3. हड़ाई

दुनियाई बनानेरे बड़े वक्तेरां बाद दुनियाई मां बड़े लोक रहते थीये। तैना बड़े दुष्ट ते ज़ुलम केरने बाले भेवरे थिये। ते तै दुनिया एत्री बुरी थी कि परमेशरे एक्की बेड्डी हड़ैई सीं तैसेरो खातमों केरनेरो फैसलो कियो।

पन परमेशरेरी सिद्धी नज़र नूहे पुड़ बनोरी राई। नूह धर्मी मैनू ते अपने वक्तेरे लोकन मां सच़्च़ो थियो। तैखन परमेशरे नूहे सीं तैस हड़ैइरे बारे मां ज़ोवं ज़ैस सीं तै सारी धरती नाश केरनेबालो थियो। एल्हेरेलेइ परमेशरे नूहे सीं ज़ोवं कि अक बड्डी किशती बना।

परमेशरे नूहे सीं ज़ोवं कि तू एन्च़रे सीं किशती बनेइयां: ज़ैसेरी लमबाई 140 मीटर, चौड़ाई 23 मीटर, ते ऊँचाई 13.5 मीटर भोए। फिरी परमेशरे नूहे सीं ज़ोवं कि ऐह किश्ती लेकड़री बनेइयां, ते तैस मां अक दारी रेखां, ते तैस करां अक हथ बा तैसेरी छत बनेइयां, किशतरे एक्की पासे अक दार रेखां; ते किशती मां पेइलो, दुइयोवं ते ट्लेइयोवं हिस्सो बनेइयां। फिरी परमेशरे नूहे सीं ज़ोवं, कि तू अपने टब्बरे सने किशती मां गेइयां, ते सब जानदारन मरां तू हर एक्की किसमेरे जानबर, च़ुड़ोल्लू ते पेटेरे भारे च़लनेबाले जीव जन्तू एप्पु सीं साथी किशती मां नेइतां ते ज़ींते रेखां।

नूहे परमेशरेरी गल मेनतां तैन्ने कियूं। तैनी ते तैसेरे ट्लेइये मट्ठेईं तेन्च़रे किश्ती बनई ज़ेन्च़रे परमेशरे ज़ोवरू थियूं। तैस किश्ती बनाने मां बड़े साल लग्गे, किजोकि तै किश्ती बड़ी बड्डी थी। नूहे लोकन हड़ाई एजनेरे बारे मां खबरदारी दित्ती, ते तैन्न मन फिरेइतां परमेशरेरे पासे एजनेरेलेई ज़ोवं, पन तैनेइं नूहेरी गल्लन पुड़ विश्वास न कियो।

नूह ते तैसेरे टब्बरे जानबरां केरे लेइ ज़रूरतरे मुताबिक खानेरो इंतज़ाम कियो। ज़ैखन सब किछ तियार थियूं, तैखन परमेशरे नूहे सीं ज़ोवं, कि हुनी वक्त एवरोए कि तू अपनि लाड़ी, ट्लाई मट्ठां, ते नुशन सने किश्ती मां गा। तैना सब मिलेइतां अठ ज़ने थी।

परमेशरे ज़मीनी पुड़ पेटेरे भारे च़लनेबाले जनबार ते च़ुड़ोल्लू केरे नर ते मादा नूहे कां किश्ती मां भेज़े। ताकि तैना हड़ैयरे दौराने मां ज़ींते रेई सखन। परमेशरे हर किसमेरे जानबरां केरे सत नर ते सत मादा भेज़े ज़ैन केरो इस्तेमाल बली च़ाड़नेरे लेई कियो गाए। ज़ैखन तैना सब किश्ती मां च़ेड़ी जे त परमेशरे किश्तरू दार बंद कियूं।

तैखन झ़ड़ी लगनी शुरी भोई ते लगातार 40 दिहाड़े ते 40 रातन तगर भोंती राई! धेरती पुड़ हड़ाई च़लती राई, ते पानी बड़ू बधतू जेवं। इड़ी तगर कि धेरती पुड़ ज़ेत्रां भी बड्डां-बड्डां पहाड़ां थियां सब डुबी जेआं।

ते सब च़ुड़ोल्लू ते सब पालतू जानबर, ते धेरती पुड़ सब च़लने बाले जानदार, ते ज़ेत्रे जीव जन्तु ज़ैन सेइं धरती भेरोई जेवरी थी, तैना सब ते सारे मैनू मेरि जे, पर ज़ैना किश्ती मां थी सिर्फ तैन्ना ज़ींते राए। किश्ती पैनी पुड़ च़लने लगी ते ज़ैन किछ किश्ती मां थियूं तैन डुबने करां बेच़ी जेवं।

झ़ेड़रे रुकनेरां बाद, पंच़ महीन्न तगर तै किश्ती पैनी पुड़ तैरती राई, त एक्की दिहैड़ी किश्ती पहाड़े पुड़ टिकी, पन हेजू भी सारी दुनिया पैनी सीं भेरोरी थी। ट्लेई महीन्न बाद पहाड़ां केरि च़ोटां लेइने लेगी।

फिरी 40 दिहाड़ना बाद नूहे अपने बनेवरे किश्तरी दारी खोलतां, अक काव उडैरी दित्तो त इन हेरनेरे लेइ कि ज़मीनी पुड़ पानी शुकोरू कि नईं। ते तै काव शुकोरी ज़मीनी तोपनेरे लेइ इरां-उरां उडरतो राव, पन तैस शुकोरी ज़मीन कोन्च न मैल्ली।

नूहे फिरी अक कबूतर उडारू। पन तैस भी शुकोरी ज़मीन न मैल्ली एल्हेरेलेइ तै नूहे कां वापस एज्जी अव। ते एक्की हपतेरे बाद तैनी तैन कबूतर फिरी उडारू, ते तैन कबूतर ड्लोवझ़ां तैस कां वापस अव, त तैनी हेरू कि तैसेरे च़ुन्च़ी मां नंव्वें ज़ैतूनेरू पट्लोवं आए! एन हेरतां नूहे पतो लग्गो कि ज़मीनी पुड़ पानी घटेरूए।

नूहे फिरी एक्की हपतेरे पत्ती ट्लेंइयोवं बार तैन कबूतर किश्ती मरां उडारू। इस बार, तैन वापस न अव किजोकि ज़मीनी पुड़ पानी शुक्की जेवरू थियूं।

दुई महीन्न बाद परमेशरे नूहे सीं ज़ोवं, “तू अपने मट्ठन, कौन्श ते नुशन सने किश्ती मरां बेइर एई।” परमेशरे नूहे बरकत दित्ती ते तैस सीं ज़ोवं “फुला-फला, ते बधा, ते धेरती पुड़ भोरोई गाथ। तैखन नूह ते तैसेरू टब्बर किश्ती मां बेइर निस्सू।

नूहेरे बेइर एजनेरां बाद तैनी अक वेदी बनाई, ज़ैस पुड़ बलिदान कियूं गाए ते तैने सब किसमेरे जानबरां केरू बलिदान दित्तू। परमेशर तैस बलिदाने सीं खुश भोव त तैनी नूहे ते तैसेरे टब्बरे बरकत दित्ती।

फिरी परमेशरे ज़ोवं, “कि अवं तुसन सीं करार केरताईं कि सब जानदार फिरी हड़ैई सीं नाश न भोले ते धेरतरो नाश केरनेरे लेइ फिरी हड़ाई न एजेली। फिरी चाए लोक बचपने करां पाप की न केरि रावरे भोन।”

फिरि परमेशरे ज़ोवं मीं अम्बरे मां भुन्ज़ल्लठ रखोरीए, तै मेरे ते धेरतरे बीचे मां करारेरो निशान भोलो। ते ज़ैखन अवं धेरती पुड़ बिदलार आनेलो तैखन तै भुन्ज़ल्लठ लेइनीए। तैखन मेरो ज़ै करार तुश्शे ते सब जानदारां केरे लेइ आए; तैस करारे अवं याद केरेलो, तैखन एरी ज़ेरि हड़ाई फिरी न एज्जेली ज़ैस सीं कि सब जानदार मेरि गान।