41. परमेशर यीशु मुड़दन मरां ज़ींतो केरते।

यीशु क्रूसे पुड़ च़ाड़नेरे बाद यहूदी अगवेईं पिलातुसे सीं ज़ोवं, “तैनी झूठे, यिशुए ज़ोवरू थियुं कि तै ट्लाइ दिहैड़ी केरे बाद मुड़दन मरां ज़ींतो भोनोए। ते कोन्ची इन पक्कू केरनेरे लेई कब्रारी पहदारी केरनी पेनिए। ताके तैसेरे चेले तैसेरी लाश च़ोरतां न नेन। ते अगर तैना एन्च़रे केरतन त तैनेईं ज़ोनूए कि तै मुड़दन मरां ज़ींतो भोवरोए।”

पिलातुसे ज़ोवं, “किछ सिपहन नेथ, ते ज़ेन्च़रे तुस चातथ तेन्च़रे कब्रारी पहरदारी केरा।” एल्हेरेलेई तैनेईं तैस कब्री पुड़ छ़डोरे घोड़े पुड़ मोर लाइ। इन पक्कू केरनेरे लेई तैड़ी सिपाही रख्खे कि कोई भी तैसेरी लाश च़ोरतां न नेइ बटे।

यीशुएरे मरनेरे बादेरी दिहाड़ी आरामेरे दिहाड़ी थी। कोई भी आरामेरे दिहाड़ी कम न थियो केरी सखतो, एल्हेरेलेई यीशुएरो कोई भी दोसत कबरी पुड़ न थियो एवरो। पन आरामेरे दिहैड़रां बाद होरसां झ़ेझां, किछ कौन्शां यीशुएरे कबरी पुड़ गंनेरे लेई तियार भोई। तैना तैसेरे जानी पुड़ खुशबूदार चीज़ां लैनी चैती थी।

तैना कौन्शां केरे पुज़नेरे पेइले, कबरी पुड़ अक बड़ो भुन्ज़ल अव। सुर्गेरां एक्की दूते एइतां तै घोड़ घसाव ज़ैस सीं कबर बंद थी। ते तै सर्गदूत तैस घोड़े पुड़ बिश्शो। तै स्वर्गदूत लोअरो ज़ेरो चमकने बालो थियो। कबरी पुड़ ज़ैना पहरदार थिए तैनेईं तै स्वर्गदू लाव । तैना एत्रे डारोरे थिए कि मारोरे ज़ेरे तले जो बीछ़ड़े।

ज़ैखन तैना कौन्शा कबरी पुड़ पुज़ी त स्वर्गदूते ज़ोवं, “डरा न। यीशु इड़ी नईं तै मुड़दन मरां ज़ींतो भोवरोए, ज़ेन्च़रे कि तैनी ज़ोवरू थियुं कि तै मुड़दन मरां ज़ींतो भोनोए! कबरी मां तोप्पा ते हेरा।” तैना कौन्शेईं कबरी मां ज़ैड़ी यीशुएरी लाश रख्खोरी थी हेरू पन तैसेरी लाश तैड़ी न थी!

तैखन तैनी स्वर्गदूते तैन कौन्शन सीं ज़ोवं, “गेइतां तैसेरे चेलन सीं ज़ोथ, यीशु मुड़दन मरां ज़ींतो भोवरोए ते तै तुसन करां पेइलो गालीले जो गालो।”

तैना कौन्शा हैरान भोई ते बेड़ी खुश भोई। तैना चेलन एह खुशखबरी शुनानेरे लेई देवड़ी।

ज़ैखन तैना कौन्शां हेजू बत्तां थी, त यीशु तैन पुड़ बंदो भोव। तैना तैस कां झुकी। तैखन यीशुए ज़ोवं, “डरा न। गेइतां मेरे चेलन गलीले मां गानेरे लेई ज़ोथ, ते तैना तैड़ी मीं लालहे।