49. परमेशरेरो नंव्वो करार।

एक्की स्वर्गदूते एक्की जुवान कौन्शी मर्यमी सीं ज़ोवं, कि तै परमेशरेरे मट्ठे ज़र्म देली। तै हेजू कुवारी थी, पन पवित्र आत्मा तैस पुड़ सायो कियो ते तै दोज़ींती भोई। तैसां एक्की मट्ठे ज़र्म दित्तू ज़ैसेरू नंव तैसां यीशु रख्खू। एल्हेरेलेई, यीशु परमेशर भी आए ते मैनू भी आए।

यीशुए बड़े चम्तकार किये ज़ैना हिरातन कि तै परमेशरे। तै पैनी पुड़ च़लो ते तैनी अंधी-तौफान शांत कियो। तैनी बड़े बीमार लोक बाझ़ाए ते होरे भी बड़े मैनू बझ़ाए ज़ैन पुड़ भूतां केरो सायो थियो। तैनी मरोरे लोक ज़ींताए, ते तैनी पंच़ रोट्टी ते दूई मेछ़ली 5000 मैन्न दित्ती ते तैना सब रज़्ज़े।

यीशु अक शिक्षा देने मां भी अक महान गुरु थियो। ज़ैन किछ भी तैनी शिखालू, तैन तैनी रोड़े च़ारे शिखालू। ज़ैन तै लोकन केरनेरे लेईं ज़ोते त तैने कियोरू लोड़े। किजोकी तैन परमेशरेरू मट्ठू आए। ज़ेन्च़रे कि तैनी शिखालू कि तुसेई होरी लोकन सीं तेन्च़रे प्यार केरनोए ज़ेरो प्यार तुस अपने आपे सीं केरतथ।

तैनी शिखालू कि तुसेईं सेभी चीज़न करां भी ज़ैदां ते एपनी जाइदाती करां भी ज़ैदां परमेशरे सीं प्यार रखोरो लोड़े।

यीशुए ज़ोवं, कि कोन्ची भी चिज़ी हासिल केरने करां ज़ैदां रोड़ू इने कि मैनू परमेशरेरे राज़े मां भोए। तुस्न तैसेरे राज़े मां गंनेरी ज़रुरते कि परमेशर तुस्न तुश्शे पापन करां बंचाए।

यीशुए ज़ोवं कि किछ लोकन ज़ैनां तैस कबूल केरेले। परमेशर तैन लोकन ज़ोलो। पन होरे लोक तैस कबूल न केरेले। तैनी इन भी ज़ोवं कि किछ लोक रोड़ी ज़मीनरे ज़ेरेन, किजोकी तैना यीशुएरे बारे मां खुशखरी कबूल केरतन, ते परमेशर तैन बंच़ाते। पन किछ लोक बत्ती बैली सख्त ज़मीनारे ज़ेरेन। परमेशरेरू वचन बीज़ेरू ज़ेरूए, ज़ैन बत्ती मां बिछ़ड़ते, तैड़ी किछ भी न लगे। एना लोक यीशुएरे बारे मां खुशखबरी शुनातन। पन तैना तैसेरे राज़े मां शामिल भोने करां इन्कार केरतन।

यीशुए ज़ोवं, कि परमेशर पैपन सीं प्यार केरते। तै तैन माफ़ केरनू चाते। तै तैन अपने बच्चे बन्नने चाते।

यीशुए इन भी ज़ोवं कि परमेशर पापे सीं नफ़रत केरते। किजोकी आदम ते हव्वां पाप कियो। एल्हेरेलेई तैन केरे सारे वंशेरे लोकेईं भी पाप कियो। इस संसारे मां राने बालो हर कोई मैनू पाप केरते। ते परमेशर तैस करां दूरे। हर कोई मैनू पापेरे वजाई सीं परमेशरेरो दुश्मने।

पन परमेशरे इस दुनियाई मां राने बाले हर एक्की मैनू सीं एरो प्यार कियो। तैनी अपनू एकलौतू मट्ठू दित्तू ताकि ज़ै कोई भी तैस पुड़ विश्वास केरे तै नाश न भोए पन हमेशारी ज़िन्दगी हासिल केरे। इलहेरे बाजाए, तैना तैस सीं साथी हमेशा राले।

तुस मरनेरे कबील आथ, किजोकी तुसेईं पाप कियोरेन। तुसन पुड़ परमेशरेरी सरक भोनी जैइजे, ते एलहेरी बाजाए, तै यीशु पुड़ सेरकोव। तैनी यीशु क्रूसेरी मौत देइतां तैस सज़ा दित्ती।

यीशुए कधी पाप न कियो, पन तैनी परमेशरेरी तै सज़ा कबूल की। तैनी मरनू कबूल कियूं। एस तरीके सीं, तुश्शे पापन ते इस सांसरे मां राने बाले हर मैनेरे पाप तैनी एप्पू पुड़ नीये ते तैसेरू तैन सिद्ध बालीदान थियुं। यीशुए अपनो आप परमेशरे कां बालीदान कियो, एल्हेरेलेई परमेशर कोई भी पाप इड़ी तगर कि बडे करां बडो पाप यीशुएरे नव्वें सीं माफ केरते।

भले ही तुस भलां कम्मां केरतथ, त इसेरे ज़िरिहे परमेशर तुस्न न बंच़ालो। तैसेरो दोस्त बन्नेरेलेंई एरू किछ भी नईं ज़ैन तुस केरि बटतथ। इसेरे बजाए, तुसेई विश्वास केरनोए कि यीशु परमेशरेरू मट्ठू आए, ते तै तुश्शे बदले क्रूसे पुड़ मरोरोए, अगर तुस इस गली पुड़ विश्वास केरथ, त परमेशर तुस्न तुश्शे पापां केरि माफी देलो।

परमेशर हर एक्की तैस मैनू बंचालो ज़ै यीशु पुड़ विश्वास केरते ते तैस अपनो प्रभु कबूल केरते। पन तै तैन न बंचालो ज़ैना तैस पुड़ विश्वास न केरन। इस सीं कोई भी फरक न पे, कि तुस बड़े अमीर या गरीब आथ, मड़द या कौन्श, बुढो भोए या बुढी या जुवान, या तुस कोड़ी रातथ। तुस कोस मुल्खेरेथ, परमेशर तुस्न सीं प्यार केरते ते चाते कि तुस यीशु पुड़ विश्वास केरथ ते परमेशर तुश्शो दोस्त बेनी गाए।

यीशु तुस्न कुजाने लगोरोए कि तुस तैस पुड़ विश्वास केरतथ ते बपतिस्मो नेथ। कुन तुस विश्वास केरतथ कि परमेशरेरू एकलौतू मट्ठू, यीशु ही मसीह आए? कुन तुस विश्वास केरतथ कि तुस पापीथ ते इन कि तुस इस कबलथ कि तुस्न परमेशरे करां सज़ा मैल्ले? कुन तुस विश्वास केरतथ कि यीशु तुश्शे पापन मिटानेरे लेई क्रूसे पुड़ मरो?

अगर तुस यीशु पुड़ ते ज़ैन किछ तैनी तुश्शे लेई कियूं तैस पुड़ विश्वास केरतथ, त तुस अक मसीही मैनूथ! शैतान हुनी अपने अंधरेरे राज़े मं तुस्न पुड़ राज़ न केरे। हुनी परमेशर अपने लोआरे राज़े मां तुस्न पुड़ राज़ केरते। तैनी हुनी तुस पाप केरने करां रोकनेथ, ज़ैन तुस केरते थिए। तैनी तुस्न अक नव्वीं ज़िन्दगी दित्तोरीए।

अगर तुस अक मसीही मैनूथ त ज़ैन यीशु मसीहे कियोरूए तैसेरे वजाई सीं परमेशरे तुश्शे पाप माफ़ कियोरेन। हुनी, परमेशर तुस्न एक्की दुशमनेरां इलावा अक अच्छो दोस्त मन्नते।

अगर तुस परमेशरेरे दोस्तथ ते प्रभु यीशुएरे सेवकथ त तुस तैना गलां मन्नेरी इच्छा केरेले ज़ैना यीशु तुस्न शिखालते। भले ही तुस अक मसीह आथ, शैतान हेजु भी पाप केरनेरे लेई तुस्न खीचेलो। पन परमेशर हमेशा तैन केरते तै इन केरते। तै ज़ोते कि अगर तुस अपने पापन मन्थ त, तै तुस्न माफ़ केरेलो। तै तुस्न पापां केरे खिलाक लाड़नेरी शक्ति देलो।

परमेशर तुस्न प्राथना केरने ते वचन पड़नेरे लेई ज़ोते। तै तुस्न होरी विश्वासी लोकन सीं मिलतां परमेशरेरी आराधना केरनेरे लेई ज़ोते। अगर तुस एना सब कम्मां केरथ, त तुस तैसेरे पक्के दोस्त बनेले।