45. स्तिफनुस ते फिलिप्पुस।

किलसियारे पेइले अगुव्वन मां स्तिफनुस नव्वेंरो अक चेलो थियो। सब लोक तैसेरी आदर केरते थिए। पवित्र आत्मा तैस बड़ी शक्ति ते अक्ल दित्तोरी थी। स्तिफनुसे बड़े चमत्कार कियोरे थिए। ज़ैखन यीशु पुड़ भोरोसो केरनेरे लेईं तैनी शिक्षा दित्ती त बड़े लोकेईं तैस तैस पुड़ विश्वास कियो।

एक्की दिहाड़े, स्तिफनुस यीशुएरे बारे मां शिक्षा देइ राहोरो थियो, ते किछ एरे यहूदी आए। ज़ैनेईं यीशु पुड़ विश्वास न थिये केरते, ते तैस सीं बेंस बाज़ी करनी शुरू की। तैना बड़े सेरकोए ते एल्हेरेलेई तैना यहूदी अगुव्वन कां जे। ते तैसेरे बारे मां झूठ ज़ोवं। तैनेईं ज़ोवं, “असेईं स्तिफनुसे करां मूसा ते परमेशरेरे बारे मां बुरी गल्लां जोती शुनोरीन!” एल्हेरेलेई धार्मिक अगुववेईं स्तिफनुस गिरफदार कियो ते महायाजक ते यहूदि केरे होरी अगुवन कां घिन्तां आए। ते तैनेईं स्तिफनुसेरे बारे मां झूठ ज़ोवं।

महायाजके स्तिफनुसे पुछ़ू, “कुन एना लोक तेरे बारे मां सच़ लागोरेन ज़ोने?” स्तिफनुसे महायाजके ई जुवाब दित्तो, अब्रहामेरे वक्ते करां त यीशुएरे वक्ते तगर परमेशरे इस्राएली लोकां केरे लेई बड़े चमत्कार किये। पन तैना तैसेरो हुक्म न थिये मन्ते। स्तिफनुसे ज़ोवं, “तुस लोक परमेशरेरे खलाफ बगावत केरनेबाले ते ज़िद्दी आथ। तुसेइं हमेशा पवित्र आत्मा कुबूल न कियो, ज़ेन्च़रे कि तुश्शे पूर्वज हमेशा पवित्र आत्मा कबूल न थिए केरते। ते तैनेईं नबी मारे। पन ज़ैन तैनेईं कियोरू थियुं तुसेईं तैस करां भी जादे बुरू कियूं! तुसेईं मसीह मारोरोए।”

ज़ैखन तैना धार्मिक अगुव्वेंई एन शुनू, त तैना एत्रे सेरकोए कि तैनेईं अपने कन बंद किये ते चिन्डां मारने लगे। ते तैनेईं स्तिफनुस घसीटतां नगरे करां बेइर नियो ते तैस मरनेरे लेई तैस घोड़ेईं दित्ती।

ज़ैखन स्तिफनुस प्राण लगोरो थियो देने त तैनी प्रथना की, “हे यीशु, मेरी आत्मा कबूल केर!” तैखन तै ज़ैन्धू केरे भारे भिछ़ड़ो ते तैनी फिरि ज़ोवं, “हे प्रभु, इस पपेरो दोष एन पुड़ न लेइयां।” तैखन तै मेरी जेव।

तैस दिहैड़ी, यरूशलेमे मां राने बाले बड़े लोकेईं यीशुएरे चेले सताने शुरू किये, एल्हेरेलेई विश्वासी लोक होरी-होरी जगान जो नश्शे। पन इसेरे बावजूद भी, ज़ैड़ी भी तैना जे तैनेईं यीशुएरे बारे मां प्रचार कियो।

फिलिप्पुस नव्वेंरो यीशुएरो अक विश्वासी थियो। ज़ेन्च़रे कि होरी बड़े विश्वैसेईं कियोरू थियूं तै यरूशलेम नगरे मरां नश्शो। तै सामरियारे इलाके मां जेव। तैड़ी तैनी लोकन यीशुएरे बारे मां प्रचार कियो। बड़े लोकेईं यीशु पुड़ विश्वास कियो ते मुक्ति हासिल की। एक्की दिहाड़े, फिलिप्पुसे कां परमेशरेरे तरफां अक स्वर्गदूत अव ते तैस जंगले मां ते एक्की सड़की मां गानेरे लेई ज़ोवं। फिलिप्पुस तैड़ी जेव। ज़ैखन तै तैस साड़की मां च़लोरो थियो, त तैनी अक मैनू रथे पुड़ गंतो लाव। तै मैनू कूश मुल्खेरो अक खास आधीकारी थियो। पवित्र आत्मां फिलिप्पुसे सीं ज़ोवं, गेइतां उस मैनू सीं साथी-साथी च़ल।

एल्हेरेलेई फिलिप्पुस रथे कां नेड़े जेव। तैनी शुनू कि तै कूशी परमेशरेरू वचन पड़ने लगोरोए। ज़ैन यशायाह नेबे लिखोरू थियूं तै तैन पड़ने लगोरो थियो। तैनेईं तै तैस भड्डरो ज़ेरो नीयो ज़ै मरनेरे लेई भोचे, ते ज़ेन्च़रे अक निकड़ू गबड़ू शान्त भोते, तैनी अक भी लब्स न ज़ोव। तैनेईं तैसेरे प्राण कढे।

फिलिप्पुसे तैस कूशी पुछ़ू, “ज़ैन तू पड़ने लगोरोस कुन तू तैस समझ़तस भी?” तैनी कुशी मैने जुवाब दित्तो, नईं। ज़ांतगर कोई मीं न समझ़ाए, तां तगर अवं न सेमझ़ी बेटी। महरबानी केरतां ज़ो, कि यशायाह इन अपने बारे मां ज़ोते या होरेरे बारे मां।”

फिलिप्पुस रथे पुड़ च़ड़ो। तैखन तैनी तैस कूशी मैनू ज़ोवं, तैन यशायाए यीशुएरे बारे मां ज़ोवरूए। फिलिप्पुसे परमेशरेरे वचनेरे होरि कई हिस्सां केरे बारे मां भी ज़ोवं। एस तरीके सीं तैनी तैस मैनू यीशुएरे बारे मां खुशखबरी शुनाई।

फिलिप्पुस ते कूशी च़लते-च़लते पैनी कां आए। तैनी कूशी मैने ज़ोवं, “हेर! इड़ी पानीए! कुन अवं बपतिस्मो नेइ साखताईं?” ते तैनी रथ च़लाने बाले सीं रथ रोकानेरे लेईं ज़ोवं।

ते तैना पैनी कां जे ते फिलिप्पुसे तैस बपतिस्मो दित्तो। ज़ैखन तैना पैनी करां बेइर आए, त पवित्र आत्मा अचानके फिलिप्पुस तैठां गाइब केरतां होरी जगाई नीयो। ते तैड़ी फिलिप्पुसे तैन लोकन यीशुएरे बारे मां ज़ोनू जारी रख्खू।

तै कूशी अपने घरे जो अग्रोवं जेव। तै खुश थियो कि तै हुनी यीशु ज़ानते।