4. अब्रामे सीं परमेशरेरो करार।

हड़ैइयरे बड़े सालां केरे बाद, दुनियाई मां बड़े लोक रहते थिये, ते तैनेईं फिरि परमेशरेरे ते एक्की होरेरे खिलाफ पाप कीयो। किजोकि तैन सेभी केरि अक्के बोली थी, ऐल्हेरेलेइ तैना सब अकोट्ठे भोए ते पूरी धेरती मां भेरोनोरे परमेशरेरे हुक्मेरे खिलाफ तैनेईं अक नगर बनावं।

तैना बड़े घुमंडी थिये, परमेशरे ज़ैन ज़ोवरू थियूं तैसेरी तैनेईं कोई परवाह न की। इड़ी तगर कि तैनेईं अक एरो मीनार बनानो शुरू कियो, ज़ै अम्बरे तगर पुज़ी सके। तैखन परमेशरे हेरू कि अगर तैना साथी मिलतां बुराई केरते राले, त तैना बड़ां पापेरां कम्मां केरेले।

एल्हेरेलेइ परमेशरे तैन केरि भाषा अलग-अलग की ते तैना सैरी दुनियाई मां फैलाए। ते ज़ैन नगर तैनेईं बनानु शुरू कियोरू थियूं तैस जो बाबेल ज़ोने लगे, ज़ैसेरो मतलबे “गड़बड़ी”।

बड़े सालां केरे बाद, परमेशरे अब्राम नव्वेंरे एक्की मैनू सीं गल की। परमेशरे तैस सीं ज़ोवं, “अपने मुल्ख ते अपने टबरे छ़ेडतां तैस मुल्खे मां च़ेली गा ज़ै अवं तीं हिरेइलो। अवं तीं बरकत देलो, ते तीं मरां अक बड़ी बड्डी कौम बनालो। अवं तेरू नवं महान केरेलो ते ज़ै तीं बरकत दे अवं तैस बरकत देलो ते ज़ै तीं फिटकार देन, तैस अवं फिटकार देलो। ते दुनियारे सारे लोकन तेरे ज़िरिये बरकत मैलेली।

ते अब्रामे परमेशरेरी गल मन्नी। तैनी अपने सारे सेवकन ते अपने पूरी जाइदात सने अपनी लाड़ी सारा एप्पु सीं साथी नी, ते तैस मुल्खे जो, येनी कनान मुल्खे जो च़लो जेव ज़ै परमेशरे तैस हिरेवरो थियो।

ज़ैखन अब्राम कनान मुल्खे मां पुज़ो त परमेशरे तैस सीं ज़ोवं, “अपने च़ेवरे पासन तक। किजोकि अवं ई मुल्ख तीं ते तेरे औलादी देलो ते इस मुल्खे पुड़ तेरी औलाद हमेशा अधिकार रखेली।” तैखन अब्राम तैस मुल्खे मां बेसी जेव।

मलिकिसिदक नव्वेंरो अक मैनू थियो तै महान परमेशरेरो याजक थियो। एक्की दिहाड़े ज़ैखन अब्राम जंग लड़नेरां बाद एज्जी रहोरो थियो त तैसेरी मुलाकात तैस सेइं भोई। ते मलिकिसिदके अब्रामे बरकत देइतां ज़ोवं, महान परमेशर ज़ै ज़मीन ते अस्मनेरो मालिके तै तीं बरकत दे।” ते फिरी अब्रामे जंगी मरां ज़ींतोरी हर एक्की चीज़रो दशोवं हिस्सो मलिकिसिदके दित्तो।

बड़े साल बीते, पन हेजु तगर अब्राम ते सारै कोई औलाद न थी। परमेशरे अब्राममे सीं गल की ते फिरि तैस सेइं वादो कियो कि तीं अक मट्ठू भोलू ते ज़ेन्च़रे अम्बरेरे तारेन तेन्च़रे तैसेरू बड़ू खानदान भोलू। अब्रामे परमेशरेरे वादे पुड़ विश्वास कियो। ते परमेशरे ऐलान कियूं कि अब्राम अक धर्मी मैनू थियो किजोकि तैनी परमेशरेरे वादे पुड़ विश्वास कियोरो थियो।

तैखन परमेशरे अब्राम सीं अक करार कियो। आम तोरे पुड़ करार दूई टोलन एप्पु मामेईं एक्की होरेरे लेइ कम्मां केरनेरो अक समझोतो भोते। परमेशरे अब्रामे सीं तै वादो तैखन कियोरो थियो, ज़ैखन अब्राम झ़ुलोरो थियो, पन तै तैखन भी परमेशरेरी गल शुनी सखतो थियो। ते परमेशरे ज़ोवं, “अवं तीं अक मट्ठू देलो ज़ैन तेरे ज़रिये पैदा भोलू तैन तेरू अपनु मट्ठू भोलू। अवं तेरे औलाधी ई कनान मुल्ख देताईं।” पन हेजु तगर अब्रामे कोई मट्ठू न थियूं।