37. यीशु लाज़रे मुड़दन मरां जींतो केरते।

लाज़र नंव्वेरो अक मैनू थियो, तैसेरी दुई बेइनां थी। एक्करू नंव मरियम ते होरारू नवं मार्था थियूं। तैना यीशुएरे खास मिट्ल थिए। एक्की दिहाड़े केन्चे यीशु सीं ज़ोवं, कि लाज़र बड़ो बिमारे। ज़ैखन यीशुए एन शुनू त तैनी ज़ोवं, “एह बिमारी लाज़रे मारनेरे लेई नईं, इसेरे बजाए, तै लोकां केरे दिल परमेशरेरी आदर केरनेरे लेई तियार केरेली।”

यीशु अपने मिट्लन सीं प्यार रखतो थियो, पन ज़ैड़ी तै थियो तैड़ी तै दुई दिहैड़न तगर रुको। तैना दुई दिहैड़ना बाद, तैनी अपने चेलन सीं जोवन, “एज्जा, वापस यहूदिया जो च़लम।” चेलेई जुवाब दित्तो, “पन हे गुरु, किछ च़िरे पेइले तैठेरे लोक तीं मारने चाते थिए।” यीशुए ज़ोवं, “इश्शो मिट्ल लाज़र झ़ुलोरोए, ते मीं तै बींझ़ानोए।”

यीशुएरे चेलेईं जुवाब दितो, “हे प्रभु अगर लाज़र झ़ुलोरोए त तै बींझ़नोए।” तैखन यीशुए तैन सीं साफ च़ारे ज़ोवं, “लाज़र मेरि जेवरोए। अवं खुशीं कि अवं तैड़ी न थियो, ताकि तुस मीं पुड़ विश्वास केरथ।”

ज़ैखन यीशु लाज़रेरे ड्लव्वे मां पुज़ो त लाज़रे मरोरे च़ेव्र दिहाड़े भोवरे थिए। मार्था यीशु सीं मिलने बेइर आई ते ज़ोवं, “हे प्रभु, अगर तू इड़ी भोथो त मेरो ढ्ला न मरेथो। पन अवं विश्वास केरचंई कि ज़ैन किछ भी तू परमेशरे करां मग्गस तै तीं देलो।”

यीशुए जुवाब दित्तो, “पुनरुत्थान ते ज़िन्दगी अवं आईं। ज़ै कोई मीं पुड़ विश्वास केरते अगर तै मरे भी त फिरी भी ज़ीलो। ज़ै कोई मीं पुड़ विश्वास केरते तै कधी न मरेलो। कुन तू एस गल्ली पुड़ विश्वास केरचस?” मार्था जुवाब दितो, “हे प्रभु, अवं विश्वास केरचंई कि तू परमेशरेरू मट्ठू मसीह आस।”

तैखन मरियम आई। ते यीशुएरे पव्वन पुड़ पेइतां ज़ोवं, “हे प्रभु, अगर तू इड़ी भोथो त मेरो ढ्ला न मारेथो।” यीशुए तैस पुछ़ू, “तुसेई लाज़र कोड़ी रखाोरोए?” तैनेईं तैस ज़ोवं, “कब्री मां। एई हेर।” तैखन यीशु लेरां लगो देने।

तै कब्र अक कुढ़ थी ज़ैसेरे दारे पुड़ अक घोड़ छ़डोरो थियो। ज़ैखन यीशु कब्री पुड़ पुज़्ज़ो त तैनी तैन सीं ज़ोवं, “घोड़ खड़ो केरा।” पन मार्था ज़ोवं, “तैस मारोरे च़ेवर दिहाड़े भेवरेन। हुनी त तैसेरी मुश्क एइती भोली।”

यीशुए जुवाब दितो, “कुन मीं तुस्न सीं न थियूं ज़ेवरू अगर तुस मीं पुड़ विश्वास केरथ त पेमेशरेरी शक्ती हेरेले?” एल्हेरेलेई तैनेईं घोड़ घिसाव।

तैखन यीशुए उबरू सुर्गेरे पासे तेकतां ज़ोवं, “हे बाजी, मेरी शुन्नेरे लेई अवं तेरू शुक्र केरताईं। अवं ज़ानताई कि तू हमेशा मेरी शुनतस, पन मीं इना सब लोकां केरे लेई ज़ैना इड़ी खड़ेन एन केरि मदतरे लेई ज़ोवं, ताकि एना विश्वास केरन कि तीं अवं भेज़ोरोईं।” तैखन यीशुए हक दित्ती, “हे लाज़र बेइर एई!”

ते लाज़र बेइर अव! तै हेजु भी कफाने मां पलैटोरो थियो। यीशुए ज़ोवं, “इस कफाने कढ़ने मां एैसेरी मदत केरा ते एस आज़ाद केरा।” एस चमत्कारेरे वजाई सीं बड़े यहूदेईं यीशु पुड़ विश्वास कियो।

पन यहूदी केरे धार्मिक अगुवे यीशु पुड़ ज़लने लगे, एल्हेरेलेई तैना योजना बनानेरे लेई सारे अकोठे भोए कि केन्च़रे यीशु ते लाज़ेरे मारन।