33. एक्की ज़मीनदारेरी कहानी।

एक्सां यीशु झिलरे बन्ने बिश्शोरो थियो। तै लोकां केरि एक्की बेड़ी भीडी शिक्षा देने लगोरो थियो। तैस शुन्नेरे लेईं एत्रे लोक अकोट्ठे भोए कि तैड़ी पव रखनेरी जगा न बच़ी एल्हेरेलेई तै एक्की किश्ती मां च़ड़ो ज़ै पैनी मां थी। ते लोकन शिक्षा देने लगो।

यीशुए तैन्न ई कहानी सुनाई, “अक ज़मीनदार उडार बेने निस्सो, ते ज़ैखन तै बीज़ शारने लगोरो थियो त किछ बीज़ बत्ती मां बिछ़ड़ू। पन च़ड़ोलेईं एइतां तैन बीज़ च़ुनू।

किछ बीज़ घोड़नबैली ज़मीनी मां बिछ़ड़ू ज़ैड़ी मित्ती घट थी। ज़ैन घोड़बैली ज़मीनी पुड़ बिछ़ड़ू तैन बड़े जलदी लग्गू ते तैसेरे निक्के-निक्के पौदे लग्गे, पन तैन केरां ज़ीलां डुघां न थियां, ते ज़ैखन दिहाड़ो निस्सो त तैना पौदे शुक्की जे।

किछ बीज़ झ़ैलन बैली ज़मीनी मां बिछड़ू ते लग्गू। ज़ैखन तैन डाल बेडोने लग्गे, तैखन झ़ैलेईं तैना दबेई छ़ड्डे। ते एल्हेरेलेई झ़ैलन बैली ज़मीनी मां बिछड़ोरे बीज़े मरां नीके-नीके बूटे लगे ते तैन पुड़ कोई फल न लग्गो।

किछ बीज़ रोड़ी ज़मीनी पुड़ बीछड़ू। तैन लगु ते तैनी 30 गुणा 60 गुणा ते इड़ी तगर की 100 गुणा फल दित्तो। ज़ै भी परमेशरे पत्ती च़लनू चाते, तै तैस गली पुड़ ध्यान दे ज़ैन अवं ज़ोइ रावरोईं!

इस कहैनी सीं चेले उलझनी मां पे। एल्हेरेलेई यीशुए तैन्न तै कहानी समझ़ाई, “तैन बीज़ परमेशरेरू वचने। बत्त अक एरो मैनूए ज़ै पेमेशरेरू वचन शुनते, पन तैस समझ़े न। फिरि शैतान तै सएइतां च़ोरतां नेते। मतलब शैतान तैस वचने समझ़ने करां दूर रख्खते।

घोड़नबाली ज़मीन एरो मैनूए ज़ै पेमेशरेरू वचन शुनते ते खुशी सीं तैस कुबूल भी केरते। पन ज़ैखन मुश्किल वक्त एइते, या होरे लोक तैस सत्तन, त तै परमेशरे करां दूर भोई गाते। मतलब तै परमेशरे पुड़ विश्वास केरनो शारते।

झ़ैलनबाली ज़मीन एरो मैनूए ज़ै पमेशरेरू वचन शुनते। पन तै बेड़ी गलां केरे बारे मां फिक्र केरते, ते तै बड़ो पेंइसो कमानेरी कोशिश केरते, ते बेड़ी चीज़ां हासिल केरनेरी कोशिश केरते। ते किछ वक्तेरां बाद तै परमेशरे सीं प्यार केरनेरे कबल न भोए। तै तैन गेहुँ केरे डंठलां केरो ज़ेरोए ज़ैन सीं कोई फल न लग्गे।

पन रोड़ी ज़मीन तै मैनूए ज़ै परमेशरेरू वचन शुनते, ते तैस पुड़ विश्वास केरते ते फल भी आनते।