40. यीशु क्रूसे पुड़ चाड़तन।

यीशुएरो मज़ाक बनानेरां बाद, सिपाही तैस क्रूसे पुड़ चाड़नेरे लेई जे। ते तैनेईं तैन क्रूस ज़ैस पुड़ तै च़ाड़नो थियो छ़ूनो जो दित्तू।

तैना सिपेहेईं यीशु तैस जगाई पुड़ आनो ज़ैस जो “खोपड़ी” ज़ोतन। ते तैसेरे हथ्थन ते पव्वन क्रूसे पुड़ किल दित्तोरे थिये। पन यीशुए ज़ोवं, “हे बाजी, एन माफ़ केर, किजोकी एना न ज़ान्न कि एना कुन लगोरेन केरने।” ते तैनेईं तैसेरे दोगे करां बह अक फट्टी भी लाई।” तैस पुड़ लिखोरू थियुं यहूदी केरो राज़ो, “पिलातुसे तैन्न सीं इन लिखनेरे लेई ज़ोवरू थियूं।”

तैखन सिपेहेईं यीशुऐरे लिकड़ां केरे लेई चिट्ठी छ़ेड्डी। ज़ैखन तैनेईं एन कियूं त ई भवष्यवानी पूरी भोई, “तैनेईं मेरां लिकड़ां एप्पू मांमेइं बन्टां, ते मेरे लिकड़ां केरे लेई चिट्ठी छे़डी।”

तैड़ी दुई डैकू थिए, ज़ैना सिपेहेईं तैस्से वक्ते क्रुसे पुड़ च़ाड़ोरे थिए। तैनेईं अक यीशुएरे एक्की पासे ते होरो होरी पासे च़ाड़ोरो थियो। तैन मरां एक्की डैके यीशुएरो मज़ाक बनाव, पन होरे ज़ोवं, “कुन तू न डरस कि परमेशरे तीं सज़ा देलो? असेईं बड़ां बुरां कम्मां कियोरन, पन ई मैन्हु बेकसूरे।” फिरी तैनी यीशु सीं ज़ोवं, “ज़ैखन तू अपने राज़े मां एजेलो त मीं याद रेखां।” यीशुए जुवाब दित्तो, “तू अज़्ज़े मीं सीं साथी सुर्ग लोके मां भोलो।”

यहूदी अगुव्वेंई ते बाकी भीड़रे लोकेईं यीशुएरो मज़ाक उड़ाव। तैनेईं तैस सीं ज़ोवं, “अगर तू परमेशरेरू मट्ठुस, त क्रूसे पुड़रां ओसतां बुन एई ते अपने आपे बंच़ा! तैखन अस तीं पुड़ विश्वास केरमेले।”

तैखन तैस पूरे मुल्खे मां आंधरू भोवं, भले ही तै दिसारो वक्त थियो। ते लगभग ट्लाई घन्टे आंधरू रावं।

तैखन यीशुए हक देइतां ज़ोवं, पुरू भोवं! हे बजी, अवं अपनी आत्मा तेरे हथ्थे मां सोंफताईं। तैखन तैनी अपनी क्रोड़ी लेकी ते प्राण दित्ते। ज़ैखन तै मरो त अक भुज़ल अव। ते तै बड्डो पड़दो ज़ै लोकन परमेशरे कां गाने करां रोकतो थियो बेंइए पासेरां बून तगर छ़िन्दोइतां तैसेरे दुई टुकड़े भोए।

अपने मौतरे ज़िरिये यीशुए लोकां केरे लेई परमेशरे कां एजनेरी बत्त खोल्ली। ज़ैखन एक्की सिपेहे ज़ै यीशुएरी निगरानी केरने लगोरो थियो तैनी एन सब हेरू त तैनी ज़ोवं, “सच़्च़े एह मैनू निर्दोष थियो। एन परमेशरेरू मट्ठू आए।”

तैखन यूसुफ ते नीकुदेमुस नव्वेंरे दुई यहूदी अगुवे आए। तैना विश्वास केरते थिये कि यीशु ही मसीह आए। तैनेंई पिलातुसे कां गेइतां यीशुएरी लाश मगी। तैनेंई तैसेरी लाश लिकड़े मां पलैटी। ते तैनेंई तै चट्टानी मां बनेवरे एक्की कबरी मां नी ते तैड़ी रख्खी। तैखन तैनेईं तै कब्र बंद केरनेरे लेई अक बडो घोड़ तैस पुड जो घसाव।