जो च़लोर थिये, त इसहाके पुछ़ू, “हे बाजी असन कां बलि केरनेरे लेई अग ते कैड़ू त आन; पन बलि देनेरे लेई गबड़ू कोड़ीए?” अब्राहमे जुवाब दित्तो कि बेलरे लेई गबड़ेरो इंतजाम परमेशरे एप्पू कमालो।

तैखन अब्राहमे तैड़ी बलि देनेरी जगा बनेइतां कैड़ू अकोट्ठां केरतां रख्खां ते अपनू मट्ठू इसहाक बेन्धतां बलि देनेरी जगारे कैड़न पुड़ रेखी छ़ड्डू। त ज़ेरो तै अपने मट्ठे मारने पुड़ थियो, त परमेशरे ज़ोवं, “रुक”! मट्ठे पुड़ हथ न च़ला, ते न तैस सेइं किछ केर। किजोकि तीं मीं करां अपनू अक्के बल्के ज़ैन तेरू एकलौतू मट्ठू आए रेखी न छ़ड्डू; ऐस सीं अवं सेमझ़ी जेवरोईं कि तू परमेशरेरो डर मन्तस।

तैखन अब्राहमे तक्कू ते कुन हेरते कि तैस पत्र अक हुड़ झ़ल्लन मां फसोरोए। ते अब्राहमे गेइतां तै हुड़ नेव ते अपने मट्ठे इसहाकेरे बदले बलि कियो। अब्राहमे बड़े खुशी सीं तैस हुड़ेरी बलि दित्ती।

फिरी परमेशरे अब्राहमे सीं ज़ोवं कि, “तू मीं अपनू सब किछ देनेरे लेइ तियार भोव, इड़ी तगर कि तीं अपनू एकलौतू मट्ठू भी न रेख्खी छ़ड्डू, एल्हेरेलेइ अवं तीं ज़रूर बरकत देइलो।” ते ज़रूर तेरे खानदाने अम्बरेरे तारां केरे ज़ेरे बेशुमार केरेलो। ते धेरतरी सैरी कौमां तेरे वजाई सीं अपने आपे जो धन ज़ोली; किजोकि तीं मेरी गल मन्नोरीए।