46. पौलुस यीशु पुड़ विश्वास केरते।

शाऊल नव्वेंरो अक मैनू थियो, ज़ैनी यीशु मसीह पुड़ विश्वास न थियो कियोरो। तै जुवान थियो, तैखन तैनी स्तिफनुसे मारने बालां केरां लिगड़ां सम्हालोरां थियां। बादे मां, तैनी विश्वासी सत्तए तैनी यरूशलेम नगरे मां घर-घर गेइतां मड़द ते कौन्शां ज़ैना भी यीशु पुड़ विश्वास केरते थिए ट्लेइतां कैदखाने मां छ़ाडेवरे थिए। तैखन महायाजके तैस दमिश्क नगरे मां गांनेरी अजाज़ात दित्ती। तैनी तैड़ी मसीही लोकन ट्लेइतां तैन्न यरूशलेम नगरे मां वापस अन्नेरे लेई शाऊले सीं ज़ोवं,

ते शाऊल दमिश्क नगरे जो च़लो। तैस नगरे मां पुज़नेरे थोड़े ज़ेरे पेइले, तैसेरे च़ेवरे पासन अम्बरेरां अक लौ चमकी, ते तै तल्ले जो बिछ़ड़ो। ते शाउले कोन्ची करां ज़ोतू शुनू, “हे शाउल! हे शाउल! तू मीं किजोकि स्तातस?” शाउले पुछ़, “हे प्रभु तू कौनस?” यीशुए तैस जुवाब दित्तो, “अवं यीशु आईं ज़ैस तू सत्ताने लगोरोस!”

ज़ैखन शाउल खड़ो भोव त तै किछ न थियो लेई बटतो। तैसेरे सैथेईं तै दमिश्के मां नियोरो। शाउले ट्लाई दिहाड़े न किछ खाव ते न पियूं।

दमिश्के मां हनन्याह नंव्वेरो अक चेलो थियो। परमेशरे तैस सीं ज़ोवं, तैस घरे मां गा ज़ैड़ी शाउल रुकोरोए। ते अपनो हथ तैस पुड़ रख ताकि तै फिरि लाए।” पन हनन्याहे ज़ोवं, हे प्रभु, मीं एस मैनेरे बारे मां शुनोरूए कि ऐनी विश्वासी सतेवरेन।” परमेशरे तैस जुवाब दितो, “गा! मीं तै यहूदी लोकन मां ते गैर कौमां केरे लोकन खुशखबरी शुन्नेरे लेई च़ुनोरोए। तै मेरे नव्वेंरे लेइ बड़े कष्ट झ़ैलेलो।

ते हनन्याह शाउले कां जेव, ते अपने हथ तैस पुड रख्खे, ते ज़ोवं, ज़ैनी यीशुए, तेरे एजते बारे बत्तां तीं पुड़ बांदू कियोरू थियुं, तैनी अवं तीं कां भेजोरोईं ताकि तू फिरि लास, ते पवित्र आत्मा तीं पुड़ एज्जे।” ते अकदाम शाउल फिरि लानेरे कबल भोव, ते हनन्याहे तैस बपतिस्मो दित्तो। तैखन शाउले रोट्टी खाई ते तैस हिम्मत आई।

फिरी भी शाऊले दमिश्के मां रानेबाले यहूदन मां प्रचार केरने शुरू कियो। “यीशु ही परमरशरेरू मट्ठू आए!” यहूदी लोक हैरान थिये, किजोकि शाऊले त विश्वासी लोकन मारनेरी कोशिश कियोरी थी, पन हुनी तैनी यीशु पुड़ विश्वास कियोरो थियो। शाऊले यहूदन सीं बेंस की। तैनी हिरावं कि यीशु ही मसीह आए।

बड़े दिहाड़ां केरे बाद, यहूदेईं शाऊल मारनेरे लेई योजना बनाई। तैनेईं तैस मारनेरे लेई नगरेरे फाटके पुड़ लोक भेज़े। कि तैसेरी निगरानी केरन, पन शाऊले तैस योजनारे बारे मां शुनू, ते तैसेरे दोस्तेईं बेच़तां निसनेरी तैसेरी मद्दत की। ते तैनेईं एक्की राती तै टोकरी मां रेखतां नगरेरी दिवारी पुड़ ओसालो। दमिश्क नगरे मरां बेच़तां निसनेरां बाद शाऊले यीशुएरे बारे मां प्रचार केरनो जारी रख्खो।

शाऊल प्रेरितन सीं मिलनेरे लेई यरूशलेम जो जेव, पन तैना तैस करां डरते थिये। तैखन बरनबास नंव्वेरो अक विश्वासी शाऊल प्रेरितन कां घिन्तां जेव। तैनी ज़ोवं कि शाऊले केन्च़रे दिलेर भोइतां दमिश्क नगरे मां प्रचार कियोरो थियो। तैसेरां बाद, प्रेरितेईं शाऊल कबूल कियो।

किछ विश्वासी ज़ैना यरूशलेम नगरे सतावे करां नशोरे थिये। तैना दूर अंताकिया नगरे मां च़ले जेवरे थिये। ते यीशुएरे बारे मां प्रचार केरते थिये। अंताकिया मां रानेबाले लोक जादेतर यहूदी न थिये, पन पेइले बार, तैन मरां बड़े लोक विश्वासी बेनी जे। बरनबास ते शाऊल इन नंव्वे विश्वासी लोकन यीशु एरे बारे मां ते जादेतर शिखालनेरे लेई तैड़ी जे ते कलीसिया मज़बूत की। यीशु पुड़ विश्वास केरनेबाले लोकन जो पेइली बार अंताकिया मां “मसीही” ज़ोवं जेवं।

एक्सां, अंताकियारे मसीही लोक बरत रेखतां प्राथना केरि रावरे थिये। पवित्र आत्मा तैन सीं ज़ोवं, “मेरे लेई बरनबास ते शाऊल तैस कम केरनेरे लेई अलग केरा ज़ैस केरनेरे लेई मीं तैना कुजेवरेन।” एल्हेरेलेई अंताकियारी कलीसिया बरनबास ते शाऊलेरे लेई प्राथना की। ते तैन पुड़ अपने हथ रख्खे। तैखन तैना बड़े ठैरन यीशु एरी खशखबरी प्रचार केरनेरे लेई भेज़े। बरनबास ते शाऊले अलग-अलग कौमां केरे लोकन शिक्षा दित्ती, ते बड़े लोकेईं यीशु पुड़ विश्वास कियो।