43. कलीसियारी शुरुवात।

यीशुएरे सुरगे गानेररे बाद, चेले यरूशलेम नगरे मां रुकोरे थिये। ज़ेन्च़रे कि यीशुए तैन्न हुक्म दित्तोरो थियो। तैठेरे विश्वासी लगातार प्रथना केरनेरे लेई एक्की जगाई अकोट्ठे भोते थिये।

हर साल, फसहरे तिहारेरे 50 दिहैड़ी केरे बाद, यहूदी लोक पिन्तेकुस्ते नव्वेंरी अक खास दिहाड़ी मनाते थिए। पिन्तेकुस्त तै वक्त थियो ज़ैखन यहूदी लोक फसल कटनेरी दिहाड़ी मानते थिए। पूरे दुनियाई मरां यहूदी पिन्तेकुस्तेरी दिहाड़ी मन्नानेरे लेई यरूशलेम नगरे मां एवरे थिए। इस बार पिन्तेकुस्त मन्नेरे वक्त यीशुएरे सुर्गे गंनेरे लगभग एक्की हफतेरां बाद एवरो थियो।

ज़ैखन वक्ते सारे विश्वासी लोक अकोठे थिए, ते ज़ैस घरे मां तैना थिए तैन घर अचानक तेज़ हवारे आवाज़ी सीं भेरोइ जेवं। तैखन अगरे लप्पां केरू ज़ेरू किछ लेहीयोने लगु ते तैन हर विश्वैसेरे दोगे पुड़ ठहरू। तैना सब पवित्र आत्मा सीं भेरोए ते तैनेई होरी-होरी बोलन मां परमेशरेरी महिमा की। इना बोली थी ज़ैन केरनेरे लेईं पवित्र आत्मा तैना कबल बनेवरे थिए।

ज़ैखन यरूशलेमे मां रानेबाले लोकेईं शोर शुनी, त बड़े लोक एन हेरने आए, कि कुन लगोरू भोने। तैनेईं विश्वासी लोकन करां परमेशरेरे बड्डे-बड्डे कम्मां केरि घोषणा केरती शुनी। तैना हैरान थिए। किजोकि तैना अपने-अपने बोली मां शुन्ने लगोरे थिए। चेले इस्राएले मरां थिये, ते अरामी, इब्रानी, यूनानी भाषा ज़ोते थिये, पन लोक अपने-अपने बोली मां शुनेई रावरे थिये, कि परमेशरे कुन कियोरू आए।

तैन मरां किछ लोकेईं ज़ोवं, कि चेले नशे मां आन। पन पतरस खड़ो भोव ते तैन सीं ज़ोवं, “मेरी गल शुना! इना लोक नशे मां नईं! बल्कि ज़ैन तुस हेरतथ तैन तैन्ने, ज़ैन योएल नेबे ज़ोवरू थियूं, परमेशर ज़ोते, ‘अखीरी दिहैड़न मां, अवं अपनो आत्मा सेभन देलो।’

हे इस्राएली लोकव, यीशु अक एरो मैनू थियो ज़ैनी इन हीरानेरे लेई कि तै कौन थियो बड्डां-बड्डां कम्मां कियोरां थियां। तैनी परमेशरेरे शेक्ति सीं बड़ां महान कम्मां कियोरां थियां। तुस एन ज़ानतथ, किजोकि तुसेईं एन्नां कम्मां हेरोरन, पन तुसेइं तै क्रूसे पुड़ च़ाड़ो!

यीशु मरो पन परमेशरे तै मुड़दन मरां ज़ींतो कियो। तैनी तै गल पुरी की, ज़ै एक्की नेबे लिखोरी थी: ‘तू अपने पवित्र मैनू कबरी मं शड़ने न देलो।’ अस गुवाह आम कि परमेशरे यीशु फिरि मुड़दन मरां ज़ींतो कियो।’

बाजी परमेशरे हुनी यीशु अपने देइने पासे बिशैलतां तैस आदर दित्तोरीए। ते यीशुए इश्शे लेई पवित्र आत्मा भेज़ोरोए ज़ेन्चरे कि तैनी वादो कियोरो थियो, पवित्र आत्मा भोने लगोरोए देने ज़ैन तुस हेरने ते शुन्ने लगोरेथ।

तुसेईं यीशु क्रूसे पुड़ चाड़ो। पन हुनी इन ज़ाना, कि परमेशरे यीशु सेभी चीज़न पुड़ प्रभु ते मसीह ठहरावरोए।

पतरसेरी शुन्ने बाले लोक तैसेरी ज़ोवरी गल्लन सीं अन्तर तगर हिली जेवरे थिए। एल्हेरेलेई तैनेईं पतरसे ते चेलन पुछ़ू, “हे ढ्लाव, असेइं कुन कियोरू लोड़े?”

पतरसे तैन्न जुवाब दितो, “तुस्न मरां हर कोई अपने पापां केरे लेई पश्चाताप केरे, ताकि परमेशर तुश्शे पाप माफ़ केरे, ते यीशु मसीहेरे नंव्वे सीं बपतिस्मो ने। तैखन तै तुसन पवित्र आत्मा तोफे मां देलो।”

पतरसे ज़ैन ज़ोवं तैस पुड़ लगभग 3,000 लोकेई विश्वास कियो ते यीशुएरे चेले बने। तैनेईं बपतिस्मो नियो ते यरूशलेमेरे कलीसियरे हीस्सो बेनी जे।

ज़ैखन प्रेरितेईं तैन शिक्षा दित्ती त विश्वासी लोकेईं लगातार शुनू। तैना हमेशा मिलते रहते थिए ते साथी रोट्टी खाते थिए। ते तैनेईं हमेशा एक्की होरेरे लेई प्राथना की। तैनेईं मिलतां परमेशरेरी आराधना की। ते ज़ैन किछ भी तैन्न कां थियुं तैनेईं एप्पू मांमेइं बन्टू। ते नगरेरो हर कोई मैनू तैन्न जो अच्छे मैनू ज़ोते थिए। ते रोज़ ज़ादे करां ज़ादे मैनू विश्वासी बनते जे।