34. यीशु किछ कहैनी केरे ज़िरिये शिक्षा देते।

यीशुए परमेशरेरे राज़ेरे बारे मां होरी भी बेड़ी कहैनी शुनेइ। मसालरे लेई, तैनी ज़ोवं, “परमेशरेरू राज़ एक्की शेरीहेरे बीज़ेरू ज़ेरूए ज़ैन केंन्चे अपने उडारे मां बेवं। तुस ज़ानतथ कि शेरीहेरू बीज़ होरी बीज़न करां निकड़ू भोते।”

पन ज़ैखन शेरीहेरु बीज़ बेडोते त तै बूटो बागी मां सारे बुट्टन करां बेडोते, तै एत्रो बड्डो बुट भोते कि च़ड़ोलू एइतां तैस पुड़ अपनो आलो बनातन।”

यीशुए अक होरी कहानी शुनाई, “परमेशरेरू राज़ खमीरेरू ज़ेरूए ज़ैस अक कौन्श अट्टे मां मलाचे ते तैस सीं सारू अट्टू खमीर भोते।

“सुर्गेरू राज़ तैस खज़ानेरू ज़ेरूए ज़ै केंन्चे एक्की उडारे मां छ़पाव। ते केंन्ची होरी मैनू तै खज़ानो मैलो तैनी तै हासिल केरनेरी बड़ी खुवैईश की। ते एल्हेरेलेई तैनी तै फिरि देबी छ़डो। तै एत्रो खुश थियो कि तैनी गेइतां अपनू सब किछ बेच़ू ताकि तै तैन उडार घिन्नी सखे ज़ैड़ी तै खज़ानो थियो।

“सुर्गेरू राज़ एक्की बड़े कीमती ते शुद्ध मोतेरू ज़ेरूए। ज़ैखन कोन्ची मोती केरे बुपैरी तै मैल्लो, त तै तैस हासिल केरनेरे लेई अपनू सब किछ बेच़ते।

तैड़ी किछ लोक थिए ज़ैनां सोचते थिए कि परमेशर तैन एल्हेरेलेई कुबूल केरेलो किजोकी तैना भलां कमां केरतन। एल्हेरेलेई यीशुए तैन्न ई कहानी शुनाई; “दुई मैनू थिए ते तैना दुइये प्राथना केरनेरे लेई परमेशरेरे भवने मां जे। तैन मरां अक धड़त घिन्ने बालो थियो ते होरो धरमेरो अक अगुवो थियो।”

तैनी धार्मिक अगुवे इस तरीके सीं प्राथना की, “हे परमेशर, अवं तेरू शुक्र केरताईं कि अवं होरी लोकां केरो ज़ेरो डैकू, अनिय्या केरनेबालो, बदमाशी केरनेबालो, या उस धड़त घिन्नेबलेरो ज़ेरो पापी नईं।”

अवं हफते मां दुई बार बरत रखताईं, ते अवं अपने सारे कमैइयरो दशोवं हिस्सो तीं देताईं।

पन तै धड़त घिन्नेबालो तैस धार्मीक अगुवे करां बड़े दूर खड़ो भोइ जेव। तैनी सुर्गेरे पासे तकनू भी न चावं। इसेरे बजाए, तैनी अपने हथ्थेईं सीं अपनी छाती पीटतां प्राथना की, ‘हे परमेशर, महरबानी केरतां मीं पुड़ दया केर किजोकि अवं अक पापी आईं।

फिरि यीशुए ज़ोवं, “अवं तुसन सीं सच़ ज़ोताईं, परमेशरे तैस धड़त घीन्नेबालेरी प्रथाना शुनी ते तै धर्मी ठेरहाव। पन तैनी तैस धर्मी अगुवेरी प्रथाना पसंद न की। परमेशर एक्की घुमण्ड केरने बाले झुकालो, पन तै हर तैस मैनेरी आदर केरेलो ज़ै अपने-आपे नर्म केरते।”