50. यीशु वापिस एजेलो।

लगभग 2,000 साल, पेइले संसारे मां सेभी जगान ज़ैदां करां ज़ैदां लोक यीशु मसीहेरे बारे मां खुशखबरी शुनेई राहोरेन। कलीसिया बधने लगोरीए। यीशु मसीहे वादो कियोरोए कि तै संसारे आखीरी मां वापस एजनोए। हालाकि हुना तगर यीशु मसीह वापस नईं एवरे, फिरी भी तै अपने वादे पूरे केरेलो।

हालाकी अस यीशुएरे वापस एजने बलगने लगोरेम, ते परमेशवर चाते कि अस एरी पवित्र ज़िन्दगी ज़ीम ज़ैस सीं तैसेरी आदर भोए। तै इन भी चाते कि अस होरन तैसेरे बारे मां ज़ोम। ज़ैखन यीशु मसीह इस दुनियाई मां थियो तैनी ज़ोवरू थियूं। मेरे चेले पूरे संसारे मां सैरी जगां केरे लोकन परमेशरेरे राज़ेरे बारे मां प्रचार केरेले, ते तैखन अन्त भोलो।”

बेड़ी लोकेईं हेजू तगर परमेशरेरे बारे मां नईं शुनोरू। स्वर्गे जो वापस गांने करां पेइले, यीशु मसीह तैन लोकन यीशुएरे बारे मां ज़ोनेरे लेई ज़ोवरूए। ज़ैनेईं तैसेरे बारे मां कधी नई शुनोरू। तैनी ज़ोवं, “गाथ ते सेभी कौमां केरे लोकन चेले बनथ!” कटनेरे लेई फसल पक्कोरीए।

यीशुए इन भी ज़ोवं, “कोई भी सेवक अपने मालिके करां बड्डो न भोए। इस सांसरेरे खास लोकेईं मीं सीं नफ़रत की, ते मेरे वजाई सीं तैना तुस्न भी सताले ते मारेले। इस संसारे मां तुसन कष्ट भोलो, पन मज़बूत बना, किजोकी मीं शैतान हराव, ज़ै इस सांसरे पुड़ राज़ केरते। अगर तुस आखरी तगर मीं पुड़ विश्वास केरेले त बंच़ेले!”

यीशुए अपने चेलन एन समझ़ानेरे लेई अक कहानी शुनाई, कि ज़ैखन संसरेरो अन्त भोलो त लोकन सीं कुन भोलू। तैनी ज़ोवं, “केन्ची मैने अपने उडारे मां रोडू बीज़ बेवं। ते ज़ैखन तै झ़ुलोरो थियो त तैसेरो दुश्मन अव ते गेहुन सीं साथी तैस्से उडारे मां जंगली बुट्टां केरू बीज़ बेवं, ते फिरि तै च़लो जेव।”

“ज़ैखन निक्के-निक्के बुट लगे त सेवकेईं तैस मैनू सीं ज़ोवं, ‘हे मालीक तीं अपने उडारे मां रोड़ू बीज़ बेवरू थियुं। त फिरी तैस मां जंगली बूटे किजो आन?’ तैनी मैने जुवाब दित्तो, ‘एह मेरो कोई दुशमने ज़ैनी एन कियोरूए।”

तैन सेवकेईं अपने मालिके जुवाब दित्तो, ‘कुन अस जंगली डाल पुटी छ़ाडम?’ तैनी मालिके ज़ोवं, नईं। अगर तुस एरू केरेले त तुसेंई किछ गेहुँ भी पुटनेन। कटैइयारे वक्ते तगर बलगा, तैखन जंगली डालां केरि कुमड़ी बनेइतां तैन्न अकोठे केरा, ताकि तुस तैन्न फुकी सखथ। पन गेवन मेरे उडारे मां अकोठे केरा।”

चेलेईं एस कहैनारो मतलब न समझ़ो, एल्हेरेलेई तैनेईं यीशु करां समझ़ानेरी बिनती की। यीशुए ज़ोवं, “रोड़ू बीज़ बेने बालो मैनू मसीहे हिराते। उडार सांसरे हीरेते। ते रोड़ू बीज़ परमेशरेरे राज़ेरे लोकन हीराते।”

जंगली पौदे तैस दुष्ट शैतानेरे लोकन हिरातन। तैस जंगली बीज़ बेनेबालो शैताने, ज़ैनी जंगली बीज़ बेव्वं। ते फसलारी कटाई इस संसारेरो अन्त हीराचे, ते कटाई केरने बाले परमेशरेरे स्वर्गदूतन।

ज़ैखन संसरेरो अन्त भोलो तैखन स्वर्गदूत तैन सेभन साथी अकोठे केरेले, ज़ैना शैतानेरेन। तैनां स्वर्गदूत तैन्न एक्की बेड़ी अग्गी मां शारेले। ज़ैना मैनू शैतानेरेन। तैन लोकन बड़ो ज़ैदां कष्ट भोलो ते अपने दन्त काटेले। पन ज़ैना लोक धर्मीन, ते तैनेईं यीशु मसीहेरी गल्लां मेन्नी, तैना बाजी परमेशरेरे राज़े मां दिहाड़ेरे ज़ेरे चम्केले।

यीशुए इन भी ज़ोवं, कि तै संसारेरो अन्त भोनेरे पेइले धेरती पुड़ एजेलो। तै तैसे तरीके सीं वापस एजनोएम ज़ेन्च़रे तै जेवरो थियो। मतलब, तैस कां असली शरीर भोनोए, ते तै अमबरे मां बिदलारी पुड़ सुवार भोइतां एजनोए। ज़ैखन वापस एजेलो त अस असमाने मां तैस सीं मिलमेले।

ते तैखन ज़ैनां मसीही लोक ज़ींते भोले त तैना बिदलारी मां उठाए गानेन। ते तैना होरी मैन्न मां शामिल भोनेन ज़ैनां मुड़दन मरां ज़ींते भेवरेन। तैना सब तैड़ी यीशु सीं साथी भोनेन। तैसेरे बाद, यीशु अपने लोकन सीं साथी रालो। ज़ैखन तैना साथी राले त तैन्न कां हमेशारे लेई शान्ति भोली।

यीशु पुड़ विश्वास केरने बाले मुकट देनेरो वादो कियोरोए। तैना हमेशारे लेईं हर एक्की चीजी पुड़ राज़ केरेले। तैन्न कां सिद्ध शान्ति भोली।

पन परमेशर तैना सेभी केरो इन्साफ केरेलो ज़ैनां यीशु पुड़ विश्वास न केरन। तै तैन्न नरके मां छ़डेलो। तैड़ी तैना लेरां देले ते अपने दन्त च़ापेले, ते तैनां हमेशा तकलीफी मां राले। कधी न हिश्ने बाली अग तैन्न लगातार फुकती राली, ते कीड़े तैन्न खाने करां न रुकेले।

ज़ैखन यीशु वापस एजेलो, त तै पूरे तरीके सीं शैताने ते ज़ैन तैसेरू राज़े तैस नाश केरेलो, तैना सेभन ज़ैनेईं परमेशरेरी गलां मन्नेरे बजाए शैताने पती च़लनू शुरू कियोरू थियुं।

किजोकी अदामे ते हव्वां परमेशरेरो हुक्म न थियो मन्नोरो ते इस संसारे मां पाप घिन्तां आं, परमेशरे संसारे शाप दित्तो ते तैन नाश केरनीरो फ़सलो कियो। पन एक्की दिहाड़ी परमेशरे अक नंव्वू अम्बर ते नव्वीं धरती बनालो ज़ैन सिद्ध भोलू।

यीशु ते तैसेरे लोक तैस नेव्वीं धेरती पुड़ राले, ते हामेशारे लेई सेभी चीज़न पुड़ राज़ केरेले। तै लोकन केरे एछ़ी केरां सारां एैन्खरू पुछ़ेलो। ते हुनी कोई भी कष्टे मां ते दुखी न भोलो। तैना तैड़ी लेरां न देले। यीशु अपनु राज़ इन्साफ ते शैन्ती सीं केरेलो। तै हमेशारे लेई अपने लोकन सीं साथी रालो।