42. यीशु सुर्गे मां जो वापस गाते।

ज़ैस दिहाड़े परमेशरे यीशु मुड़दन मरां ज़ींतो कियोरो थियो, तैसेरे दुई चेले नेड़ेरे एक्की ड्ल्व्वें मां जो च़लोरे थिए। ते तैना यीशुएरे बारे मां गल्लां केरि राहोरे थिए, तैन्न उमीद थी, कि तै मसीह थियो, पन तै मेरि जेवरो थियो। हुनी तैना कौन्शां ज़ोचन कि तै ज़ींतो भोवरोए। ते तैना न थिए ज़ानते कि कोस गली पुड़ विश्वास कियोरो लोड़े।

यीशुए तैन कां एइतां तैन सीं साथी च़लनू शुरू कियूं, पन तैनेईं तै न पिशानो। तैनी तैन पुछ़ू कि तुस कोस बारे मां गल केरि रावरे थिए। ते तैनेईं तैस सीं यीशु सीं बीतोरी सैरी गल्लां ज़ोई। तैनेईं सोचु कि तैना कोन्ची परदेशी सीं गल केरि राहोरे थिए, ज़ै न थियो जानतो कि यरूशलेम नगरे मां कुन भोवरू आए।

तैखन यीशुए तैन समझ़व कि परमेशरेरू वचन मसीहेरे बारे मां कुन ज़ोते। बड़े पेइले, नेबेईं ज़ोवरू थियूं, कि बुरे लोक मसीह दुख देले ते तैस मैरी छ़डेले। पन नेबेईं इन भी ज़ोवरू थियूं, कि तै ट्लेइयोवं दिहाड़े मुड़दन मरां ज़ींतो भोलो।

ज़ैखन तैना नगरे मां पुज़्ज़े ज़ैड़ी तैना दुई मैनू रुकनू चाते थिए, तैखन तगर लगभग ड्लावझ़ भोई जेवरी थी। ते तैनेईं यीशु भी एप्पू सीं साथी बिशनेरे लेई ज़ोवं, ते तै तैन सीं साथी एक्की घरे मां जेव। तैना ड्लाई खानेरे लेई बिश्शे। ते यीशुए अक रोट्टी ट्लेइतां परमेशरेरू शुक्र कियूं, ते फिरि तै रोट्टी ट्लोड़ी। ते अचानक तैन पतो लगो कि तै यीशु आए। ते तैखने तै तैन केरि एछ़न करां छ़पन्त भोइ जेव।

तैन दुई मैनेईं एक्की होरी सीं ज़ोवं, “तै यीशु थियो! एल्हेरेलेई ज़ैखन तैनी परमेशरेरू वचन समझ़ेवरू थियुं त अस बड़े जोशीले भोवरे थिए! अकदम, तैना निसतां यरूशलेम नगरे जो जे। ज़ैखन तैना पुज़्ज़े त तैनेईं चेलन सीं ज़ोवं, “यीशु ज़ींतोए! ते असेइं तै लेवरोए!”

ज़ैखन चेले ज़ोने लगोरे थिए, यीशु अचानक तैस कमरे मां बंदो भोव। तैनी ज़ोवं, “तुसन शान्ति मैल्ले!” चेलेईं सोचू, कि एन कोई भूते। पन यीशुए ज़ोवं, “तुस किजो डरतथ? तुस इन कि न सोचथ कि अवं, सच़्च़े यीशु आईं? मेरे हथ ते पव हेरा। भूतन एरो शरीर न भोए ज़ेरो मीं काए।” इन हिरानेरे लेई कि तै कोई भूत न थियो, तैनी खानेरे लेई किछ मग्गु। तैनेईं तैस मेछलारो अक टुकड़ो दितो, तैनी तै खाव।

यीशुए ज़ोवं, “मेरे बारे मां परमेशरेरू वचन ज़ैन किछ भी ज़ोते तैन भोलू। मीं तुसन सीं ज़ोवरू थियूं कि एन भोनू ज़रूरी आए। तैखन यीशुए परमेशरेरू वचन तैन रोड़े च़ारे समझ़ावं। तैनी ज़ोवं, “बड़े पेइले नेबेईं लिखोरूए थियुं कि, मसीहे दुख झ़लनो पेनोए, तै मरेलो ते फिरि ट्लाइयोवं दिहाड़े ज़ींतो भोलो।

नेबेईं लिखोरू थियूं कि मेरे चेले परमेशरेरे वचनेरी घोषणा केरेले। तैना हर केन्ची पश्चाताप केरनेरे लेई ज़ोले। ते अगर तैना एरू केरतन त परमेशर तैन केरे पाप माफ़ केरेलो। मेरे चेले ई खुशखबरी यरूशलेम नगरे मरां प्रचार केरनी शुरू केरेले। तैखन हर जगाई ते हर ज़ाती मां गाले। तुस मेरे हर कम ते हर गलारे गुवाहथ। ज़ैन मीं ज़ोवं ते कियोरू थियुं, ते तैना सब गल्लां ज़ैना मीं सीं बीतोरी थी।”

तैलां बाद 40 दिहैड़ी केरे दौराने मां, यीशु अपने चेलन पुड़ बांदो भोव। एक्की बार 500 करां भी ज़ैदां मैन्न पुड़ बांदो भोव! तैनी अपने चेलन कई बार साबित कियूं कि तै ज़ींतोए। ते तैनी तैन परमेशरेरे राज़ेरे बारे मां शिक्षा दित्ती।

यीशुए अपने चेलन सीं ज़ोवं, “परमेशरे मीं सुर्ग ते धेरतरे हर एक्की मैनू पुड़ राज़ केरनेरू हक़ दित्तोरूए। एल्हेरेलेई अवं तुसन सीं ज़ोताईं, गेइतां सेभी कौमां केरे लोकन चेले बनाथ। तैन बाजी मट्ठे ते पवित्र आत्मारे नंव्वे सीं बपतिस्मो देथ। तैन तैना सब गल्लां मेन्नी शिखालां ज़ैन केरो मीं तुसन हुक्म दित्तोरोए, याद रेखथ कि अवं तुसन सीं साथी रालो।”

यीशुएरे मुड़दन मरां ज़ींते भोनेरे 40 दिहाड़न बाद, तैनी अपने चेलन सीं ज़ोवं, “ज़ां तगर कि मेरो बाजी तुस्न शक्ती न दे तां तगर यरूशलेम नगरे मां ठेरहोरे राथ। तै तुस्न पुड़ पवित्र आत्मा भेज़नेरे ज़िरिहे एन केरेलो।” तैखन यीशु सुर्गे मां जो च़लो जेव, ते बिदलारां तै तैनकेरे एछ़्छ़न करां छ़पाव। सुर्गे मां यीशु सब चीज़न पुड़ राज़ केरते ते परमेशरेरे देइने पासे बिशोरोए।