47. फिलिप्पी मां पौलुस ते सीलास।

ज़ैखन शाउले पूरे रोमी राज़े मां जेव, तैनी अपने रोमी नव्वें पौलुसेरो इसतमाल केरनो शुरू कियो। एक्की दिहाड़े पौलुस ते सिलास फिलिप्पी नगरे मां यीशुएरे बारे मां खुशखबरी शुनाने लगे। तैना नगरे करां बेइर एक्की दरियाए कां जे ज़ैड़ी लोक प्राथना केरनेरे लेई अकोठे थिए। तैड़ी तैना लुदिया नव्वेंरी एक्की कौन्शी सीं मिले तै अक बुपारी थी। तै परमेशरे सीं प्यार केरती थी ते तैसेरी आराधना केरती थी।

परमेशरे लुदिया यीशुएरे खुशखेबरी पुड़ विश्वास केरनेरे लेई काबिल बनाई। पौलुस ते सीलासे तैस ते तैसारे परिवारे बपतिस्मो दित्तो। तैसां पौलुस ते सीलास अपने कां बिशनेरे लेई ज़ोवं, तैल्हेरेलेई तैना तैड़ी बिश्शे।

पौलुस ते सीलास हमेशा तैस जगाई लोकन सीं मिलते थिए। ज़ैड़ी यहूदी लोक प्राथना केरते थिए। हर रोज़ ज़ैखन तैना तैड़ी गाते थिए त अक कुई ज़ै दासी थी तैस पुड़ भूतेरो सायो थियो। ते तै तैन्न पतपती एइती थी। तैस भूतेरे मद्दती सीं तै लोकां केरे एजनेवाले वक्तेरे बारे मां ज़ोती थी। ते एल्हेरेलेई एजनेबाले वक्तेरे बारे मां ज़ोने बाली बेनतां तै अपने मालकां केरे लेई बड़ो पेंइसो कमाती थी।

तैनकेरे गंते बार तै कुई चिन्डां मारती थी, इना मैनू परम प्रधान परमेशरेरे सेवकन। एना तुस्न मुक्ति हासिल केरनेरी बत्तरे बारे मां लगोरेन ज़ोने!” तै रोज़ एरू केरती थी ज़ैस सीं पौलुस बड़ो प्रेशान भोव।

एक्की दिहैड़ी ज़ैखन तैसां दैसी कुइयां चिन्डां मैरनी शुरू की, त पौलुसे तैसारे पासे मुड़तां तैसमां ज़ैन भूत थियुं तैस सीं ज़ोवं, “यीशुएरे नव्वें सीं एस मरां निसी गा।” ते तैस मरां निस्सी जेवं।

तैसेरे मालिक बड़े सेरकोए। तैन पतो लगो कि तै भूतेरे बगैर हुनी एह दासी कुइ एजनेबाले वक्तेरे बारे मां ज़ोई न बटे। ते इसेरो मतलब थियो कि लोक तैसारे मालकन पेइसे न देले कि तै तैन ज़ोए कि एजने बाले वक्ते मां कुन भोनूए।

एल्हेरेलेई तैस दैसी कुइयारे मलिक पौलुस ते सिलास रोमी अधिकैरन कां नीए। तैनेईं पौलुस ते सिलासे मार दित्ती, ते फिरि तैना कैदखाने मां छ़ड्डे।

तैनेईं पौलुस ते सिलासेरे तैस हिस्से मां रख्खे ज़ैड़ी ज़ैदां पहरदार थिए। इड़ी तगर कि तैनेईं तैनकेरे पव्व लेकड़ारी बेड़न मां छ़ड्डे। पौलुस ते सिलास एधी राती परमेशरेरां भाजनां लगोरे थिए ज़ोने।

ते अचानक अक बड्डो भुन्ज़ल अव! तैखन सारां दारां खुली जेआं, ते सैरी कैदी केरि शंगलां खुल्ली जेई जेई।

तैखन दरोगा बींझ़ो। तैनी हेरू कि कैदखानेरां दारां खुलोरन। तैनी सोचु कि सारे कैदी नशोरेन। तै डरो कि तैन केरे नशने सीं रोमी अधकारी तैस मारले, एल्हेरेलेई तै अपने आपे मरनेरे लेई तियार भोव! पन पौलुसे तैस लेइतां ज़ोरे सीं हक़ दित्ती, “रुक! अपने आपे नुक्सान न पज़ा। अस सब इड़ी आम।”

तैनी दरोगा थरकते एइतां पौलुस ते सिलासे पुछ़ू, “मुक्ति हासिल केरनेरे लेई अवं कुन केरी?” पौलुसे जुवाब दितो, “प्रभु यीशु पुड़ विश्वास केर, त तू ते तेरो घरानो मुक्ति हासिल केरेलो।” तैखन तै दरोगा पौलुस ते सिलासे अपने घरे नेते ते तैनी तैनकेरे पव धोए। पौलुसे तैसेरे सारे घरेरे लोकन यीशुएरी खुशखाबरी शुनाई।

दरोगा ते तैसेरे पूरे परिवारे यीशु पुड़ विश्वास कियो, एल्हेरेलेई पौलुस ते सिलासे तैन्न बतीस्मो दित्तो। तैखन दरोगा तैन्न रोट्टी खुवाई, ते तैना बड़े खुश भोए।

ते होरसां नगरेरे लोकेईं पौलुस ते सिलास कैदखाने मरां आज़ाद किये ते फिलिप्पी मरां च़ले गंनेरे लेई ज़ोवं। पौलुस ते सिलास लुदिया ते होरी किछ दोस्तन सीं मिले ते तैलां बाद नगर छ़ेडतां च़ले जे। ते यीशुएरे बारे मां खुशखबरी शुनाते जे, ते कलीसिया बधती जेई।

पौलुस ते होरी मसीही अगुव्वे बड़े नगरन मां जे। तैनेईं लोकन यीशुएरे बारे मां खुशखबरी शुनाई। तैनेईं किलिसियारे लोकन उत्साहित केरने ते शिक्षा देनेरे लेई कई चिट्ठी भी लिखी। तैन्न मरां किछ चिट्ठी बाईबलारी किताबां बेनी जेई।