48. यीशु वादो कियोरो मसीहे।

ज़ैखन इन सांसार बनेवरू थियुं त सब किछ रोड़ू थियुं। ते कोई भी पाप न थियो। आदम ते हवा एक्की होरी सीं प्यार केरते थिए, ते तैना परमेशरे सीं प्यार केरतां थियां। कोई बिमारी या मौत न थी। परमेश एरू संसार चातो थियो।

शैताने सपरे ज़िरिहे सीं बागी मां हव्वी सीं गल की, किजोकी तै तैस धोखो देनो चतो थियो। तैखन हव्वां ते अदमे परमेशरेरे खिलाफ पाप कियो। किजोकी तैनेईं पाप कियोरो थियो। एल्हेरेलेई धेरती पुड़ रानेबाले सब मरतन।

अदमे ते हव्वां पाप कियोरो थियो। एल्हेरेलेई किछ होरू भी बुरु भोवं। तैना परमेशरेरे दुशमन बेनी जेआं। ज़ैसरो नतीजो ई भोव, कि तैखनेरे देंते हर एक्की मैने पाप कियोरोए। हर कोई ज़र्मे करां परमेशरेरो दुश्मने। परमेशर ते मैन्न एप्पू मांमेइं मेल मिलाप न थियो। पन परमेशर शान्ति कायम केरनी चातो थियो।

परमेशरे वादो कियो कि हव्वारे वंशे मरां अक शैतानेरी क्रोड़ी ढै्लन्च़ेलो। तैनी इन भी ज़ोवं कि शैतान तैसेरी थूड़ी पुड़ी टाक देलो। होरी लबसन मां, शैतान मसीह मरेलो, पन परमेशर तैस फिरि ज़ींतो केरेलो। इसेरां बाद, मसीह शैतनेरी शक्ति हमेशारे लेई ख़त्म केरेलो। कई सालां केरे बाद, परमेशरे इन बांदू कियूं कि यीशु मसीह आए।

परमेशरे नूहे सीं अक किश्ती बन्नानेरे लेई ज़ोवं, ताके तै तैस हड़ाई करां अपनू टब्बर बच़ेई सके ज़ैस परमेशर भेज़नेबालो थियो। एस तरीके सीं परमेशरे तैना लोक बंच़ाए ज़ैना तैस पुड़ विश्वास केरते थिए। ते एन्च़रे, तैना सब परमेशरेरे मारनेरे काबल थिए किजोकी तैनेईं पाप कियोरो थियो। पन परमेशरे तैना सब बंचानेरे लेंई यीशु मसीह भेज़ो ज़ैना तैस पुड़ विश्वास केरतन।

हज़ारेईं सालन तगर, याजक परमेशरेरे लेई बेली च़ाड़ते राए। ते एन इन हिराते कि तैनेईं पाप कियोरेन, ते इन कि तैना परमेशरेरे सज़ारे किबल थिए। पन तैनकेरी बेली पापन माफ़ न थी केरी सेखती। यीशु सेभना बड्डो महायाजके। तैनी तैन कियूं ज़ैन याजकेईं न केरी बटु। तैनी अक्के बली दित्ती ते तैनी अपनी बली दित्ती ज़ै हर केन्चेरे पापन मटेइ सखती थी। तैनी इन कबूल कियूं कि परमेशर तैस सेभी केरे पापां केरे लेई सज़ा दे। एल्हेरेलेई, यीशु सिद्ध महायाजके।

परमेशरे अब्रहामे सीं ज़ोवं, “अवं तेरे ज़िरिहे संसारेरे सेभी कुलन बरकत देलो।” यीशु एस अब्रहामेरे खानदाने मरां थियो। परमेशर अब्रहामेरे ज़िरिहे सेभी कुलन बरकत देते, किजोकी ज़ैना यीशु पुड़ विश्वास केरतन परमेशर तैन सेभन पापे करां बच़ाते। ज़ैखन तैना लोक यीशु पुड़ विश्वास केरेले, त परमेशर तैन्न अब्रहामेरे वंशज मनेलो।

परमेशरे अब्रहामे सीं ज़ोवं कि तै अपने मट्ठे बलि केरे। पन फिरि परमेशरे इसहाकेरे बदले गबड़ू बली केरेनेरे लेई दित्तू। अस सब अपने पापां केरे लेई मौतरे काबल थिए! पन परमेशरे इश्शे जगाई मरनेरे लेई यीशु बली भोनेरे लेई दित्तो। ते एस वजाई सीं अस यीशु जो परमेशरेरू गबड़ू ज़ोतम।

ज़ैखन परमेशरे मिस्रे पुड़ अखीरी आफत भेज़ी त परमेशरे हर इस्राएली परिवारे सीं ज़ोवं, कि तैना एक्की गबड़े बली केरन। तैस गबड़े मां कोई दोष न लोड़े। तैखन तैनेईं तैस गबड़ेरो खून अपने दारन पुड़ लानो थियो। ज़ैखन परमेशरे तै खून लव त तैन्केरे घरे करां अग्रोवं जेव, ते तैन केरू बड्डू मट्ठू न मारू। ते ज़ैखन एन भोवं त परमेशरे एस जो फहस तिहर ज़ोवं।

यीशु फसहरे तिहारेरे गबड़ेरो ज़ेरोए। तैनी कधी पाप न कियो, एल्हेरेलेई तैस मां कोई भी दोष न थियो। तै फसहरे तिहारेरे वक्ते मरोरो थियो। ज़ैखन कोई यीशु पुड़ विश्वास केरते, तैखन यिशुएरो खून तैस मैनेरे पापां केरि कीमत चुकाते। एन एरू कि ज़ेन्च़रे परमेशर तैस मैनू करां अग्रोवं गाते, किजोकी तै तैस सज़ा न दे।

परमेशरे इस्राएली लोकन सीं अक करार कियो, किजोकी तैना एरे लोक थिए ज़ैना परमेशरे अपने भोनेरे लेई च़ुनोरे थिए। पन हुनी परमेशरे अक एरो करार कियोरोए ज़ै सेभी केरे लेइए। अगर कोन्ची भी कौमरो कोई भी मैनू तै करारे कबूल केरे, त तै परमेशरेरे लोकन मां शमिल भोते। तै एन एल्हेरेलेइ केरते किजोकी तै यीशु पुड विश्वास केरते।

मूसा अक एरो नबी थियो ज़ैनी परमेशरेरू वचन बेड़ी शक्ति सीं परचार कियोरू थियुं। पन यीशु सब नेबन करां महाने। तै परमेशरे, एल्हेरेलेई ज़ैन किछ भी तैनी कियूं ते ज़ोवं तैन परमेशरेरे कम ते वचने मरां थियूं। एल्हेरेलेई पवित्र-शास्त्र यीशु जो परमेशरेरू वचन ज़ोते।

परमेशरे दाऊद राज़े सीं वादो कियोयो थियो, कि राज़ेरे रूपे मां तैसेरे खानदाने मरां अक परमेशरेरे लोकन पुड़ सदा राज़ केरेलो। यीशु परमेशरेरू मट्ठू मसीह आए, एल्हेरेलेई तै दाऊदेरे राज़ेरे खानदाने मरां भी आए ज़ै हमेशारे लेई राज़ केरि सखते।

दाऊद त इस्राएलेरो राज़ो थियो, पन यीशु सारे दुनियारो राज़ोए! तै फिरि एजनोए ते हमेशारे लेई इन्साफ ते शैन्ती सीं अपनू राज़ केरेलो।