36. यीशुएरू रूप बेदलोनू।

एक्सां यीशुए अपने ट्लाई चेले, पतरस, याकूब ते यूहन्ना एप्पु सीं साथी नीये। (ई यहून्ना तै नईं ज़ैनी यीशु बपतिस्मो दित्तोरो थियो) यीशु त तैना ट्लाई चेले प्राथना केरनेरे लेई एक्की पहाड़े पुड़ जे।

ज़ैखन यीशु प्रथना केरी राहोरो थियो त तैसेरू तुत्र दिहाड़ेरू ज़ेरू चमकने लगू। तैसेरां लिगड़ां लोअरां ज़ेरां छ़ित्तां भुआं, एरां छ़ित्तां धेरती पुड़ कोई न केरि सखे।

तैखन मूसा ते एलीयाह नबी बांदे भोए। तैना इस धेरती पुड़ कई शाव साल पेइले रहते थिए। तैनेईं यीशु सीं तैसेरे मौतरे बारे मां गल्लां की, किजोकि तै जल्दी यरूशलेम नगरे मां मरनेबालो थियो।

ज़ैखन मूसा ते एलिय्याह यीशु सीं गल्लां केरि रावरे थिए। तैखन पतरसे यीशु सीं ज़ोवं, “इश्शे लेई इन रोड़ू आए कि अस ट्लाई डेरे बनाम, अक तेरे लेई, अक मूसारे लेई, ते अक एलिय्याहेरे लेई।” पन पतरस न थियो ज़ानतो कि तै कुन लगोरोए ज़ोने।

ज़ैखन पतरस यीशु सीं गल केरी राहोरो थियो, त अक चमकती बिदलार उन्ढी आई ते तैन पुड़ पेइ। फिरि तैनेईं बिदलारी मरां अवाज़ एइती शुनी। तैनी ज़ोवं, “इन मेरू मट्ठू आए, ज़ैस पुड़ अवं खुश आईं। एसेरी शुना, तैना ट्लाए चेले डेरी जे ते ज़मीनी पुड़ जो झ़ड़े।

तैखन यीशुए तैन्न सीं हथ लव ते ज़ोवं, “डरा न।” ज़ैखन तैनेईं च़ेवरे पासन तक्कू त तैड़ी सीर्फ यीशु थियो।

यीशु ते तैना ट्लाइए चेले पहाड़े पुड़रां उन्ढ़े आए। तैखन यीशुए तैन्न सीं ज़ोवं, “हुनां ज़ैन इड़ी भोवं तैसेरे बारे मां कोन्ची सीं न ज़ोइयथ। मीं जल्दी मरनूए ते फिरी ज़ींतू भोनूए। तैलां बाद तुस लोकन सीं ज़ोइ सख्तथ।”