35. रहम दिल बाजेरी कहानी।

एक्सां यीशु बड़े लोकन शिक्षा देइ रावरो थियो, ज़ैना तैसेरी शुन्नेरे लेई अकोट्ठे भेवरे थिए। तैना धड़त घिन्नेबाले ते किछ होरे लोक भी थिए। ज़ैनेंई मूसेरे कानूने पुड़ च़लनेरी कोशिश न थी कियोरी।

किछ धरमेरे अगुवेईं हेरू कि यीशु इन मैन्न सीं एक्की मिट्लेरो ज़ेरो बरताव केरने लगोरोए। एल्हेरेलेई तैनेंई एक्की होरी सीं इन ज़ोवं, कि तै गलत केरने लेवरोए। यीशुए तैना लोक गल्लां केरते शुने, एल्हेरेलेई तैनी तैन ई कहानी शुनाई।

अक मैनू थियो ज़ैस दूई मट्ठां थियां। निकड़े मट्ठे बाजी सीं ज़ोवं, ‘हे बाजी, मीं हुनां मेरो हिस्सों लोड़ते!’ ते बाजे अपने दुईए मट्ठन जैइदाद बेन्टतां दित्ती।

जल्दी निक्ड़ू मट्ठू अपनू सब किछ अकोट्ठू केरतां दूर मुल्खे जो च़ेली जेवं। ते तैनी पापरी ज़िन्दगी ज़ीने मां अपनू सारू धन बरबाद कियूं।

इसेरे बाद, ज़ैड़ी निकड़ू मट्ठू थियुं तैस मुल्खे मां बड़ो अकाल पेव, ते तैस कां रोट्टी घिन्नेरे लेई पेंइसे न थिए। एल्हेरेलेई तैस ज़ैन कम मैलू तैन सूर च़ारनेरू थियुं। तै एत्रो दुखी ते ढलुखोरो थियो कि ज़ैन सूर खाते थिए तै तैन खानू चातो थियो।

आखरकार, तैनी निकड़े मट्ठे अपने-आपे सीं ज़ोवं, अवं कुन लगोरोईं केरने? मेरे बाजेरे कोन्ची नौकरे भी खानेरे लेई घाटो नईं, ते अवं इड़ी ड्लुखी सीं मेरि रावरोईं। अवं अपने बाजी कां वापस गालो ते अपने बजेरो नौकर बन्नेरी गुज़ारिश केरेलो।

ते तैनी निकड़े मट्ठे वापस अपने बाजेरे घरे गानेरू सफ़र शुरू कियूं। हलाकी तै हेजू दूर थियो, तैसेरे बाजे तै लव ते तैस तरस अव। तै देवड़तां अपने मट्ठे कां जेव ते तैस गले लेइतां तैस फुड़ी दित्ती।

तैनी मट्ठे ज़ोवं, हे बाजी, मीं परमेशरेरे ते तेरे खिलाफ पाप कियोरोए। अवं तेरू मट्ठू भोनेरे काबल नईं।

पन बाजीए अपने एक्की नौकरे सीं ज़ोवं, ‘जल्दी गेइतां नंव्वां लिकड़ां आन! एसेरे एनगलोइ अवंठी ते पव्वब बूट लुवाथ। अक हुड़ मारा ताकि अस खाम ते खुशी मनाम, किजोकी मेरू मट्ठू मरोरू थियुं, पन हुनी ज़ींतूए! तैन हेरोरू थियुं, पन हनी असन मैलोरूए!’

एल्हेरेलेई लोकेईं खुशी मनानी शुरू की। किछ वक्त बीतनेरे बाद, बड्डू मट्ठू उडारे मरां कम केरतां घरे अव। तैनी गीतां ते नाच़नेरी अवाज़ शुनी। तै हैरान भोव कि एन कुन भोई रावरूए।

ज़ैखन बड़े मट्ठे पतो लगो कि तैना खुशी इल्हेरेलेईं लेवरेन मनाने, किजोकी तैसेरो निक्ड़ो ढ्ला घरे एवरोए, तैन बड्डू मट्ठू सेरकोव ते घरे मां अन्तर न लगो एजने। बाजे बेइर एइतां तैस कां तैन सीं साथी खुशी मनानेरे लेईं बिनती की, पन तैनी न मन्नू।

तैनी बड्डे मट्ठे अपने बाजी सीं ज़ोवं, ‘इना सारे सालन मां मीं तेरे लेईं ईमानदैरी सीं कम कियूं! कधी भी मीं तेरी गल न टाली, पन तुसेईं कधी भी मीं अक गबोवं भी न दित्तू कि अवं अपने दोस्तन सीं साथी खुशी मनेई। पन तुश्शे एनी मट्ठे अपनो सारो पेंइसो पाप केरने मां बर्बाद कियो। ते हुनी तैन एवरूए ते खुशी मन्नानेरे लेई तीं पेठलु मरोरोए!

बाजे जुवाब दित्तो, ‘हे मेरे मट्ठा, तू हामेशा मीं सीं साथीस, ते ज़ैन किछ भी मेरूए तैन सब तेरूए। पन हुना इश्शे लेई खुशी मन्नानी जैइजे। किजोकी तेरो ढ्ला मरोरो थियो, पन हुनी ज़ींतोए ते हेरोरो थियो पन हुनी मैलोरोए!’