39. यीशु पड़ मुकदमो च़लाव गानो।

एध्धी राती सिपेहेईं यीशु महायाजकेरे घरे आनो, किजोकी तै यीशु सवाल पुछ़ने चातो थियो। पतसर दूर-दूर तैन पतपती जेवरे थियो। ज़ैखन सिपेहीं यीशु घरे मां आनो, त पतरस बेइर बिश्तां अग तपने लगो।

घरे मां यहूदी लोकेईं यीशु पुड़ मुकदमो च़लव। तैनेईं तैसेरे खिलाफ़ गुवाही देनेरे लेई बड़े झूठे गुवाह आने। हालाँकि, तैनकेरी गल्लां एक्की होरि सीं न थी मिलती, एल्हेरेलेई यहूदी अगुवेईं एन साबत न केरि सकू, कि तै कोस गल्ली मां दोषीए। ते यीशुए किछ न ज़ोवं।

आखरकार महायाजके यीशुएरां तेकतां ज़ोवं, “असन सीं ज़ो कि कुन तू ज़ींते परमेशरेरू मट्ठू मसीह आस?”

यीशुए ज़ोवं, “हाँ, अवं आईं, ते तुस मीं परमेशरे सीं साथी बिशोरे ते सुर्गेरां एइते लाहेले।” एन शुन्तां महायाजके बड़ी सरक अई ते तैनी अपनां लिकड़ां छ़िन्दां। तै होरी अगुवन पुड़ भी सेरकोव, “असन इन ज़ोनेरे लेंई होरी केंन्ची गुवाहेरी ज़ुरूरत नईं कि इनी मैने कुन कियोरूए! तुसेइं एप्पू एस करां इन ज़ोतू शुनोरुए कि एन परमेशरेरू मट्ठू आए। इसेरे बारे मां तुश्शो कुन फैसलोए?”

सब यहूदी अगवेईं महायाजके जुवाब दित्तो, “एह मारनेरे काबले!” तैखन तैनेईं यीशुएरे एछ़न पुड़ी पट्टी बंधी, ते तैस पुड़ थुक्कू, तैस बैइ, ते तैसेरो मज़ाक उड़ाव।

ते ज़ैखन पतरस घरेरे बेइर बलगने लगोरो थियो। तैखन एक्की नौकर कुइयां तै लाव। तैसां ज़ोवं “तू यीशु सीं साथी थियो!” पतरसे ज़ोवं, नईं अवं न थियो। बादे मां, केन्ची होरां एन्ने ज़ोवं। अखीरी मां किछ लोकेई ज़ोवं, “अस ज़ानतम कि तू यीशु सीं साथी थियो, किजोकी तुस दुईए गलीलेरेथ।”

तैखन पतरसे ज़ोवं, “अगर अवं एस मैनू ज़ानतो भोई त परमेशर मीं शारप दे!" अकदम पतरस एन्च़रे कसम खानेरे बाद, एक्की कुक्कड़े बांग दिती। यीशुए पतरोवं मुड़तां पतरसेरां तक्कू।

पतरस तैठां च़लो जेव ते तैनी बेड़ी लेरां दित्ती, यीशु ट्लुवाने बाले यहूदा हेरू, कि यहूदी अगुवेईं यीशु मौतरी सज़ा दित्तोरीए। यहूदा बड़ो दुखी भोव ते गेइतां खुदकुशी की।

तैस मुल्खेरो गुवरनार पिलातुस थियो। तै रोमी मुलाज़ोम थियो। यहूदी अगुवे यीशु घिनतां तैस कां आए। तैना चाते थिए कि पिलातुस तैस मौतरी सज़ा दे ते तैस मारे। तैखन पिलातुसे यीशु पुछू, “कुन तू यहूदी केरो राज़ोस?”

यीशुए जवाब दित्तो, “तीं सच़ ज़ोवरूए, पन मेरू राज़ इस दुनियारू नईं। अगर भोथू त मेरे चेले तैसेरे लेई जंग लड़ेथे। अवं धेरती पुड़ परमेशरेरे राज़ेरी सच़्च़ाई ज़ोने एवरोई। हर अक मैनू ज़ै सच़्च़े सीं प्यार रखते तै मेरी शुनते।” पिलातुसे ज़ोवं, “त सच़ कुने?”

यीशु सीं गल्लां केरनेरे बाद, पिलातुसे बेइर एइतां लोकन कां गेइतां ज़ोवं, “मीं एरी कोई वजा न लेवरी कि एह मैनू मारो गए।” पन यहूदी अगुव्वेंई ते लोकेई चिन्डां मैरतां ज़ोवं, “तैस क्रुसे पुड़ च़ाढ़!” पिलातुसे जुवाब दितो, एस मां कोई भी गलती या दोष नईं।” पन तैना होरी भी ज़ोरे-ज़ोरे चिन्डां मैरने ज़ोने लगे। तैखन पिलातुसे ट्लेइयोवं बार ज़ोवं, “एह दोषी नईं।”

पिलातुस डरोरो थियो कि लोकां केरि भीड़ दंगो शुरू केरेली। एल्हेरेलेई तैनी अपने सिपेहां केरे ज़िरिहे यीशु क्रूसे पुड़ चड़नेरे लेई मन्नू। रोमी सिपेहेईं यीशु कोड़ेई बैई, ते तैस राज़ां केरां लिकड़ां लुव्वां, ते तैस कन्टन सीं बनेवरू ताज लुवाव। तैखन तैना इन ज़ोइतां तैसेरो मज़ाक बनाने लगे, “हेरा, यहूदी केरो राज़ो!”