38. यीशु ट्लुवाव गानो।

यहूदी लोक हर साल फसह तिहार मनाते थिए। एन तिहार एल्हेरेलेई मानते कि कई साल पेइले परमेशरे तैनकेरे बुज़ुर्ग मिस्र मुल्खे मरां आज़ाद कियोरे थिये। ज़ैखन करां यीशुए शिक्षा देनी शुरू की। तैखन करां लगभग ट्लाइ सालां केरे बाद, यीशुए चेलन सीं ज़ोवं, कि तै तैन सीं साथी यरूशलेम नगरे मां फसह तिहार मनानू चाते, ते तैनी इन भी ज़ोवं, कि तै तैड़ी मारो गालो।

यीशुएरे चेलन मां यहूदा नंव्वेरो अक मैनू थियो। यहूदा कां पेइंसा केरि झोली रहती थी। पन हमेशा तै तैस झोली मरां पेंइसे च़ोरतो थियो, यीशु ते चेले यरूशलेम नगरे मां पुज़नेरे बाद यहूदा, यहूदी अगुवन कां जेव। तैनी पेंइसे नेइतां यीशु ट्लुवानेरी गल की। तै ज़ानतो थियो कि यहूदी अगुवे कुबूल न थिए केरते कि यीशु मसीह आए। तै ज़ानतो थियो कि तैना तैस मारने चातन।

महायाजकेरे ज़ोने पुड़ यहूदी अगुवेईं यीशु ट्लूवानेरे लेई यहूदा चैन्दरे 30 सिक्के दित्ते। इन तेन्च़रे भोवं ज़ेन्च़रे कि नेबेईं ज़ोवरू थियूं कि इन्च़रे भोलू। यहूदा मेन्नी जेव ते पेंइसे नेइतां च़लो जेव। तै यीशु गिरफ्तार केरने मां तैनकेरी मदत केरनेरे लेई कोई मोको तोपने लगो।

यरूशलेमे मां, यीशुए अपने चेलन सीं साथी फसह तिहार मनानेरे वक्ते, यीशुए रोट्टी ट्लेइतां ट्लोड़ी। ते तैन सीं ज़ोवं, “इस खाथ। ई मेरी जाने ज़ै अवं तुश्शे लेई देताईं। ते मेरे यादगीरी मां एन्ने केरथ।” इस तरीके सीं यीशुए ज़ोवं, कि तै तैनकेरे लेई मारेलो, मतलब तैन केरे लेई अपनी जान बली चाड़ेलो।

फिरि यीशुए दाछ़रे रसेरो कटोरो ट्लाव ते ज़ोवं, “इस पीथ। ई मेरे खूनेरो नंव्वो करारे ज़ै अवं तुश्शे लेई बगालो, ताकि परमेशर तुश्शे पापन माफ़ केरे। हर बार पींते बार मेरी यादी मां इन केरथ ज़ैन अवं हुना केरी राहोरोंई।”

तैखन यीशुए अपने चेलन सीं ज़ोवं, “तुसन मरां अक मीं ट्लुवालो।” चेले हैरान भोए, ते पुछ़ने लगे कि कौन एन कम केरेलो। यीशुए ज़ोवं, “मेरो ट्लुवानेबालो मैनू तैए ज़ैस अवं ई रोटारो टुकड़ो देताईं।” तैखन तैनी रोट्टी यहूदा दित्ती।

तै रोट्टी खानेरां बाद, यहूदा मां शैतान बेस्सी जेव, ते तै गेइतां यीशु गिरफ्तार करावानेरे लेईं यहूदी अगुवां केरि मदत केरनेरे लेई च़लो जेव। एह रातरो वक्त थियो।

रोट्टी खानेरां बाद, यीशु ते तैसेरे चेले ज़ैतून पहाड़े पुड़ च़ले जे। यीशुए ज़ोवं, “तुस सब अज़ राती मीं छ़ेडतां च़ले गाले। किजोकि वचने मां इन लिखोरू, “अवं पुहाले मारेलो ते सैरी भैडां तित्र-बीत्र भोई गैली।”

पतरसे जुवाब दित्तो, “भले ही बाकी सब तीं छ़ेडतां गान, अवं तीं न छ़डेलो।” तैखन यीशुए पतरसे सीं ज़ोवं, “शैतान तुसन सेभन नेने चाते, पन हे पतरस, मीं तेरे लेई प्रथना कियोरीए कि तेरो विश्वास न ट्लुटे। फिर भी, अज़ राती, कुकड़ेरे बांग देने करां पेइले टलाइ बार तू मेरो इनकार केरेलो कि तू मीं ज़ानस।”

तैखन पतरसे यीशु सीं ज़ोवं, “भले ही अवं मेरि भी गेईं, अवं कधी भी तेरो इन्कार न केरेलो!” ते बाकी सेभी चेलेई भी एन्ने ज़ोवं।

तैखन यीशु अपने चेलन सीं साथी गतसमनी नव्वेंरे जगाई जेव। यीशुए अपने चेलन सीं साथी प्राथना केरनेरे लेई ज़ोवं, ताकि शैतान तैनकेरी अज़माइश न केरे। फिरि यीशु एप्पू प्रथना केरनेरे लेई च़लो जेव।

यीशुए ट्लाई बार प्रार्थना की, “हे मेरे बाजी, अगर भोई सके त महरबानी केरतां ई दुखेरो कटोरो मीं करां दूर केर। पन अगर लोकां केरे पाप माफ़ कीये गंनेरे लेई होरी कोई बत्त नईं, त तेरी मर्ज़ी पूरी भोए।” यीशु बड़ो उदास थियो ते तैसेरो पसीनो खूनेरे तेप्पू केरे शकली मां निसने लगो। तैस शक्ति देनेरे लेई परमेशरे अक सुवर्गदूत भेज़ो। यीशुए एन्च़रे ट्लाई बार प्रथना की।

हर बार प्रार्थनारे बाद, यीशु अपने चेलन कां वापस अव, पन तैना झ़ुलोरे थिए। ज़ैखन यीशु ट्लेइवां बार वापस अव त तैनी ज़ोवं, “बींझ़ा! मेरो ट्लुवानेबालो पुज़ोरोए।”

यहूदी अगुवन, सिपेहिन, ते बड़े लोकन सीं साथी यहूदा कां आए। तैना तलवारां ते डंडे घिन्तां एवरे थिए। यहूदा यीशु कां एइतां तैस सीं ज़ोवं, “हे गुरु, नमस्कार,” ते तैस फुमड़ी दित्ती। तैनी यीशु ट्लुवानेरे एन कियोरू थियूं। तैखन यीशुए ज़ोवं, “हे यहूदा, कुन तू एक्की फुमड़ी सीं मीं ट्लुवातस?”

ज़ैखन तैना सिपाही यीशु ट्लाने लगोरे थिए, त पतरसे अपनी तलवार कढी ते महायाजकेरे एक्की सेवकेरो कन कट्टो। यीशुए ज़ोवं, “तलवार दूर केर! अवं अपने बाजी करां अपने बंच़नेरे लेई सुवर्गदूतां केरि सेनारी बिनती केरि सकताईं। पन मीं मेरे बाजेरी गल मान्नीए।” तैखन यीशुए तैस सीपेहेरो कन ठीक कियो। तैखन सारे चेले नश्शे।